ସ୍ତନ୍ୟପାନ କରାଉଥିଲେ ଧୂମପାନ ହାନିକାରକ

ଧୂମପାନ କରିବା ଏବଂ ଏହା ସଂସ୍ପର୍ଶରେ ରହିବା ଉଭୟ ସ୍ବାସ୍ଥ୍ୟ ପାଇଁ ହାନିକାରକ। ଏହା ସବୁଠୁ ଅଧିକ ମହିଳାଙ୍କ ପାଇଁ କ୍ଷତିକାରକ ହୋଇଥାଏ, ଯେଉଁମାନେ ନବଜାତକଙ୍କୁ ସ୍ତନ୍ୟପାନ କରାଉଥାନ୍ତି। ଶିଶୁଙ୍କୁ ସ୍ତନ୍ୟପାନ କରାଉଥିବା ମା’ମାନେ ଯଦି ଘରେ ଧୂମପାନ ସଂସ୍ପର୍ଶରେ ଆସନ୍ତି, ତେବେ ସେମାନଙ୍କ ସ୍ତନ୍ୟପାନ ଅବଧି ଉପରେ ନକାରାମତ୍କ ପ୍ରଭାବ ପଡ଼େ। ଏକ ଗବେଷଣାରୁ ଏହା ଜଣାପଡ଼ିଛି। ଗବେଷଣାର ନିଷ୍କର୍ଷ ଅନୁସାରେ, ପତ୍ରିକା ‘ବ୍ରେଷ୍ଟ୍‌ଫିଡିଙ୍ଗ୍‌ ମେଡିସିନ୍‌’ରେ ଏ ସମ୍ପର୍କିତ ତଥ୍ୟ ବିସ୍ତୃତ ଭାବେ ଆଲୋଚନା ହୋଇଛି। ଏଥିରେ ସ୍ତନ୍ୟପାନ କରାଉଥିବା ମା’ଙ୍କ ଉପରେ ଘରୋଇ ଧୂମପାନକର୍ତ୍ତାଙ୍କ ସଂସ୍ପର୍ଶରେ ଆସିବା ଦ୍ୱାରା ସୃଷ୍ଟି ହେଉଥିବା ନକାରାମତ୍କ ପ୍ରଭାବ ଆଲୋଚନା ହୋଇଛି। ବ୍ରିଟିଶ କଲମ୍ବିଆ ବିଶ୍ୱବିଦ୍ୟାଳୟର ପ୍ରଫେସର୍‌ ମ୍ୟାରୀ ତରାନ୍ତଙ୍କ ଅନୁସାରେ, ଗବେଷଣାରେ ଧୂମପାନ କରୁଥିବା ପରିବାରରେ ପିଲାଙ୍କ ସ୍ତନ୍ୟପାନ ଅବଧି କମ୍‌ ହେଉଥିବା ଜଣାପଡ଼ିଛି। ଏହି ଧୂମପାନକାରୀଙ୍କ ମଧ୍ୟରେ ପିତା, ମା’ କିମ୍ବା ଅନ୍ୟ କୌଣସି ସଦସ୍ୟ ସ୍ଥାନ ପାଇପାରନ୍ତି। ତରାନ୍ତଙ୍କ ଅନୁସାରେ, ଯେଉଁ ପରିବାରରେ ଧୂମପାନକାରୀଙ୍କ ସଂଖ୍ୟା ଯେତେ ଅଧିକ ସେଠାରେ ସ୍ତନ୍ୟପାନ ଅବଧି ସେତେକମ୍‌ ହୋଇଥାଏ। ସବୁଠୁ ବଡ଼ କଥା, ସ୍ତନ୍ୟପାନ ଅବଧି ହ୍ରାସ ପାଇବାର ଅର୍ଥ ଉଭୟ ମା’ ଓ ଶିଶୁଙ୍କ ପାଇଁ ବିପଜ୍ଜନକ। ଶିଶୁର ସୁସ୍ଥ ଶରୀର ପାଇଁ ସ୍ତନ୍ୟପାନ ନିତାନ୍ତ ଜରୁରୀ। ଏଥିରେ ବ୍ୟତିକ୍ରମ ପରିଲକ୍ଷିତ ହେଲେ ବିଭିନ୍ନ ସ୍ବାସ୍ଥ୍ୟଗତ ସମସ୍ୟା ଉପତ୍ନ୍ନ ହୋଇଥାଏ।