ଭୁବନ, ୨୬।୭(ଡି.ଏନ.ଏ.)-ଭୁବନ ବସ୍ଷ୍ଟାଣ୍ଡରୁ ଶୁକ୍ରବାର ଅପରାହ୍ନ ୨ଟାରେ ବାଇକ୍ ଡିକି ଭାଙ୍ଗି ୨୯ ହଜାର ଟଙ୍କା ଏବଂ ଜରୁରୀ କାଗଜପତ୍ର ଲୁଟ୍ ହୋଇଛି। ଲୁଟ୍ର ଶିକାରଯ ହୋଇଛନ୍ତି ଭୂଷଳ ପଞ୍ଚାୟତ ଅସୁରବନ୍ଧପାଟଣା ଗ୍ରାମର ଲକ୍ଷ୍ମୀଧର ବେହେରା। ସ୍ପଷ୍ଟ ଦିବାଲୋକରେ ଜନଗହଳିପୂର୍ଣ୍ଣ ସ୍ଥାନରୁ ଏପରି ଲୁଟ୍ ହେବା ଅଞ୍ଚଳବାସୀଙ୍କ ମନରେ ଭୟସଞ୍ଚାର କରିଛି।
ଲକ୍ଷ୍ମୀଧରଙ୍କ ପୁଅ ରାକେଶ କିଡ୍ନୀ ରୋଗରେ ଆକ୍ରାନ୍ତ। ପୁଅର ଚିକିତ୍ସା ପାଇଁ ସହାୟତା ଯୋଗାଇ ଦେବାକୁ ସେ ଜନଶୁଣାଣି ଶିବିରରେ ଜିଲାପାଳଙ୍କ ଦ୍ୱାରସ୍ଥ ହୋଇଥିଲେ। ପ୍ରଶାସନଠାରୁ ପ୍ରତିଶ୍ରୁତି ପାଇବା ପରେ ଲକ୍ଷ୍ମୀଧର ପୁଅଙ୍କୁ କଟକ ଶିଶୁଭବନରେ ଚିକିତ୍ସା କରାଇବାକୁ ନିଷ୍ପତ୍ତି ନେଇଥିଲେ। ଇତିମଧ୍ୟରେ କେତେଜଣ ବଦାନ୍ୟ ବ୍ୟକ୍ତି ସହାୟତା ସ୍ବରୂପ ତାଙ୍କ ପଞ୍ଜାବ ନ୍ୟାଶନାଲ ବ୍ୟାଙ୍କ ଆକାଉଣ୍ଟଙ୍କୁ ଟଙ୍କା ପଠାଇଥିଲେ। ଅପରାହ୍ନରେ ୩୦ ହଜାର ଟଙ୍କା ଉଠାଇଥିଲେ ଲକ୍ଷ୍ମୀଧର। ୧ ହଜାର ଟଙ୍କା ପକେଟରେ ରଖି ବାକି ଟଙ୍କା ବାଇକ୍ ଡିକିରେ ରଖିଥିଲେ। ସ୍ତ୍ରୀଙ୍କ ସହ ନୂଆବଜାରରେ ଜଳଖିଆ ଖାଉଥିବା ସମୟରେ କେହିଜଣେ ଦୁର୍ବୃତ୍ତ ଡିକି ଭାଙ୍ଗି ଟଙ୍କା ଲୁଟି ନେଇଥିବା ସେ କହିଛନ୍ତି। ଲୁଟ୍ର ଶିକାର ହେବାପରେ ଲକ୍ଷ୍ମୀଧରଙ୍କୁ କାକୁତିମିନତି ହେଉଥିବା ଦେଖିବାକୁ ମିଳିଥିଲା। ଶେଷରେ ନିରୂପାୟ ହୋଇ ସେ ଭୁବନ ଥାନାରେ ଅଭିଯୋଗ କରିଛନ୍ତି। ପୋଲିସ ଘଟଣାର ତଦନ୍ତ ଆରମ୍ଭ କରିଛି।