ଭୁବନେଶ୍ୱର,୨୧।୫(ବ୍ୟୁରୋ)- ଦିନକ ପରେ ସାଧାରଣ ନିର୍ବାଚନ ଫଳାଫଳ ପ୍ରକାଶ ପାଇବାକୁ ଯାଉଛି। ଅଧିକାଂଶ ଏକଜିଟ୍ ପୋଲ ଏନ୍ଡିଏ ସପକ୍ଷରେ ମତ ଦେଇଛନ୍ତି। କେତେକ ଏକ୍ଜିଟ୍ ପୋଲ ଏନ୍ଡିଏ ସଂଖ୍ୟା ଗରିଷ୍ଠତାରୁ ସାମନ୍ୟ କମ୍ ଆସନ ପାଇବ ବୋଲି ଆକଳନ କରିଛନ୍ତି। ଏହି ପରିସ୍ଥିତିରେ କେତେକ ଆଞ୍ଚଳିକ ଦଳ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିପାରନ୍ତି। ତେଣୁ ଓଡ଼ିଶାର ବିଜେଡି, ତେଲେଙ୍ଗାନାର ଟିଆରଏସ୍ ଏବଂ ଆନ୍ଧ୍ର ପ୍ରଦେଶର ଟିଡିପି ଉପରେ ସମସ୍ତଙ୍କ ନଜର ରହିଛି। ବିଜେଡି କାହା ସପକ୍ଷରେ ଯିବ, ସେ ନେଇ ମଧ୍ୟ କୌଣସି ସ୍ପଷ୍ଟ ସଙ୍କେତ ଦେଇନାହିଁ। ୨୩ ଫଳାଫଳ ପରେ ଦଳ ନିଷ୍ପତ୍ତି ନେବ ବୋଲି ମୁଖପାତ୍ର ପ୍ରତାପ ଦେବ କହିଛନ୍ତି।
ପ୍ରତାପ କହିଛନ୍ତି ଯେ, ବିଜେଡି ଆଞ୍ଚଳିକ ଦଳ ହୋଇଥିବାରୁ କେନ୍ଦ୍ରରେ ସରକାର କରିବ ନାହିଁ। ୟୁପିଏ କିମ୍ବା ଏନ୍ଡିଏ ସରକାର କରିବେ। ତେଣୁ ଆମେ କାହା ପାଖକୁ ଦୌଡି ଯାଉନୁ। ଯାହାର ଦରକାର ହେବ, ସେ ଆମ ପାଖକୁ ଆସିବ। ଦେଶର ରାଜନୈତିକ ପରିସ୍ଥିତି ଉପରେ ବିଜେଡି ନଜର ରଖିଛି। ଦଳର ଶୀର୍ଷ ନେତୃତ୍ୱ ବିଭିନ୍ନ ଦିଗ ନେଇ ବିଚାର କରୁଛନ୍ତି, ତେଣୁ ସ୍ଥିତି ଦେଖି ବିଜେଡି ନିଷ୍ପତ୍ତି ନେବ ବୋଲି ପ୍ରତାପଦେବ କହିଛନ୍ତି।