ପାପଡାହାଣ୍ଡି, ୧୮।୪,(ଡି.ଏନ.ଏ)- ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ ଘାଟଗୁଡ଼ା ପଞ୍ଚାୟତ ବିସମପଦର ଗ୍ରାମବାସୀ ସମସ୍ୟା ଭିତରେ ଗତି କରୁଛନ୍ତି। ରାସ୍ତା ନ ଥିବାରୁ ବର୍ଷା ଦିନେ ଗାଁକୁ ଆମ୍ବୁଲାନ୍ସ ଆସି ପାରେନି। ଏବେ ଖରା ଦିନେ ଗାଁରେ ଉତ୍କଟ ହେଲାଣି ପାନୀୟ ଜଳ ସମସ୍ୟା । ଗୋଟିଏ ନଳକୂପର ପାଣି ୩୦୦ ଲୋକଙ୍କ ଆବଶ୍ୟକତାକୁ ପୂରଣ କରି ପାରୁନାହିଁ । ଲୋକେ ବାଧ୍ୟ ହୋଇ ଚୁଆରୁ ପାଣି ବ୍ୟବହାର କରୁଛନ୍ତି । ସେହିପରି ସୌଭାଗ୍ୟ ଯୋଜନାରେ ଗାଁକୁ ସାମିଲ କରାଯାଇଛି କିନ୍ତୁ ଗ୍ରାମର ଜଣକ ଘରକୁ ବିଦ୍ୟୁତ ସଂଯୋଗ ହୋଇ ନାହିଁ। ସମସ୍ୟା ସମ୍ପର୍କରେ ଅଭିଯୋଗ ପରେ ବି ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉ ନାହିଁ ବୋଲି ଗ୍ରାମବାସୀ କହିଛନ୍ତି।
ବିସମପଦର ଗ୍ରାମରେ ଅଛନ୍ତି ୪୫ ପରିବାରର ୩୦୦ରୁ ଊର୍ଦ୍ଧ୍ୱ ଲୋକ । ଗୋଟିଏ ସୋଲାର ଚାଳିତ ନଳକୂପର ପାଣି ହିଁ ଲୋକଙ୍କ ଭରସା । ପ୍ରବଳ ଖରା ଯୋଗୁ ସେଥିରୁ ବି କମ ପାଣି ବାହାରୁଛି । ନଳକୂପର ଜଳସ୍ତର ତଳକୁ ଚାଲି ଯାଇଥିବାରୁ ତାହା ଅଧିକାଂଶ ସମୟରେ ବନ୍ଦ ରହୁଛି । ପାଣି ହାଣ୍ଡିଏ ପାଇଁ ମହିଳାଙ୍କୁ ନଳକୂପ ନିକଟରେ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡୁଛି । ଗ୍ରାମକୁ ଏପର୍ଯ୍ୟନ୍ତ ପାଇପ ଯୋଗେ ପାନୀୟ ଜଳ ଯୋଗାଣର ବ୍ୟବସ୍ଥା କରାଯାଇ ନାହିଁ । ମହିଳାମାନେ ୧ କି.ମି ଦୂର ମହିମାଗୁଡା କିମ୍ବା କାଙ୍ଗମାଝିଗୁଡା ଯାଇ ପାଣି ଆଣୁଥିବା କହିଛନ୍ତି । ସେହି ଗ୍ରାମରେ ବି ପାଣି ସମସ୍ୟା ଦେଖା ଦେଇ ଥିବାରୁ ମହିଳାମାନେ ବାଧ୍ୟ ହୋଇ ନିକଟସ୍ଥ ନଦୀରେ ଚୁଆ ଖୋଲି ପାଣି ଆଣୁଥିବା କହିଛନ୍ତି । ଗ୍ରାମରେ ସୌଭାଗ୍ୟ ଯୋଜନାରେ ଟ୍ରାନ୍ସଫର୍ମର ସହ ଖୁଣ୍ଟ ଓ ତାର ଟଣା ଯାଇଥିବା ବେଳେ ଜଣକ ଘରକୁ ବି ଏ ପର୍ଯ୍ୟନ୍ତ ବିଦ୍ୟୁତ ସଂଯୋଗ ହୋଇ ନାହିଁ।
ଗାଁକୁ ସଂଯୋଗ କରୁଥିବା ଏକମାତ୍ର ରାସ୍ତାର ମରାମତି କରାଯାଉ ନାହିଁ। ରାସ୍ତା ସାରା ଖାଲଖମାରେ ଭରି ରହିଛି । ବର୍ଷା ହେଲେ ଆମ୍ବୁଲାନ୍ସ ଯିବା ବି ମୁସ୍କିଲ ହୋଇପଡୁଥିବା ଗ୍ରାମବାସୀ କହିଛନ୍ତି । ଗ୍ରାମର ସମସ୍ୟା ନେଇ ଗ୍ରାମବାସୀ ସ୍ଥାନୀୟ ସରପଞ୍ଚ, ବିଡ଼ିଓ ଓ ଜିଲାପାଳଙ୍କୁ ବି ଅବଗତ କରିଛନ୍ତି । କେହି କିଛି ପଦକ୍ଷେପ ନେଉ ନଥିବା କହିଛନ୍ତି । ପାନୀୟ ଜଳ ସମସ୍ୟାର ତୁରନ୍ତ ସମଧାନ ଲାଗି ମୁକୁନ୍ଦ ଭତରା, ବ୍ରଜ ପାଇକ, ଲଖଣ ଭତରା, ରାମଚନ୍ଦ୍ର ପାଇକ, ଅଭି ପାଇକ, ମନମୋତି ଭତରା, ଯମୁନା ଭତରା ପାକଲି ଭତରା, ଅମ୍ବିକା ପାଇକ, ପ୍ରମିଳା ଭତରା, ପଦମା ଭତରା ପ୍ରମୁଖ କହିଛନ୍ତି।