ପୁରୀ ଅଫିସ,୧ା୬:ଆସନ୍ତା ୩୦ ତାରିଖ ପର୍ଯ୍ୟନ୍ତ ଧାର୍ମିକ ପୀଠକୁ ଭକ୍ତମାନେ ଯାଇପାରିବେ ନାହିଁ। କୌଣସି ଧାର୍ମିକ ସମାବେଶ ହୋଇପାରିବ ନାହିଁ। ରାଜ୍ୟ ସରକାରଙ୍କ ଏଭଳି ନୂଆ ଗାଇଡ୍ଲାଇନ ପରେ ୩ ତାରିଖରେ ଶ୍ରୀମନ୍ଦିରରେ ପାଳନ ହେବାକୁ ଥିବା ଚମ୍ପକ ଦ୍ୱାଦଶୀ ନୀତିକୁ ନେଇ ଚିନ୍ତା ବଢିଛି। ଚମ୍ପକ ଦ୍ୱାଦଶୀ ନୀତିରେ ଠାକୁର ବାହାରକୁ ବିଜେ କରିଥାନ୍ତି। ହେଲେ ଏଥର କିପରି ଏହା କରାଯିବ ସେ ନେଇ ଜଗଦ୍ଗୁରୁ ଶଙ୍କରାଚାର୍ଯ୍ୟଙ୍କ ପରାମର୍ଶ ଲୋଡ଼ିିଛି ଶ୍ରୀମନ୍ଦିର ପ୍ରଶାସନ। ସୋମବାର ସନ୍ଧ୍ୟାରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. କ୍ରିଷନ କୁମାର, ଜିଲାପାଳ ବଲୱନ୍ତ ସିଂ, ଏସ୍ପି ଉମାଶଙ୍କର ଦାଶଙ୍କ ସମେତ ପରିଚାଳନା କମିଟି ସଦସ୍ୟମାନେ ଗୋବର୍ଦ୍ଧନ ମଠକୁ ଯାଇ ଗୁରୁଜୀଙ୍କ ମାର୍ଗଦର୍ଶନ ଲୋଡ଼ିିଛନ୍ତି। ସ୍ନାନଯାତ୍ରା ସଂକ୍ରାନ୍ତରେ ମଧ୍ୟ ଆଲୋଚନା କରିଛନ୍ତି। ଚମ୍ପକ ଦ୍ୱାଦଶୀକୁ ନେଇ ଚୂଡ଼ାନ୍ତ ନିଷ୍ପତ୍ତି ହୋଇ ନାହିଁ। ଚନ୍ଦନଯାତ୍ରା ଭଳି ଏହା ଶ୍ରୀମନ୍ଦିର ଭିତରେ ହୋଇପାରେ ବୋଲି ଶୁଣିବାକୁ ମିଳୁଛି।
ଚମ୍ପକ ଦ୍ୱାଦଶୀ ନୀତିରେ ବରକନ୍ୟା ମଦନମୋହନ ଓ ଶ୍ରୀଦେବୀ (ରୁକ୍ମିଣୀ) ବିମାନରେ ଶ୍ରୀନଅରକୁ ବିଜେ କରନ୍ତି। ସେଠାରେ ନୀତି ସମ୍ପନ୍ନ ହେବା ପରେ ଯମେଶ୍ୱରଙ୍କ ମନ୍ଦିରକୁ ଯାଆନ୍ତି। ପଞ୍ଚୁଗ୍ରାସୀ ନୀତି ସରିବା ପରେ ବରକନ୍ୟା ଶ୍ରୀମନ୍ଦିରକୁ ବାହୁଡ଼ା ବିଜେ କରନ୍ତି। ଅନ୍ୟପକ୍ଷରେ ରାଜ୍ୟ ସରକାରଙ୍କ ନୂତନ ଗାଇଡଲାଇନ ତଥା କଟକଣା ଜାରି ଯୋଗୁ ଏହି ନୀତି ହେବା ନେଇ ଆଶଙ୍କା ଦେଖାଦେଇଛି। ଶଙ୍କରାଚାର୍ଯ୍ୟ ସବୁ ଶୁଣିବା ପରେ ଠାକୁରଙ୍କ ବିଧି ପରମ୍ପରା ରକ୍ଷା ସହ ବିକଳ୍ପ ବ୍ୟବସ୍ଥା କରାଯିବା ଉଚିତ ବୋଲି ପରାମର୍ଶ ଦେଇଛନ୍ତି। ତେବେ ବିକଳ୍ପର ରୂପରେଖ ଖୁବ୍ଶୀଘ୍ର ସ୍ପଷ୍ଟ ହେବ। ଏ ସମ୍ପର୍କରେ ମୁଖ୍ୟ ପ୍ରଶାସକ କହିଛନ୍ତି, ସ୍ନାନପୂର୍ଣ୍ଣିମାକୁ ନେଇ ପରିଚାଳନା କମିଟିରେ ଯାହାସବୁ ନିଷ୍ପତ୍ତି ହୋଇଥିଲା ସେ ବିଷୟରେ ଶଙ୍କରାଚାର୍ଯ୍ୟଙ୍କୁ ଅବଗତ କରାଇଛୁ। ମହାପ୍ରଭୁଙ୍କ ଦର୍ଶନ ପାଇଁ ଗୁରୁଜୀଙ୍କୁ ମଧ୍ୟ ନିମନ୍ତ୍ରଣ କରିଛୁ। ଏତଦ୍ବ୍ୟତୀତ ଚମ୍ପକ ଦ୍ୱାଦଶୀ ନୀତି ପାଇଁ ଗୁରୁଜୀଙ୍କ ମାର୍ଗଦର୍ଶନ ଲୋଡିଛୁ। ଚମ୍ପକ ଦ୍ୱାଦଶୀ ନୀତି ସହ ଯେଉଁ ପ୍ରମୁଖ ସେବାୟତ ନିଯୋଗ ସମ୍ପୃକ୍ତ ଅଛନ୍ତି ସେମାନଙ୍କ ସହ ଆଲୋଚନା କରାଯାଇ ଚୂଡ଼ାନ୍ତ ନିଷ୍ପତ୍ତି ନିଆଯିବ।