ସିଂହାସନ ଆସନର ନାମ ଅନୁସାରେ ଏହାକୁ ସେଭଳି କରିବାକୁ ମଧ୍ୟ ପଡିଥାଏ। ଏହି ଆସନରେ ସିଂହ ଭଳି ବସିବାକୁ ପଡିଥାଏ। ସିଂହାସନ କରିବା ଦ୍ୱାରା ଆଖି,ମୁହଁ ଓ ବେକର ବ୍ୟାୟାମ ହୋଇଥାଏ। ଏହାଦ୍ୱାରା ଶରୀର ଭିତରକୁ ପର୍ଯ୍ୟାପ୍ତ ପରିମାଣରେ ଅମ୍ଳଜାନ ଯିବା ସହ ରକ୍ତ ସଞ୍ଚାଳନ ଭଲଭାବେ ହୋଇଥାଏ। ପ୍ରତିଦିନ ସକାଳୁ ଅବା ସପ୍ତାହରେ ୨-୩ ଥର ୧୫ ମିନିଟ୍ ଏହି ଆସନ କରିବା ଫଳରେ ସ୍ନାୟୁରୋଗ ଦୂର ହୋଇଥାଏ। ଏହି ଆସନ କଲେ ମାନସିକ ଚାପ ହ୍ରାସ ପାଇଥାଏ। ସିଂହାସନ କରିବା ଲାଗି ପ୍ରଥମେ ଦୁଇ ଗୋଡକୁ ଆଣ୍ଠୁପାଖରୁ ଅଧାଭାଙ୍ଗି ଏକାଠି କରାଯାଇଥାଏ। ଏହାଉପରେ ବସିବାକୁ ହୋଇଥାଏ। ଡାହାଣ ହାତକୁ ଡାହାଣ ଆଣ୍ଠୁ ଓ ବାମ ହାତକୁ ବାମ ଆଣ୍ଠୁରେ ରଖି ପାଟିବାଟେ ଧୀରେ ଧୀରେ ନିଶ୍ୱାସ ଛାଡିବାକୁ ହୋଇଥାଏ। ଏହାପରେ ପାଟି ଖୋଲି ଜିଭ ବାହାରକୁ କରି ବାରମ୍ବାର ନିଶ୍ୱାସ ପ୍ରଶ୍ୱାସ ନେବାକୁ ହୋଇଥାଏ। ଥରକେ ଏଭଳି ୫-୬ ଥର କଲେ ସୁଫଳ ମିଳେ। ଏହି ସମୟରେ ମେରୁଦଣ୍ଡକୁ ସିଧା ରଖିବା ଆବଶ୍ୟକ। ଏହି ଆସନ ଦ୍ୱାରା ମେରୁଦଣ୍ଡ ହାଡ ମଧ୍ୟ ମଜବୁତ ହୋଇଥାଏ।