ନୂଆଦିଲ୍ଲୀ,୧।୬: କେନ୍ଦ୍ର ସରକାର ବର୍ତ୍ତମାନ ଆତ୍ମନିର୍ଭର ଭାରତ ଯୋଜନା ଉପରେ ଗୁରୁତ୍ୱ ଦେଇଛନ୍ତି। ଚଳିତ ଦଶନ୍ଧିରେ ଦେଶକୁ ଏକ ନୂଆ ଉପଲବ୍ଧି ପ୍ରଦାନ କରିବା ସହ ନୂଆ ସୋପାନକୁ ନେବାକୁ ଲକ୍ଷ୍ୟ ରଖାଯାଇଛି। ଏହି ଯୋଜନାରେ ଯେଉଁ ସାମଗ୍ରୀ ଭାରତରେ ପ୍ରସ୍ତୁତ ହେଉଛି ତାକୁ ଦେଶ ମଧ୍ୟରେ ବ୍ୟବହାର କରିବାକୁ ଗୁରୁତ୍ୱ ଦିଆଯିବ। ଅର୍ଥାତ୍ ଭାରତରେ ତିଆରି ହେଉଥିବା ସାମଗ୍ରୀଗୁଡ଼ିକୁ ଆମଦାନୀ ଉପରେ କଟକଣା ଲାଗିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରେଡିଓ କାର୍ଯ୍ୟକ୍ରମ ‘ମନ୍ କି ବାତ୍’ରେ ଏ ସମ୍ପର୍କରେ ଆଭାସ ଦେଇଛନ୍ତି। ଗ୍ରାମାଞ୍ଚଳରେ କ୍ଷୁଦ୍ରଶିଳ୍ପ ଏବଂ କୁଟୀରଶିଳ୍ପ ସ୍ଥାପନ ଦ୍ୱାରା ଲୋକଙ୍କୁ ନିଯୁକ୍ତି ଯୋଗାଣ କରିବା ଦିଗରେ ମଧ୍ୟ ସରକାର ଫୋକସ୍ କରୁଛନ୍ତି।
ଏହି ଅବସରରେ ମୋଦି କହିଛନ୍ତି ଯେ, ଶୀଘ୍ର ଜାତୀୟ ପ୍ରବାସୀ କମିଶନ ସ୍ଥାପନ କରାଯିବ। ଏଭଳି କାର୍ଯ୍ୟକ୍ରମ ଦ୍ୱାରା ଶ୍ରମିକଙ୍କ ଦକ୍ଷତାକୁ ଉନ୍ନତୀକରଣ କରାଯିବ। ଯେଉଁ ସାମଗ୍ରୀ ଭାରତରେ ନାହିଁ କେବଳ ତା’ର ଆମଦାନୀ ଉପରେ ନଜର ରଖାଯିବ। ମାତ୍ର ଯାହା ଦେଶ ମଧ୍ୟରେ ପ୍ରସ୍ତୁତ ହେଉଛି ବିଦେଶୀ ସାମଗ୍ରୀର ବିକଳ୍ପ ଭାବେ ତାକୁ ବ୍ୟବହାର କରିବା ଲାଗି ସେ ଦେଶବାସୀଙ୍କୁ ନିବେଦନ କରିଛନ୍ତି। ଆତ୍ମନିର୍ଭର ଭାରତ କାର୍ଯ୍ୟକ୍ରମରେ ଯୁବବର୍ଗ ଏକ ପ୍ରମୁଖ ସ୍ଥାନ ହାସଲ କରିବେ। ସ୍ଥାନୀୟ ଉତ୍ପାଦିତ ସାମଗ୍ରୀକୁ ପ୍ରୋତ୍ସାହିତ କରିବା ସହ ‘ଭୋକାଲ ଫର୍ ଲୋକାଲ’ ଏବଂ ମେକ୍ ଇନ୍ ଇଣ୍ଡିଆକୁ ସମର୍ଥନ ଜଣାଇପାରିବେ। ଏଭଳି ଛୋଟ ଛୋଟ ପଦକ୍ଷେପ ଭାରତକୁ ଆତ୍ମନିର୍ଭର କରାଇବାରେ ସହାୟକ ହେବ ବୋଲି ସେ ମତପ୍ରକାଶ କରିଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ, ଦେଶର ପୂର୍ବାଞ୍ଚଳ ରାଜ୍ୟଗୁଡ଼ିକର ବିକାଶ ହେଲେ ସେମାନେ ଅଭିବୃଦ୍ଧି ଇଞ୍ଜିନ ଭାବେ ଯୋଗଦାନ ରଖିବେ। ସେ ଆୟୁଷ୍ମାନ ଭାରତ କାର୍ଯ୍ୟକ୍ରମର ସଫଳତାକୁ ନେଇ ବେଶ୍ ଖୁସି ବ୍ୟକ୍ତ କରିଛନ୍ତି। ଏହି ଯୋଜନା ଦ୍ୱାରା ବର୍ତ୍ତମାନ ସୁଦ୍ଧା ୧ କୋଟି ଲୋକଙ୍କୁ ସ୍ବାସ୍ଥ୍ୟସେବା ଉପଲବ୍ଧ କରାଯାଇଛି। ଏହା ଦ୍ୱାରା ଗରିବ ଲୋକଙ୍କୁ ୧୪ ହଜାର କୋଟି ଟଙ୍କାର ସଞ୍ଚୟ ହୋଇପାରିଛି। ମୋଟ ୧କୋଟି ଲୋକଙ୍କ ମଧ୍ୟରୁ ପ୍ରାୟ ୮୦ ଗ୍ରାମାଞ୍ଚଳର ଲୋକ ଏହି ଯୋଜନା ଦ୍ୱାରା ଲାଭବାନ ହୋଇଥିବା ମୋଦି ସ୍ପଷ୍ଟ କରିଛନ୍ତି।