ନୂଆଦିଲ୍ଲୀ, ୨୩ା୬: ସୀମାନ୍ତ ଅଞ୍ଚଳର ସ୍ଥିତି ଅନୁଧ୍ୟାନ କରିବା ଲାଗି ସେନାଧ୍ୟକ୍ଷ ମନୋଜ ମୁକୁନ୍ଦ ନରଓ୍ବଣେ ଚଳିତ ସପ୍ତାହରେ ଲେହ ଏବଂ କଶ୍ମୀର ଗସ୍ତ କରିବେ। ଲଦାଖର ଗଲଓ୍ବାନ ଉପତ୍ୟକାରେ ଭାରତ- ଚାଇନା ସେନା ମଧ୍ୟରେ ରକ୍ତାକ୍ତ ସଂଘର୍ଷ ଓ ୨୦ ଯବାନ ଶହୀଦ ହେବା ପରେ ଏବେ ସ୍ଥିତି ଜଟିଳ ରହିଛି। ଏଲ୍ଏସି, ଏଲ୍ଓସିକୁ ଲାଗି ରହିଥିବା ବିଭିନ୍ନ ସୀମାଞ୍ଚଳର ଅନୁଧ୍ୟାନ କରିବା ଲାଗି ନରଓ୍ବଣେ ସେଠାକୁ ଗସ୍ତକରି ସେନା ପ୍ରସ୍ତୁତିର ସମୀକ୍ଷା କରିବେ। ଜୁନ୍ ୧୫ରେ ରକ୍ତାକ୍ତ ସଂଘର୍ଷ ପରେ ସୀମା ବିବାଦର ସମାଧାନ ଲାଗି ୨ ଥର ସେନା ଅଧିକାରୀସ୍ତରୀୟ ଆଲୋଚନା ହୋଇ ସାରିଲାଣି। ତଥାପି ଲଦାଖ ଓ ପଙ୍ଗୋଙ୍ଗ ଅଞ୍ଚଳରେ ପରିସ୍ଥିତି ସୁଧୁରି ନାହିଁ। ଛକାପଞ୍ଝା ଅବସ୍ଥା ଲାଗି ରହିଛି। ଭାରତୀୟ ଅଞ୍ଚଳକୁ କବ୍ଜାକରିବା ଲାଗି ଚାଇନା ପ୍ରୟାସ ଜାରି ରଖିଛି। ଦୀର୍ଘଦିନ ଧରି କ୍ୟାମ୍ପକରି ସେନା ଠୁଳ କରିବାରେ ଲାଗିଛି। ଫିଙ୍ଗର ୪ରୁ ଫିଙ୍ଗର ୮ ମଧ୍ୟରେ ଚାଇନା ପ୍ରତିରକ୍ଷା ସ୍ଥିତି ସୁଦୃଢ଼ କରିଛି। ଏହାର ଜବାବରେ ଭାରତ ଡେମ୍ଚୋକ,କୋୟୁଲ,ଫକ୍ଚେ, ଡେପ୍ସାଙ୍ଗ, ମୁର୍ଗୋ ଓ ଗଲଓ୍ବାନ୍କୁ ଅଧିକ ସେନା ପଠାଇଛି। ଚାଇନା ସେନାକୁ ମୁହଁତୋଡ୍ ଜବାବ ଲାଗି ଲଦାଖ ସୀମାର ୮୨୬ କି.ମି. ସୀମାରେ ଭାରତ ବ୍ୟାପକ ପ୍ରସ୍ତୁତି ଆରମ୍ଭ କରିଛି।
