ଜୁରିଚ୍, ୫ା୩- ମାରାତ୍ମକ କରୋନା ଭାଇରସ୍ ବିପଦ କ୍ରୀଡ଼ା ଜଗତ ଉପରେ ପ୍ରଭାବ ପକାଇବାରେ ଲାଗିଛି। ଏଥିପାଇଁ ଅନେକ ଟୁର୍ନାମେଣ୍ଟ ବାତିଲ ହୋଇଥିବାବେଳେ ଆଉ କେତେକ ପ୍ରତିଯୋଗିତାକୁ ସ୍ଥଗିତ ରଖିବା ପ୍ରକ୍ରିୟା ଆରମ୍ଭ ହୋଇଛି। ଆଥଲେଟ୍ଙ୍କ ପାଇଁ ସ୍ବତନ୍ତ୍ର ଗାଇଡ୍ଲାଇନ୍ ଜାରି ହୋଇଛି। ଏହି କ୍ରମରେ ଚଳିତମାସ ୨୬ ତାରିଖରେ ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ହେବାକୁଥିବା ଭାରତ-କାତାର ଫିଫା ବିଶ୍ୱକପ ଯୋଗ୍ୟତା ପର୍ଯ୍ୟାୟ ମ୍ୟାଚ ସ୍ଥଗିତ ରହିବା ସମ୍ଭାବନା ବଢ଼ି ଯାଇଛି। ବିଶ୍ୱ ଫୁଟ୍ବଲ ପରିଚାଳନା ସଂସ୍ଥା ଫିଫା ପକ୍ଷରୁ ଗୁରୁବାର ପ୍ରତିଷେଧକମୂଳକ ବ୍ୟବସ୍ଥା ସ୍ବରୂପ ୨୦୨୨ ବିଶ୍ୱକପ୍ ଏବଂ ୨୦୨୩ ଏସିଆନ କପ୍ ପାଇଁ ଆଗକୁ ଖେଳାଯିବାକୁ ଥିବା ସମସ୍ତ କ୍ୱାଲିଫାୟର୍ସ ମ୍ୟାଚକୁ ସ୍ଥଗିତ ରଖିବା ଲାଗି ପ୍ରସ୍ତାବ ଦିଆ ଯାଇଛି। ତନ୍ମଧ୍ୟରେ କାତାର ବିପକ୍ଷରେ ଭାରତ ଖେଳିବାକୁଥିବା ହୋମ୍ ଗେମ୍ (କଳିଙ୍ଗ ଷ୍ଟାଡିୟମ) ରହିଛି। ବିଶ୍ୱ ଫୁଟ୍ବଲ ପରିଚାଳନା ପରିଷଦର ମୁଖ୍ୟ କାର୍ଯ୍ୟାଳୟରେ ଫିଫା ଏବଂ ଏସିଆନ ଫୁଟ୍ବଲ କନଫେଡେରେଶନ (ଏଏଫ୍ସି) ମଧ୍ୟରେ ଏକ ବୈଠକ ବସିଥିଲା। ଏଥିରେ ଏସିଆରେ ଫୁଟ୍ବଲ କାର୍ଯ୍ୟକଳାପକୁ ନେଇ ଆଲୋଚନା ହୋଇଥିଲା। କ୍ୱାଲିଫାୟର୍ସ ମ୍ୟାଚ ସ୍ଥଗିତ ରଖିବା ପାଇଁ ଫିଫା ପକ୍ଷରୁ ପ୍ରସ୍ତାବ ଦିଆ ଯାଇଥିବାରୁ ଏହା ଶତପ୍ରତିଶତ କାର୍ଯ୍ୟକାରୀ ହେବା ସମ୍ଭାବନା ରହିଛି।
ଫୁଟ୍ବଲ ସହିତ ସମ୍ପୃକ୍ତଥିବା ସମସ୍ତ ବ୍ୟକ୍ତିଙ୍କ ସ୍ବାସ୍ଥ୍ୟାବସ୍ଥାକୁ ଉଭୟ ଫିଫା ଓ ଏଏଫ୍ସି ଗୁରୁତ୍ୱ ଦିଅନ୍ତି ବୋଲି ଫିଫା ତରଫରୁ ପ୍ରକାଶିତ ଏକ ଇସ୍ତାହାରରେ କୁହାଯାଇଛି। ଆଗକୁଥିବା କ୍ୱାଲିଫାଇଂ ମ୍ୟାଚଗୁଡ଼ିକୁ ସ୍ଥଗିତ ରଖିବା ଲାଗି ନେଇ ସମ୍ପୃକ୍ତ ସଦସ୍ୟ ଆସୋସିଏଶନ ଗୁଡ଼ିକର ମତାମତ ଲୋଡାଯାଇଛି। ଏପର୍ଯ୍ୟନ୍ତ ଗୋଟିଏ ହେଲେ ମ୍ୟାଚ ଜିତିପାରି ନ ଥିବାରୁ ଭାରତ ଯଦିଓ ବିଶ୍ୱକପ୍ ଦୌଡ଼ରେ ନାହିଁ ତେବେ କ୍ୱାଲିଫାଇଙ୍ଗ ଟୁର୍ନାମେଣ୍ଟରେ ମାର୍ଚ୍ଚ ୨୬ରେ ଭୁବନେଶ୍ୱରରେ କାତାରକୁ ଭେଟିବା କାର୍ଯ୍ୟକ୍ରମ ରହିଛି। ଦଳ ପରେ ଜୁନ୍ରେ ବାଂଲାଦେଶ ଏବଂ ଆଫଗାନିସ୍ତାନ ସହ ମୁକାବିଲା କରିବ। ସୂଚନାଯୋଗ୍ୟ, ଓମାନ ବିପକ୍ଷରେ ଭାରତ ଏହାର ପ୍ରଥମ ବିଶ୍ୱକପ୍ କ୍ୱାଲିଫାଇଙ୍ଗ ମ୍ୟାଚ ହାରିଯାଇଥିଲା। କିନ୍ତୁ ଦେଶ ବାହାରେ ଏସିଆନ ଚାମ୍ପିୟନ କାତାର ବିପକ୍ଷ ମ୍ୟାଚ ଗୋଲ ଶୂନ୍ୟ ଡ୍ର ରଖି ସମ୍ଭାବନା ଉଜ୍ଜୀବିତ ରଖିଥିଲା। ପରେ ଦଳ ବାଂଲାଦେଶ ଓ ଆଫଗାନିସ୍ତାନ ବିପକ୍ଷ ମ୍ୟାଚ ଶେଷ ମୁହୂର୍ତ୍ତରେ ଡ୍ର ରଖିଥିଲା। ବିଦେଶରେ ଓମାନ ବିପକ୍ଷ ମ୍ୟାଚ ୧-୦ ଗୋଲରେ ପରାଜିତ ହେବା ଦ୍ୱାରା ଭାରତ ବିଶ୍ୱକପ୍ ଯୋଗ୍ୟତା ହାସଲ ଦୌଡ଼ରୁ ବାଦ୍ ପଡ଼ିଥିଲା। ଦଳ ବର୍ତ୍ତମାନ ୨୦୨୩ ଏସିଆ କପ୍ ପାଇଁ ଯୋଗ୍ୟତା ହାସଲ କରିବାକୁ ଚାହୁଛି। ଉକ୍ତ ବୈଠକରେ ଆହୁରି ମଧ୍ୟ କୋରିଆ ରିପବ୍ଲିକ ଏବଂ ଚାଇନା ମଧ୍ୟରେ ଖେଳାଯିବାକୁଥିବା ମହିଳା ଅଲିମ୍ପିକ ପ୍ଲେ-ଅଫ୍ ଏବଂ ୨୦୨୦ରେ ତୁର୍କମେନିସ୍ତାନରେ ହେବାକୁଥିବା ଏଏଫ୍ସି ଫୁଟ୍ସାଲ ଚାମ୍ପିୟନଶିପ୍ ସମ୍ପର୍କରେ ଆଲୋଚନା ହୋଇଥିଲା।