ବାଲିଆପାଳ, ୨୨ା୬(ଡି.ଏନ.ଏ.)-ସାମୁଦ୍ରିକ ଝଡ ଫନୀ ପ୍ରଭାବରେ ବାଲିଆପାଳ ବ୍ଲକ ବିଷ୍ଣୁପୁର ହାଇସ୍କୁଲର ଛପର ସମ୍ପୂର୍ଣ୍ଣ ଉଡିଯାଇଥିଲା। ଶୁକ୍ରବାର ସ୍କୁଲ ଖୋଲିଥିଲେ ମଧ୍ୟ ଛପର ମରାମତି ହୋଇପାରି ନ ଥିବାରୁ ପିଲାମାନେ ବସି ପାଠ ପଢିବାକୁ ହଇରାଣ ହୋଇଛନ୍ତି। ସରକାର ଗ୍ରୀଷ୍ମ ଛୁଟି ପରେ ପ୍ରଥମେ ୧୯ତାରିଖରେ ସ୍କୁଲ ଖୋଲିବାର ନିଷ୍ପତ୍ତି ନେଇଥିଲେ। ପରେ ପ୍ରବଳ ଗ୍ରୀଷ୍ମପ୍ରବାହ ପାଇଁ ଛୁଟିକୁ ବଢାଇ ୨୬ରେ ସ୍କୁଲ ଖୋଲିବାର ସିଦ୍ଧାନ୍ତ ହୋଇଥିଲା। ପାଗରେ ପରିବର୍ତ୍ତନ ହେବାରୁ ପୁଣି ୨୧ରେ ଖୋଲିବ ବୋଲି ଘୋଷଣା କରାଯାଇଛି। ମାତ୍ର ଗତ ମେ’ ୩ତାରିଖ ପରେ ସ୍କୁଲ ଗୃହର ଛପର ଉଡିଯିବା ପରେ ଶିକ୍ଷକମାନେ ସରକାରଙ୍କର ସାହାଯ୍ୟ ପାଇଁ ଶିକ୍ଷାବିଭାଗ, ବ୍ଲକ ପ୍ରଶାସନ ଓ ତହସିଲଦାରଙ୍କ ପାଖରେ ସ୍କୁଲ ଗୃହ ଛପର ମରାମତି ପାଇଁ ଦାବି କରିଆସୁଥିଲେ ମଧ୍ୟ ତାହା ଆଜି ପର୍ଯ୍ୟନ୍ତ କାର୍ଯ୍ୟକାରୀ ହୋଇପାରିଲା ନାହିଁ ା ବିଷ୍ଣୁପୁର ପଞ୍ଚାୟତର ସର୍ବପୁରାତନ ଏହି ବିଦ୍ୟାଳୟର ଆବଶ୍ୟକ ମୁତାବକ ସ୍କୁଲଗୃହ ନାହିଁ ା ବ୍ଲକଗ୍ରାଣ୍ଟ ସ୍ବୀକୃତିପ୍ରାପ୍ତ ଏହି ବିଦ୍ୟାଳୟକୁ ଏ ପର୍ଯ୍ୟନ୍ତ ସରକାରୀ ସାହାଯ୍ୟ ମିଳିପାରିନାହିଁ ା ବିଦ୍ୟାଳୟ ପରିଚାଳନା କମିଟି ଓ ଶିକ୍ଷକ କର୍ମଚାରୀଙ୍କ ତଥା ଲୋକ ପ୍ରତିନିଧିଙ୍କ ସହଯୋଗରେ ଆଜି ପର୍ଯ୍ୟନ୍ତ ବିଦ୍ୟାଳୟ ପ୍ରତିଷ୍ଠା ହୋଇଆସିଛି ା ସରକାର କେବଳ ବ୍ଲକଗ୍ରାଣ୍ଟ ସ୍ବୀକୃତି ଦେଇ ଶିକ୍ଷକ ଓ କର୍ମଚାରୀଙ୍କୁ ଅଳ୍ପ ଦରମା ଦେଉଥିବା ବେଳେ ସ୍କୁଲ ଗୃହ ପାଇଁ କୌଣସି ଗ୍ରାଣ୍ଟ ଦେଇନାହାନ୍ତି। ଏବେ ବର୍ଷା ଝିପି ଝିପି ଲାଗି ରହିଥିବାରୁ ପିଲାମାନଙ୍କୁ କିପରି ପାଠ ପଢାଯିବ ବୋଲି ପ୍ରଧାନଶିକ୍ଷକ ଶଶିକାନ୍ତ ପ୍ରଧାନ ଚିନ୍ତା ପ୍ରକଟ କରିଛନ୍ତି।
