ବନ୍ତଳା, ୨୩।୭ (ଡି.ଏନ୍.ଏ.)
ଅନୁଗୋଳ ଜିଲା ଅନ୍ତୁଳିଆ ପଞ୍ଚାୟତ ଉନ୍ନୀତ ଉଚ୍ଚ ବିଦ୍ୟାଳୟକୁ ସୋମବାର କୌଣସି ଛାତ୍ରୀଛାତ୍ର ଆସି ନ ଥିଲେ। ସ୍କୁଲକୁ ଅଧିକ ୨ଜଣ ଶିକ୍ଷକ ନ ଦିଆଯିବା ପର୍ଯ୍ୟନ୍ତ ଅଭିଭାବକମାନେ ପିଲାଙ୍କୁ ଛାଡ଼ିବେ ନାହିଁ ବୋଲି ପୂର୍ବରୁ ଚେତାବନୀ ଦେଇଥିବାରୁ ପିଲାମାନେ ଆସି ନ ଥିବା ଜଣାପଡ଼ିଛି। ଫଳରେ ସ୍କୁଲ ଆସିଥିବା ଜଣେ ଶିକ୍ଷକ ବସି ବସି ଫେରିଯାଇଥିବା ଜଣାପଡ଼ିଛି।
ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ୩୦୨ ଜଣ ପିଲା ଏଠାରେ ପଢ଼ୁଛନ୍ତି। ମାତ୍ର ଏତେ ସଂଖ୍ୟକ ପିଲାଙ୍କ ପାଇଁ ୮ ଜଣ ଶିକ୍ଷକ ଥିବା ବେଳେ ୨ଜଣଙ୍କୁ ଅନ୍ୟତ୍ର ଡେପୁଟେଶନରେ ପଠାଯାଇଛି। ଏ ନେଇ ଗ୍ରାମବାସୀ ବାରମ୍ବାର ଦାବି କଲେ ମଧ୍ୟ କର୍ତ୍ତୃପକ୍ଷ କର୍ଣ୍ଣପାତ କରୁନାହାନ୍ତି। ଏଠାରେ ପ୍ରଥମ ଶ୍ରେଣରେ ୧୭ ପିଲା ପଢ଼ୁଥିବା ବେଳେ ଦ୍ୱିତୀୟ ଶ୍ରେଣୀରେ ୨୩, ତୃତୀୟରେ ୩୫, ଚତୁର୍ଥରେ ୧୮ ଜଣ, ପଞ୍ଚମରେ ୧୮, ଷଷ୍ଠରେ ୩୬, ସପ୍ତମରେ ୩୫, ଅଷ୍ଟମରେ ୪୭, ନବମରେ ୩୯ ଜଣ, ଦଶମ ଶ୍ରେଣୀରେ ୩୫ ଜଣ ପଢ଼ୁଛନ୍ତି। ଜୁନ ୨୮ ଠାରୁ ଜିଲାପାଳ, ବିଇଓ ଅଫିସ, ଡିଇଓ ଅଫିସ ଓ ବ୍ଲକକୁ ଶିକ୍ଷକ ନିଯୁକ୍ତି ପାଇଁ ଚିଠି ଦିଆଯାଇଥିଲେ ମଧ୍ୟ ୨୫ ଦିନ ଭିତରେ ଶିକ୍ଷା ବିଭାଗ କୌଣସି ପଦକ୍ଷେପ ନେଇପାରିଲା ନାହିଁ। ଫଳରେ ସୋମବାରଠାରୁ ସ୍କୁଲ ବନ୍ଦ ରହିଥିବା ଅଭିଭାବକମାନେ ପ୍ରକାଶ କରିଛନ୍ତି।
