ଭଣ୍ଡାରିପୋଖରୀ, ୧।୭ (ଡି.ଏନ.ଏ.) – ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ରାଜେନ୍ଦ୍ରପୁର ପଞ୍ଚାୟତ ସାରୋ ନୋଡାଲ ସ୍କୁଲ ପରିସରରୁ ୫ଟି ବଡ଼ ବଡ଼ କଦମ୍ବ ଗଛ କଟାଯାଇଥିବା ନେଇ ଗ୍ରାମବାସୀ ସୋମବାର ବିଇଓଙ୍କ ନିକଟରେ ଅଭିଯୋଗ କରିଛନ୍ତି। ବିଦ୍ୟାଳୟ କମିଟି ଛୁଟିଦିନରେ ଗଛଗୁଡ଼ିକ କାଟି ବିକ୍ରି କରିଦେଇଥିବା ଗ୍ରାମବାସୀ ଗୋପବନ୍ଧୁ ସାହୁ, ସୁବାସ ଦାସ, ଅକ୍ଷୟ ଭାରତୀ, ରୋହିତ ଭାରତୀ, ବୀରେନ୍ଦ୍ର ଭାରତୀ ଅଭିଯୋଗରେ ଦର୍ଶାଇଛନ୍ତି। ସେହିପରି ବିଦ୍ୟାଳୟରେ ଛାତ୍ରୀଛାତ୍ରଙ୍କୁ ନିମ୍ନମାନର ମଧ୍ୟାହ୍ନ ଭୋଜନ ଦିଆଯାଉଥିବା ଅଭିଯୋଗ କରାଯାଇଛି। ଗଛ କଟା ସମ୍ପର୍କରେ ପ୍ରଧାନ ଶିକ୍ଷକ ନରେନ୍ଦ୍ର ବେହେରାଙ୍କୁ ଯୋଗାଯୋଗ କରିବାରୁ କହିଥିଲେ, ସେତେବେଳେ ଗଛ କଟାଯିବା ବିଷୟରେ ସେ ଜାଣି ନ ଥିଲେ। ବିଦ୍ୟାଳୟ ଖୋଲିବା ପରେ କମିଟିକୁ ପଚାରିବାରୁ ତହସିଲ ପକ୍ଷରୁ ଅନୁମତି ପାଇ ଗଛ କଟାଯାଇଥିବା କୁହାଯାଇଥିଲା। କମିଟିକୁ ଅନୁମତିପତ୍ର ଦେଖାଇବା ପାଇଁ କହିବାରୁ ଆଜିକାଲି କହି ସମୟ ଗଡ଼ାଇ ଚାଲିଥିବା ସେ କହିଛନ୍ତି। ତେବେ ପ୍ରଧାନ ଶିକ୍ଷକ ସୋମବାର ଏ ନେଇ ଅଭିଯୋଗ ପତ୍ର ଡାକ ଯୋଗେ ତହସିଲଦାର, ବ୍ଲକ ଶିକ୍ଷାଧିକାରୀ ଓ ଥାନାଧିକାରୀଙ୍କ ନିକଟକୁ ପଠାଇଛନ୍ତି। ସ୍ଥାନୀୟ ସରପଞ୍ଚ ଲକ୍ଷ୍ମୀପ୍ରିୟଦର୍ଶିନୀ ଭାରତୀ ଏହି ଘଟଣାକୁ ନାପସନ୍ଦ କରିଛନ୍ତି। ଧାମନଗର ବନ ବିଭାଗ ରେଞ୍ଜର ସମୀର କୁମାର ରାଉତ ଏଭଳି ଗଛକଟାକୁ ନାପସନ୍ଦ କରିବା ସହ ପଦକ୍ଷେପ ନେବାକୁ କହିଛନ୍ତି। ଘଟଣାର ଆବଶ୍ୟକ ତଦନ୍ତ କରାଯିବ ବୋଲି ବିଇଓ ଦୀପକ କୁମାର ପାଢୀ ସୂଚନା ଦେଇଛନ୍ତି।