ମାଡ୍ରିଡ୍, ୬ା୫: ବିଶ୍ୱର ନମ୍ବରୱାନ ଟେନିସ ଖେଳାଳି ସର୍ବିୟାର ନୋଭାକ୍ ଜୋକୋଭିଚ୍ ସ୍ପେନରେ ଲକଡାଉନ୍ ନିୟମ ଭଙ୍ଗ କରିଛନ୍ତି। କରୋନା ଭାଇରସ ସଂକ୍ରମଣ କାରଣରୁ ସମ୍ପୂର୍ଣ୍ଣ ଦେଶ ଏବେ ଲକ୍ଡାଉନ୍ ଥିବାବେଳେ ଜୋକୋଭିଚ୍ ସୋମବାର ଟେନିସ କୋର୍ଟକୁ ଓହ୍ଲାଇ ଚର୍ଚ୍ଚାକୁ ଆସିଛନ୍ତି। ପେସାଦାର ଆଥଲେଟଙ୍କୁ ନିଜ କୋଚ୍ଙ୍କ ସହିତ ଟ୍ରେନିଂ ଆରମ୍ଭ କରିବାକୁ ସ୍ପେନ୍ରେ ଅନୁମତି ଦିଆଯାଇଛି। ତେବେ ଏହି ଦେଶରେ ଖେଳାଳିଙ୍କୁ ଖେଳ ଭିତ୍ତିଭୂମି ବ୍ୟବହାର ଉପରେ କଟକଣା ବଳବତ୍ତର ରହିଛି। ଆସନ୍ତା ସପ୍ତାହରୁ ପେସାଦାର ଲିଗ୍ର ଫୁଟବଲ ଖେଳାଳିଙ୍କୁ ଟ୍ରେନିଂ ସେଣ୍ଟର ବ୍ୟବହାର ପାଇଁ ଅନୁମତି ମିଳିବା ସମ୍ଭାବନା ରହିଛି। ରିପୋର୍ଟ ଅନୁସାରେ ଜୋକୋଭିଚ୍ ଲକଡାଉନ୍ ସମୟରେ ସ୍ପେନରେ ରହୁଛନ୍ତି। କଟକଣା ସତ୍ତ୍ବେ ସେ ବର୍ବେଲା ଉପକୂଳବର୍ତ୍ତୀ ସହରରେ ଥିବା ଏକ ଟେନିସ କ୍ଲବର କୋର୍ଟ ବ୍ୟବହାର କରିଛନ୍ତି। ”କ୍ଲେ କୋର୍ଟରେ ଖେଳି ମୁଁ ବହୁତ ଖୁସି“ ବୋଲି ଲେଖି ସୋସିଆଲ ମିଡିଆରେ ଶେୟାର କରିଛନ୍ତି। ଏହା ବ୍ୟତୀତ ଇନ୍ଷ୍ଟାଗ୍ରାମରେ ଏକ ଭିଡିଓ ଛାଡ଼ିଛନ୍ତି, ଯେଉଁଥିରେ ସେ ପାର୍ଟନରଙ୍କ ସହ ଶଟ୍ ବିନିମୟ କରୁଥିବା ପରିଲକ୍ଷିତ ହେଉଛି। ପେସାଦାର ଖେଳାଳିମାନେ ସେମାନଙ୍କ କୋଚ୍ଙ୍କ ସହ ବ୍ୟାୟାମ ଆରମ୍ଭ କରିପାରିବେ ବୋଲି ସ୍ପାନିଶ ଟେନିସ ଫେଡେରେଶନ ପକ୍ଷରୁ ସୋମବାର ଏକ ବିବୃତିିରେ ପ୍ରକାଶ କରାଯାଇଛି। ମାତ୍ର ଟେନିସ କୋର୍ଟ ବ୍ୟବହାର କରି ପାରିବେ ନାହିଁ। ଆସନ୍ତା ସପ୍ତାହରୁ ଖେଳାଳିଙ୍କପାଇଁ ନୂଆ ଗାଇଡଲାଇନ୍ ଆସିବ ବୋଲି ସ୍ପଷ୍ଟ କରାଯାଇଛି। ସାମ୍ପ୍ରତିକ ସ୍ଥିତିରେ ଜୋକୋଭିଚ୍ଙ୍କ ପ୍ରତି ଜରିମାନା ଦଣ୍ଡାଦେଶ ଲାଗୁ କରାଯିବ କି ନାହିଁ ତାହା ସ୍ପଷ୍ଟ ହୋଇନାହିଁ। ନିଜ ଦେଶ ସର୍ବିୟାରେ ସେ ଶୀଘ୍ର ଟେନିସ ଖେଳିବାକୁ ବ୍ୟଗ୍ରତାର ସହିତ ଅପେକ୍ଷା କରିଛନ୍ତି ବୋଲି ଜୋକୋଭିଚ୍ ପ୍ରକାଶ କରିଛନ୍ତି ।