କୋକସରା, ୨୬।୧୨(ଡି.ଏନ୍.ଏ.)-
କଳାହାଣ୍ଡି ଜିଲା କୋକସରା ବ୍ଲକ ଫୁଫଗାଁ ପଁଚେତ୍ ସିର୍ଲିଗୁଡ଼ା ଗାଁବାସୀକୁ ସୌଭାଗ୍ୟ ଯୋଜନାରେ ବିଦ୍ୟୁତ୍ ସଂଯୋଗ ଯୁଗେଇ ଦେବାର ଲାଗି କାମ୍ ମୂଲ ହେଇଛେ। ହେଲେ କାମ୍ ମୂଲ ହେବାର ଅନେକ ବଛର ବିତିଯାଇଥିଲେ ବି ଗାଁବାସୀ ବିଦ୍ୟୁତ୍ ସଂଯୋଗ ପାଏବାରୁ ବଁଚିତ୍ ହେଇଥିବାର ଅଭିଯୋଗ କରିଛନ୍।
ସୂଚନା ଅନ୍ସାରେ ସିର୍ଲିଗୁଡ଼ା ଗଁାର ପାଖାପାଖି ୩୦ ବିପିଏଲ୍ ପରିବାରକେ ସୌଭାଗ୍ୟ ଯୋଜନାରେ ବିଦ୍ୟୁତ୍ ସଂଯୋଗ ଯୁଗେଇ ଦେବାକେ ୪ ବଛର ତଲେ କାମ୍ ମୂଲ ହେଇଥିଲା। ଗାଁରେ ବିଦ୍ୟୁତ୍ ଖୁଁଟା ତୁପା ଯାଇ ତାର ଟନା ଯାଇଛେ। ହିତାଧିକାରୀମାନକର ଘରମାନକୁ ବିଦ୍ୟୁତ୍ ସାମାନ ଖଁଜା ଯାଇଛେ। ହେଲେ ବିଭାଗୀୟ ଅଧ୍କାରୀକଁର ଅବହେଲା ଆର ଖାମ୍ଖିଆଲି ମନଭାବ ଲାଗି ଗଁାବାସୀ ବିଦ୍ୟୁତ୍ ସେବା ପାଏବାରୁ ବଁଚିତ୍ ଥିବାର ଅଭିଯୋଗ କରିଛନ୍। ଏନ୍ତାଥି ହିତାଧିକାରୀମାନେ ଅନେକ ସମିଆରେ ବିଭାଗୀୟ ଅଧ୍କାରୀ, ନେତା ମନ୍ତ୍ରୀକୁଁ ଗୁହାରି କରି ନିରାଶ ହେଇଥିବାର କହିଛନ୍। ଶେଷେ ଉପେ ଶୂଇନ୍ ହିତାଧିକାରୀ ହଲଧର ଶବର, ବଲରାମ ଶବର, ରୁପଧର ବେମାଲ, ମୋହନ ଶବର, ଦିବାକର ଜାଲ, ହରି ଶବର, ଧନବାଲ ଶବର, ଦୈତାରି ପୂଜାରୀ, ରତନ ଶବର, ରତ୍ନାକର ଶବର ଖଗପତି ଶବର, ରିଙ୍କୁ ଶବର ପରମୁଖ୍ ଏକ୍ଯୋଟ ହେଇ ଧର୍ମଗଡ଼ ଉପଜିଲାପାଳକୁଁ ବିଦ୍ୟୁତ୍ ସଂଯୋଗ ଲାଗି ଲିଖିତ ଅଭିଯୋଗ କରିଛନ୍। ପରଶାସନ କି ବିଭାଗୀୟ ଅଧ୍କାରୀ ସମସିଆର ସମାଧାନ ଦିଗେ ପଦକ୍ଷେପ ନାଇଁ ନେଲେ ଗାଁବାସୀ ଆଏବାର ଦିନେ ଆଂଦୋଲନ ଲାଗି ରାଜ୍ ରାସ୍ତାକେ ଉତିରମୁ ବଲି ଚେତାବନୀ ଦେଇଛନ୍।
