ଅନୁଗୋଳ ଅଫିସ, ୧୯।୧୨ – ସ୍ତ୍ରୀଙ୍କୁ ଆତ୍ମହତ୍ୟା ପାଇଁ ପ୍ରବର୍ତ୍ତାଇବା ମାମଲାର ବିଚାର କରି ଅନୁଗୋଳ ଜିଲା ଓ ଦୌରାଜଜ୍ କୋର୍ଟ ଅଭିଯୁକ୍ତ ସ୍ବାମୀ ଅନୁଗୋଳ ଥାନା ଜାମୁନାଳିର ବିରଞ୍ଚତ୍ ପଟ୍ଟନାୟକ(୪୯)ଙ୍କୁ ୧୦ ବର୍ଷ କାରାଦଣ୍ଡରେ ଦଣ୍ଡିତ କରିବା ସହ ୧୦ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି। ମୋଟ ୧୫ ଜଣ ସାକ୍ଷ୍ୟ ପ୍ରମାଣକୁ ଭିତ୍ତିକରି ଜିଲା ଓ ଦୌରାଜଜ୍ ଅଶାନ୍ତ କୁମାର ଦାସ ଏହି ରାୟ ଶୁଣାଇଛନ୍ତି। ଏଥିସହ ଅନ୍ୟ ୭ ଅଭିଯୁକ୍ତଙ୍କୁ ନିର୍ଦ୍ଦୋଷ ବୋଲି କୋର୍ଟ କହିଛନ୍ତି। ସରକାରଙ୍କ ପକ୍ଷରୁ ପିପି ପ୍ରଦୀପ କୁମାର ଦାସ ମାମଲା ପରିଚାଳନା କରୁଥିଲେ।
ବିବରଣୀରୁ ପ୍ରକାଶ ଯେ, ଅନୁଗୋଳ ଥାନା ଜାମୁନାଳି ଅଞ୍ଚଳରେ ୨୦୧୬ ଏପ୍ରିଲ ୧ରେ ବିରଞ୍ଚିଙ୍କ ସ୍ତ୍ରୀ ସାରଥୀ ପଟ୍ଟନାୟକ ରଶି ଲଗାଇ ଆତ୍ମହତ୍ୟା କରିଥିଲେ। ସ୍ବାମୀଙ୍କ ମାନସିକ ଓ ଶାରୀରିକ ନିର୍ଯାତନା ସହ୍ୟ କରି ନ ପାରି ସାରଥୀ ଆତ୍ମହତ୍ୟା କରିଥିବା ତାଙ୍କ ଭାଇ ଶ୍ରୀକାନ୍ତ ମହାନ୍ତି ଅନୁଗୋଳ ଥାନାରେ ଅଭିଯୋଗ କରିବା ପରେ ପୋଲିସ ନଂ. ୧୫୧/୧୬ରେ ମାମଲା କରି ତଦନ୍ତ ଚଳାଇଥିଲା। ଏହି ଘଟଣାରେ ବିରଞ୍ଚତ୍ଙ୍କ ମା’ ଜନକ ପଟ୍ଟନାୟକ, ସାନଭାଇ ସୁଜନ ପଟ୍ଟନାୟକ, ବଡ଼ଭାଇ ସରୋଜ ପଟ୍ଟନାୟକ, ପୁତୁରା ସୁଦର୍ଶନ ପଟ୍ଟନାୟକ, ପୋଡ଼ିବା ପାଇଁ କାଠ ଆଣିଥିବା ବ୍ୟକ୍ତି କାଣ୍ଡୁର ପ୍ରଧାନ, କୋଇଲା ଆଣିଥିବା ବ୍ୟକ୍ତି ନିଖିଲ ପଟ୍ଟନାୟକ ଓ ଗାଁର କୁମୁଦ ପ୍ରଧାନ ସମ୍ପୃକ୍ତ ଥିବା ଅଭିଯୋଗ ହୋଇଥିବାରୁ ସମସ୍ତଙ୍କୁ ପୋଲିସ ଗିରଫ କରିଥିଲା। ତେବେ ଜିଲା ଓ ଦୌରା ଜଜ୍ କେବଳ ବିରଞ୍ଚତ୍ଙ୍କୁ ଦୋଷୀ ସାବ୍ୟସ୍ତ କରିଥିବାବେଳେ ଅନ୍ୟ ୭ ଜଣ ନିର୍ଦ୍ଦୋଷ ବୋଲି ରାୟ ଶୁଣାଇଛନ୍ତି।