ଆନନ୍ଦପୁର,୭।୭(ସ୍ବ.ପ୍ର.)-ଶନିବାର ଏକ ବଡ଼ ଦୁର୍ଘଟଣାରୁ ୧୮ ଜଣ ଛାତ୍ରୀଛାତ୍ର ଅଳ୍ପକେ ବର୍ତ୍ତି ଯାଇଛନ୍ତି। କେନ୍ଦୁଝର ଜିଲା ଘସିପୁରା ଥାନା ଗୋହିରାଠାରେ ଥିବା ଏକ ଘରୋଇ ଇଂଲିଶ ମାଧ୍ୟମିକ ବିଦ୍ୟାଳୟର ସ୍କୁଲ ବସ୍ ପଛକୁ ଏକ ଆଇରନ୍ ବୋଝେଇ ଟ୍ରକ୍ ଧକ୍କା ଦେଇଥିଲା । ଏହି ଦୁର୍ଘଟଣାରେ ବସ୍ର ପଛପାଖ ଡୋର୍ କାଚ ଭାଙ୍ଗି ଯାଇଛି । ତେବେ ବସ୍ରେ ଥିବା ୧୮ ଛାତ୍ରୀଛାତ୍ର ଏହି ଦୁର୍ଘଟଣାରୁ ଅଳ୍ପକେ ରକ୍ଷା ପାଇଯାଇଛନ୍ତି । ସ୍କୁଲ୍ ଛୁଟି ପରେ ଛାତ୍ରୀଛାତ୍ରଙ୍କୁ ଧରି ଉକ୍ତ ବସ୍ ଗୋହିରାଠାରୁ ବାହାରି ୨ କି.ମି. ଦୂର ତାଳଗାଁ ଛକରେ ଥିବା ରୋଡ କଟ୍ରେ ୟୁଟର୍ଣ୍ଣ କରି ବାମପାର୍ଶ୍ୱକୁ ଆସୁଥିବା ବେଳେ ଏହି ଦୁର୍ଘଟଣା ଘଟିଥିଲା । ଘସିପୁରା ପୋଲିସ ଆଇରନ ବୋଝେଇ ଟ୍ରକକୁ ଜବତ କରିଛି।