ନୂଆଦିଲ୍ଲୀ, ୧୫ା୫ (ପି.ଟି.)- ବ୍ୟାଟ୍ ପ୍ରସ୍ତୁତକାରୀ କମ୍ପାନୀ ସ୍ପାର୍ଟାନ ବିରୋଧରେ କ୍ରିକେଟ ଆଇକନ୍ ସଚିନ ତେନ୍ଦୁଲକର କରିଥିବା ମକଦ୍ଦମାର ଆପୋସ ସମାଧାନ କରିଛନ୍ତି। ଏହି ମାମଲା ଅଷ୍ଟ୍ରେଲିଆର ଫେଡେରାଲ କୋର୍ଟରେ ବିଚାର ଚାଲିଥିଲା। ଚୁକ୍ତି ଖିଲାପକାରୀ ସ୍ପାର୍ଟାନ କ୍ଷମା ପ୍ରାର୍ଥନା କରିବା ପରେ ମାମଲାର ଅନ୍ତ ଘଟିଥିଲା। ବିଶ୍ୱବ୍ୟାପୀ କ୍ରୀଡ଼ା ସାମଗ୍ରୀ ଓ କ୍ରୀଡ଼ା ପୋଷାକର ପ୍ରମୋଟ କରିବା ଉଦ୍ଦେଶ୍ୟରେ ୨୦୧୬ରେ ତେନ୍ଦୁଲକରଙ୍କ ସହ ସ୍ପାର୍ଟାନ ଏକ ଚୁକ୍ତି କରିଥିଲା। ତେନ୍ଦୁଲକରଙ୍କ ଅଭିଯୋଗ ଥିଲା ଉଭୟ ପକ୍ଷ ମଧ୍ୟରେ ସ୍ବାକ୍ଷରିତ ହୋଇଥିବା ରାଜିନାମାକୁ ସ୍ପାର୍ଟାନ କାର୍ଯ୍ୟକାରୀ କରୁନାହିଁ। ଚୁକ୍ତି ଅନୁସାରେ ଏହି କମ୍ପାନୀ ତାଙ୍କୁ ରୟାଲିଟି ଓ ଏଣ୍ଡୋର୍ସମେଣ୍ଟ ଫି’ ଦେଇ ନ ଥିଲା। ଚୁକ୍ତି ବାତିଲ ପରେ ମଧ୍ୟ ସ୍ପାର୍ଟାନ ତେନ୍ଦୁଲକରଙ୍କ ନାମ ଓ ଛବି ବ୍ୟବହାର କରୁଥିଲା। ମାମଲାର ଆପୋସ ସମାଧାନ ହୋଇଥିବାରୁ ସ୍ପାର୍ଟାନର ସିଓଓ ଲେସ୍ ଗାଲ୍ବ୍ରେଥ୍ ଏକ ମିଳିତ ପ୍ରେସ୍ ରିଲିଜରେ ତେନ୍ଦୁଲକରଙ୍କ ଧୈର୍ଯ୍ୟକୁ ନେଇ କୃତଜ୍ଞତା ଜ୍ଞାପନ କରିଥିଲା।