ରୂପ୍ସା, ୨୩।୮(ଡି.ଏନ.ଏ.)-ବାଲେଶ୍ୱର ସଦର ବ୍ଲକ ଅଧୀନ ୬୦ନଂ. ଜାତୀୟ ରାଜପଥ ପାର୍ଶ୍ୱରେ ଥିବା ୩୩କେଭି ବିଦ୍ୟୁତ୍ ଲାଇନ୍ରୁ ପ୍ରାୟ ୩୦ଲକ୍ଷ ଟଙ୍କାରୁ ଉର୍ଦ୍ଧ୍ୱ ମୂଲ୍ୟର ବିଦ୍ୟୁତ୍ ତାର ଚୋରି ହୋଇଥିବା ବସ୍ତା ଥାନାରେ ଅଭିଯୋଗ ହୋଇଥିଲା। ଏ ସଂକ୍ରାନ୍ତରେ ଗତ ମେ ୩୦ ତାରିଖରେ ଥାନାରେ ଏକ ମାମଲା (ନଂ. ୧୩୮/୧୯) ରୁଜୁ ହୋଇଥିଲା। ବସ୍ତା ଥାନା ଆଇଆଇସି ଧନେଶ୍ୱର ସାହୁ, ଏସ୍ଆଇ ପ୍ରଶାନ୍ତ କୁମାର ପାଣି, ସିଂଲା ଆଇଆଇସି ସୁବ୍ରତ ବେହେରା ପ୍ରମୁଖ ସଦଳବଳେ ଶୁକ୍ରବାର ଭୋର୍ ସମୟରେ ଲଙ୍ଗଳେଶ୍ୱରର ଏକ କବାଡ଼ିଆ ଗୋଦାମରେ ଚଢ଼ାଉ କରି ଲକ୍ଷାଧିକ ଟଙ୍କାର ଚୋରି ବିଦ୍ୟୁତ୍ ତାର ସହ ଏକ ସ୍କର୍ପିଓ ଜବତ କରିଛନ୍ତି। ଏଥିସହ ବିଦ୍ୟୁତ୍ ତାର ଚୋରି ଘଟଣାରେ ମୟୂରଭଞ୍ଜ ଓ ବାଲେଶ୍ୱର ଜିଲାର ୪ଜଣ ଅଭିଯୁକ୍ତଙ୍କୁ ଅଟକ ରଖି ପଚରାଉଚୁରା କରାଯାଉଛି। ଘଟଣାସ୍ଥଳରୁ ଜଣେ ଅଭିଯୁକ୍ତ ଫେରାର ହୋଇଯାଇଥିବା ପୋଲିସ କହିଛି। ତଦନ୍ତରେ ବାଧା ଉପୁଜିବା ଆଶଙ୍କା କରି ପୋଲିସ ଅଭିଯୁକ୍ତଙ୍କ ନାମ ପ୍ରକାଶ କରିନାହଁ।
ପ୍ରକାଶ ଯେ, ଏହି ମାମଲାରେ ଜୁନ୍ ୭ ତାରିଖ ରାତିରେ ବସ୍ତା ଥାନା ପୋଲିସ ଚଢ଼ାଉ କରି ବସ୍ତା ଅଞ୍ଚଳର ୨ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଥିଲା। ସେମାନେ ବ୍ୟବହାର କରୁଥିବା ଏକ ପିକଅପ୍ ଭ୍ୟାନ୍ ସହ ୯ ସ୍ପାନ ଚୋରା ବିଦ୍ୟୁତ୍ ତାର ଜବତ କରିଥିଲା।