ଚନ୍ଦାହାଣ୍ଡି,୩୧।୧୨(ଡି.ଏନ.ଏ)-ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକ ଜମାଦାରପଡା ଗ୍ରାମରେ ଗୁରୁବାର ସ୍ତ୍ରୀର ପଥର ମାଡରେ ସ୍ବାମୀ ଗୁରୁତର ହୋଇଛନ୍ତି। ଗୁରୁତର ଜଣକ ହେଲେ ମନୁ ଜଗଳ (୫୦)। ଚନ୍ଦାହାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି। ପଥର ମାଡ କରି ରାମବତୀ କୁଆଡେ ଚାଲି ଯାଇଥିବା ମନୁ କହିଛନ୍ତି।
ଜମାଦାରପଡା ଗ୍ରାମର ମନୁ ରାଇଘର ବ୍ଲକ କୁମୁଲି ପଞ୍ଚାୟତର ଜାମଦରା ଗ୍ରାମର ରାମବତୀ ଜଗଳଙ୍କୁ ବିବାହ କରିଥିଲେ। ତାଙ୍କର ୨ ପୁଅ ଓ ୨ ଝିଅ ଅଛନ୍ତି। ସେମାନେ ଅଧିକାଂଶ ସମୟରେ ରାଇଘରରେ ରହୁଥିଲେ। ରାଇଘର ବ୍ଲକରେ ମନୁ ମେକାନିକ କାମ କରୁଥିବା ବେଳେ ବିଦ୍ୟୁତ ଆଘାତ ଲାଗିଥିଲା। ଏଥିଯୋଗୁ ତାଙ୍କର ୨ ଗୋଡରେ ଶକ୍ତି ନ ଥିବା ଯୋଗୁ ଦିବ୍ୟାଙ୍ଗ ହୋଇଯାଇଥିଲେ। ଏଥିପାଇଁ ସେ ବାହାରକୁ କାମ କରିବାକୁ ଯାଉ ନ ଥିଲେ। ଏହାକୁ ନେଇ ସ୍ବାମୀ ଓ ସ୍ତ୍ରୀ ମଧ୍ୟରେ ଗଣ୍ଡଗୋଳ ହେଉଥିଲା। ଗୁରୁବାର ଉଭୟଙ୍କ ମଧ୍ୟରେ ଝଗଡା ହୋଇଥିଲା। ରାମବତୀ ରାଗିଯାଇ ମନୁଙ୍କୁ ୧୦ରୁ ୧୫ ଟି ପଥରରେ ବାଡେଇ ଫେରାର ହୋଇଯାଇଥିଲେ। ଘଟଣା ଦିନ ମନୁ ଚନ୍ଦାହାଣ୍ଡିରେ ରହିଥିବା ବେଳେ ପୁଅଝିଅ ରାଇଘରରେ ରହିଥିଲେ। ଏଥିଯୋଗୁ ମନୁଙ୍କୁ ପଡୋଶୀ ନେଇ ଚନ୍ଦାହାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ୫ ଦିନ ହେବ ସେଠାରେ ସେ ଏକୁଟିଆ ପଡି ରହିଥିବା ବେଳେ ତାଙ୍କ ପାଖରେ କେହି ନ ଥିବାରୁ ଠିକ ଭାବେ ଚିକିତ୍ସିତ ହୋଇ ପାରୁ ନ ଥିବା କହିଛନ୍ତି। ଇନଡୋର ରୋଗୀଙ୍କୁ ଡାକ୍ତରଖାନା ପକ୍ଷରୁ ରନ୍ଧା ଖାଦ୍ୟ ଦିଆଯିବାର ବ୍ୟବସ୍ଥା ରହିଥିଲେ ମଧ୍ୟ ଚନ୍ଦାହାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ରୋଗୀଙ୍କୁୁ ରନ୍ଧା ଖାଦ୍ୟ ଦିଆଯାଉ ନ ଥିବା ଅଭିଯୋଗ ହୋଇଛି।