ଭୋପାଳ,୨୧।୭: ସ୍କୁଲ ନିର୍ମାଣ ପାଇଁ ୧୪ ବର୍ଷ ତଳେ ସରକାରଙ୍କ ପକ୍ଷରୁ ୫ ଲକ୍ଷ ଟଙ୍କାର ଅନୁଦାନ ମଞ୍ଜୁର ହୋଇଥିଲା। ତେବେ ନିର୍ଦ୍ଧାରିତ ସ୍ଥାନରେ କେବଳ ୧୨ଟି କାଠ ଖମ୍ବ ପୋତି ସମସ୍ତ ଟଙ୍କାକୁ ହଡ଼ପ କରାଯାଇଥିବା ଅଭିଯୋଗ ହୋଇଛି। ମଧ୍ୟପ୍ରଦେଶ ଝାବୁଆ ଅନ୍ତର୍ଗତ ଅଲ୍ଲୀରାଜପୁର ଜିଲାରେ ଘଟିଛି ଏଭଳି ଅଭାବନୀୟ ଘଟଣା। ସ୍ଥାନୀୟ ସୋଣ୍ଡଓ୍ବା ତହସିଲ୍ର ଗୁଲବଟ ଗ୍ରାମ ପଞ୍ଚାୟତର ଚେ ପଟେଲ ଫଲିଆ ଖାମ୍ବାରେ ଶିକ୍ଷାବିଭାଗରେ ଏଭଳି ଅନିୟମିତତା ହୋଇଥିବା ଅଭିଯୋଗ ହୋଇଛି। ସରକରୀ ପ୍ରାଥମିକ ବିଦ୍ୟାଳୟ ନିର୍ମାଣ ପାଇଁ ୨୦୦୫-୬ରେ ଅନୁଦାନ ମଞ୍ଜୁର ହୋଇଥିଲା। ପାହାଡ଼ ଉପରେ ଥିବା ଏହି ସ୍କୁଲରେ ୨ ଛାତ୍ର ଏବଂ ଜଣେ ଶିକ୍ଷକ ଥିବା ସରକାରୀ କାଗଜପତ୍ରରେ ଦର୍ଶାଯାଇଛି। ନିକଟରେ ଶିକ୍ଷାବିଭାଗ ପକ୍ଷରୁ ନୋଡାଲ ଶିକ୍ଷକ ରକନସିଂ ଭୟଡିୟାଙ୍କୁ ଏଠାରେ ନିଯୁକ୍ତି କରାଯାଇଥିଲା। ରକନସିଂ ଏଠାକୁ ଆସି ଆସି ଆଶ୍ଚର୍ଯ୍ୟ ହୋଇଯାଇଥିଲେ। ସ୍କୁଲ ବଦଳରେ ଏଠାରେ କେବଳ କାଠ ଖମ୍ବ ଥିଲା। ଏନେଇ ସେ ଶିକ୍ଷାବିଭାଗକୁ ଅବଗତ କରାଇଥିଲେ। ଏବେ ଏହି ଘଟଣାର ଖୋଳତାଡ଼ ଆରମ୍ଭ ହୋଇଛି।