ନୂଆଦିଲ୍ଲୀ, ୨୬ା୪ (ପି.ଟି.)-ଚିକିତ୍ସା ପାଇଁ ଏସିଆନ ଗେମ୍ସ ସ୍ବର୍ଣ୍ଣ ବିଜେତା ବକ୍ସର ଡିଙ୍ଗ୍କୋ ସିଂଙ୍କୁ ବିମାନ ଯୋଗେ ଇମ୍ଫାଲରୁ ଦିଲ୍ଲୀ ଅଣାଯାଇଛି। ସେ ଲିଭର କ୍ୟାନ୍ସରରେ ପୀଡ଼ିତ ଅଛନ୍ତି। ୪୧ ବର୍ଷୀୟ ଡିଙ୍ଗ୍କୋଙ୍କୁ ଦିଲ୍ଲୀ ନେବା ପାଇଁ ବକ୍ସି ଫେଡେରେଶନ ଅଫ୍ ଇଣ୍ଡିଆ (ବିଏଫ୍ଆଇ) ତରଫରୁ ଏକ ସ୍ପାଇସ୍ ଜେଟ୍ ଆମ୍ବୁଲାନ୍ସର ବ୍ୟବସ୍ଥା କରାଯାଇଥିଲା। କରୋନାଭାଇରସ୍ ପାଇଁ ଦେଶବ୍ୟାପୀ ଲକ୍ଡାଉନ୍ ଲାଗୁ କରାଯାଇଥିବାରୁ ରାଡିଏଶନ ଥେରାପି ନେବା ପାଇଁ ସେ ଦିଲ୍ଲୀ ଯାଇପାରୁ ନ ଥିଲେ। ବିଏଫ୍ଆଇ ସଭାପତି ଅଜୟ ସିଂ ସ୍ପାଇସ୍ଜେଟ୍ର ପରିଚାଳନା ନିର୍ଦ୍ଦେଶକ ମଧ୍ୟ ଅଟନ୍ତି। ତାଙ୍କର ବ୍ୟକ୍ତିଗତ ଉଦ୍ୟମ ଯୋଗୁ ଡିଙ୍ଗ୍କୋଙ୍କୁ ଦିଲ୍ଲୀ ନେବା ବ୍ୟବସ୍ଥା ସମ୍ଭବ ହୋଇଥିଲା। ଏସିଆନ ଗେମ୍ସ ସ୍ବର୍ଣ୍ଣ ବିଜେତା ଶନିବାର ସନ୍ଧ୍ୟାରେ ଏଠାରେ ପହଞ୍ଚତ୍ବା ମାତ୍ରେ ବିମାନ ବନ୍ଦରରୁ ତାଙ୍କୁ ଏକ ଆମ୍ବୁଲାନ୍ସ ଯୋଗେ ସିଧାସଳଖ ଇନ୍ଷ୍ଟିଚ୍ୟୁଟ୍ ଅଫ୍ ଲିଭର ଆଣ୍ଡ୍ ବିଲିଆରୀ ସାଇନ୍ସ (ଆଇଏଲ୍ବିଏସ୍)କୁ ନିଆଯାଇଥିଲା। ତାଙ୍କ ସହିତ ସ୍ତ୍ରୀ ଏନ୍ଗାନ୍ଗମ୍ ବାବାଇ ଦେବୀ ମଧ୍ୟ ଯାଇଛନ୍ତି। ଅର୍ଜୁନ ଓ ପଦ୍ମଶ୍ରୀ ପୁରସ୍କାର ବିଜେତା ଡିଙ୍ଗ୍କୋ ହେଉଛନ୍ତି ମଣିପୁର ରାଜ୍ୟ ବାସିନ୍ଦା। ସେ ଜଣେ ବ୍ୟାଣ୍ଟମଓ୍ବେଟ୍ ବକ୍ସର। ବ୍ୟାଙ୍କକ୍ରେ ଏସିଆନ ଗେମ୍ସର ୧୯୯୮ ସଂସ୍କରଣରେ ସେ ସ୍ବର୍ଣ୍ଣ ପଦକ ହାସଲ କରିଥିଲେ।