ପୁରୀ ଅଫିସ,୧୨ା୧୧: ସରିଯାଇଛି ଧର୍ମ ମାସ କାର୍ତ୍ତିକ। ଏହି ପୁଣ୍ୟ ମାସର ପୂର୍ଣ୍ଣମୀ ତିଥିରେ ଶ୍ରୀକ୍ଷେତ୍ରର ବିଭିନ୍ନ ତୀର୍ଥ ପୁଷ୍କରିଣୀ ଓ ପବିତ୍ର ମହୋଦଧିରେ ଡଙ୍ଗା ଭସାଇଛନ୍ତି ଲକ୍ଷାଧିକ ଶ୍ରଦ୍ଧାଳୁ। ଏମାନଙ୍କ ମଧ୍ୟରେ ରହିଥିଲେ ହଜାର ହଜାର ହବିଷିଆଳି, ଯେଉଁମାନେ ମହାପ୍ରଭୁଙ୍କୁ ଦର୍ଶନ କରି ସେମାନଙ୍କ ବ୍ରତ ଶେଷ କରିଛନ୍ତି। ଏକମାସ ଧରି ପୁରୀର ବିଭିନ୍ନ ମଠ, ଧର୍ମଶାଳା ଏବଂ ସରକାରୀ ଆଶ୍ରୟସ୍ଥଳୀରେ ରହି କାର୍ତ୍ତିକ ବ୍ରତ ପାଳିଥିବା ହବିଷିଆଳି ଏବେ ଘରକୁ ଫେରିଯାଇଛନ୍ତି । ସେମାନଙ୍କୁ ସାଥୀରେ ନେବା ଲାଗି ମଙ୍ଗଳବାର ଦିନତମାମ୍ ତିନୋଟି ଆଶ୍ରୟସ୍ଥଳୀ (ରେଲୱେ ଟୁରିଷ୍ଟ କମ୍ପ୍ଲେକ୍ସ, ନରେନ୍ଦ୍ରକୋଣ ସ୍ଥାୟୀ ହବିଷିଆଳି କୋଠା ଏବଂ ପୌରସଂସ୍ଥା କଲ୍ୟାଣ ମଣ୍ଡପ) ସମ୍ମୁଖରେ ଲାଗିଥିଲା ସମ୍ପର୍କୀୟଙ୍କ ଭିଡ଼।
ଶ୍ରୀକ୍ଷେତ୍ରରେ ଏହି ମାସକ ରହଣି ମଧ୍ୟରେ ଅନେକ ଅଚିହ୍ନା ମୁହଁକୁ ଆପଣାଇ ନେଇଥିଲେ ବହୁ ହବିଷିଆଳି। ସଞ୍ଜ, ସକାଳେ ଯାହାଙ୍କ ସହ ମିଶି ଚଉରା ମୂଳେ ରାଇଦାମୋଦର ପୂଜା କରୁଥିଲେ, ଏକାଠି ମହାପ୍ରସାଦ ସେବନ କରୁଥିଲେ ଆଉ ସୁଖଦୁଃଖ ବାଣ୍ଟୁଥିଲେ ସେମାନଙ୍କଠାରୁ ବିଦାୟ ନେବାର ମୁହୂର୍ତ୍ତ ଥିଲା କଷ୍ଟଦାୟକ, ଯାହାକି ଆଶ୍ରୟସ୍ଥଳୀଗୁଡ଼ିକୁ ଦେଖିଲେ ଏହା ବାରି ହୋଇପଡୁଥିଲା। ଘରକୁ ଫେରୁଥିବାବେଳେ ଅନେକଙ୍କ ଆଖିରୁ ଝରିପଡୁଥିଲା ସ୍ନେହର ଲୁହ। କିଏ କାହାକୁ କୋଳେଇ ନେଇ ଗାଲ ଥାପୁଡ଼ାଇ ଦେଉଥିଲେ ତ ଆଉ କିଏ କାଳିଆ ଚାହିଁଲେ ପୁଣି ଆରବରଷକୁ ଦେଖାହେବ କହି କାନ୍ଦି ପକାଉଥିଲେ। ଏହି ସ୍ନେହ ଓ ଆଦର କେବଳ ହବିଷିଆଳିଙ୍କ ମଧ୍ୟରେ ସୀମିତ ନ ଥିଲା, ଆଶ୍ରୟସ୍ଥଳ ଦାୟିତ୍ୱରେ ଥିବା ଅଧିକାରୀଙ୍କୁ ବି ଛୁଇଁ ଯାଇଥିଲା। ଦିନତମାମ୍ ଆଶ୍ରୟସ୍ଥଳୀଗୁଡ଼ିକ ସମ୍ମୁଖରେ ଏମିତି ଦୃଶ୍ୟ ଦେଖିବାକୁ ମିଳିଥିଲା। ୩ଟି ଆଶ୍ରୟସ୍ଥଳୀରେ ଥିବା ହବିଷିଆଳିଙ୍କ ମଧ୍ୟରୁ ମଙ୍ଗଳବାର ସନ୍ଧ୍ୟା ସୁଦ୍ଧା ଦେଢ ହଜାରରୁ ଊର୍ଦ୍ଧ୍ୱ ଘରକୁ ଫେରିଯାଇଥିବାବେଳେ ଅନ୍ୟମାନେ ବୁଧବାର ଯିବେ ବୋଲି ଜଣାପଡ଼ିଛି।
