ତାଳଚେର,୧୧ା୯(ନି.ପ୍ର.)-ରେଳ ସୁରକ୍ଷାବଳ (ଆର୍ପିଏଫ୍) ଆଇ.ଜି. ରାଜାରାମ ମଙ୍ଗଳବାର ଦିନିକିଆ ତାଳଚେର ଗସ୍ତରେ ଆସି ଫେରି ଯାଇଛନ୍ତି। ସେ ଆର୍ପିଏଫ୍ ଅଫିସ ପରିଦର୍ଶନ ସହ ପ୍ଲାଟଫର୍ମ, ଟ୍ରେନ୍ ଯୋଗେ ହେଉଥିବା କୋଇଲା ପରିବହନ ଟ୍ରାକ୍ ବୁଲି ଦେଖିଥିଲେ। ଏହି ଅବସରରେ ସେ ଖବରଦାତାମାନଙ୍କୁ କହିଥିଲେ ଯେ, ଦାୟିତ୍ୱ ଗ୍ରହଣ ପରେ ସେ ବିଭିନ୍ନ ଆର୍ପିଏଫ୍ ଅଫିସ ବୁଲି ପରିସ୍ଥିତି ଅନୁଧ୍ୟାନ କରୁଛନ୍ତି। ରେଳଯାତ୍ରାକୁ ଅପରାଧ ମୁକ୍ତ କରିବା ତାଙ୍କର ମୁଖ୍ୟ ଉଦ୍ଦେଶ୍ୟ। ମହିଳା, ଶିଶୁଙ୍କ ସୁରକ୍ଷା, ବରିଷ୍ଠ ନାଗରିକ, ଦିବ୍ୟାଙ୍ଗମାନଙ୍କୁ ସହାୟତା ପ୍ରଦାନ ଦିଗରେ ବିଭାଗ ଗୁରୁତ୍ୱ ଦେଇ ଆସିଛି। ୧୮୨ ହେଲପ୍ ଲାଇନର କେତେ ଉପଯୋଗିତା ହେଉଛି ସେ ସମ୍ପର୍କରେ ମଧ୍ୟ ଅନୁଧ୍ୟାନ କରିଛନ୍ତି। ରେଳ ସମ୍ପତି ଚୋରି ନ ହେବା, ଅପରାଧୀଙ୍କୁ ଧରି ଦଣ୍ଡବିଧାନ କରାଯିବା, ଯାତ୍ରୀ ସୁରକ୍ଷା, ରେଳରୁ ସାମଗ୍ରୀ ଚୋରି ରୋକିବା ଦିଗରେ ଅଧିକ ପ୍ରଧାନ୍ୟ ଦିଆଯିବ ବୋଲି ସେ ପ୍ରକାଶ କରିଥିଲେ। ଖୁବ୍ଶୀଘ୍ର ଇଷ୍ଟକୋଷ୍ଟର ସମସ୍ତ ଷ୍ଟେଶନରେ ସିସି କ୍ୟାମେରା ସ୍ଥାପନ କରାଯିବାର ଯୋଜନା ରହିଛି ବୋଲି ସୂଚନା ସେ ଦେଇଥିଲେ। ଅପରାଧ ନିୟନ୍ତ୍ରଣ କ୍ଷେତ୍ରରେ ସେ ରେଳଯାତ୍ରୀ, ଖବରଦାତା, ବୁଦ୍ଧିଜୀବୀ, ସ୍ଥାନୀୟ ଅଞ୍ଚଳବାସୀଙ୍କ ସହଯୋଗ କାମନା କରିଥିଲେ। ଡିଏସ୍ସି ପି. ଶଙ୍କର କୁଟି, ଏଏସ୍ସି ଏସ.କେ. ପାଢୀ, ଇନ୍ସପେକ୍ଟର ଭି.ଆର. ସିଂହ, ମିନାକ୍ଷୀ ମହାପାତ୍ର, ସବ୍ଇନ୍ସପେକ୍ଟର ବାବୁଲି ବେହେରା, ପି.ଏନ. ଦାସ ଓ ଅନ୍ୟ କର୍ମଚାରୀ, ଅଧିକାରୀମାନେ ଉପସ୍ଥିତ ଥିଲେ।
