ମୁମ୍ବାଇ,୧୨।୪(ପି.ଟି.): କ୍ରୀଡ଼ାରେ ଆଘାତ ସମସ୍ୟା ବା ସ୍ପୋଟର୍ସ ଇଞ୍ଜୁରି ନେଇ ମାଷ୍ଟରବ୍ଲାଷ୍ଟର ସଚିନ ତେନ୍ଦୁଲକର ୧୨,୦୦୦ ଡାକ୍ତରଙ୍କ ସହ ଆଲୋଚନା କରିଛନ୍ତି। ନିଜର ଅଗାଧ ଅଭିଜ୍ଞତା ଓ ଜ୍ଞାନ ବାଣ୍ଟିବାକୁ ସବୁବେଳେ ଇଚ୍ଛା ଜାହିର କରିଆସୁଥିବା ତେନ୍ଦୁଲକର ଏହି ଡାକ୍ତରମାନଙ୍କୁ ଶନିବାର ବିଭିନ୍ନ ପରାମର୍ଶ ଦେଇଥିଲେ। ପାଖାପାଖି ଦୁଇ ଦଶନ୍ଧିଧରି କ୍ରିକେଟ ଖେଳିଥିବା ସଚିନଙ୍କ ନିକଟରେ ବିଭିନ୍ନ ପ୍ରକାର ଅଭିଜ୍ଞତା ରହିଛି। ଦୀର୍ଘ ଦିନର କ୍ୟାରିୟରରେ ତେନ୍ଦୁଲକର ବହୁତ ତଥା ଭିନ୍ନ ଭିନ୍ନ ପ୍ରକାରର ସ୍ବାସ୍ଥ୍ୟ ସମସ୍ୟା ଦେଇ ଗତି କରି ଆସୁଥିଲେ। ଏହି ସମସ୍ୟାଗୁଡ଼ିକ ମଧ୍ୟରେ ଟେନିସ ଏଲ୍ବୋ ଇଞ୍ଜୁରି ସବୁଠାରୁ ଚର୍ଚ୍ଚିତ ଥିଲା।
ତେନ୍ଦୁଲକର ୨୦୦ଟି ଟେଷ୍ଟ ଓ ୪୬୩ଟି ଦିନିକିଆ ମ୍ୟାଚ୍ ଖେଳିଥିଲେ। ସାରା ଦେଶରେ ଲକ୍ଡାଉନ୍ ଜାରି ରହିଥିବା ବେଳେ ଦେଶର କେତେକ ଯୁବ ଅର୍ଥୋପେଡିକ ସର୍ଜନମାନେ ଇଣ୍ଟରନେଟ ମାଧ୍ୟମରେ ସେମିନାର (ଓ୍ବେବିନାର୍ସ) ମାଧ୍ୟମରେ ସ୍ପୋଟର୍ସ ଇଞ୍ଜୁରି ସଂକ୍ରାନ୍ତରେ ଜାଣିବାକୁ ଇଚ୍ଛା ଜାହିର କରିଥିଲେ। ଡ. ସୁଧୀର ଓ୍ବାରିୟର ଏ ନେଇ ସଚିନଙ୍କୁ ଅବଗତ କରାଇଥିଲେ।
ଶନିବାର ଏ ନେଇ ଏକ ସେସନର ଆୟୋଜନ ହୋଇଥିଲା ଓ ଯୁବ ଡାକ୍ତରମାନେ ସଚିନଙ୍କଠାରୁ ବହୁତ କିଛି ଶିକ୍ଷା କରିଥିଲେ। ଏହି ସେମିନାରରେ ୧୨,୦୦୦ ଡାକ୍ତର ସାମିଲ ହୋଇଥିଲେ। ଡାକ୍ତରମାନଙ୍କଠାରୁ ଏନେଇ ବହୁତ ସାହାଯ୍ୟ ପାଇଥିବା କଥା ୪୬ ବର୍ଷୀୟ ସଚିନ ଏହି ଆଲୋଚନ ଅବସରରେ କହିଥିଲେ। ଏହି ସେସନ ମାଧ୍ୟମରେ ଯୁବ ଡାକ୍ତରମାନେ ଆଥଲେଟମାନଙ୍କ ଆଘାତ ସମସ୍ୟା ବିଷୟରେ ଜାଣିବାକୁ ପାଇଥିଲେ। ଡ. ଓ୍ବାରିୟର ଏହି ସେସନ ସଂଯୋଜନା କରିଥିଲେ। ପିଜିଓଥେରାପିଷ୍ଟ ନୀତୀନ ପଟେଲ ତାଙ୍କୁ ଏଥିରେ ସହଯୋଗ କରିଥିଲେ। ପଟେଲ ପୂର୍ବରୁ ଭାରତୀୟ କ୍ରିକେଟ ଦଳ ଓ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ଫ୍ରାଞ୍ଚାଇଜ୍ ମୁମ୍ବାଇ ଇଣ୍ଡିଆନ ସହିତ କାର୍ଯ୍ୟ କରି ବହୁ ଅଭିଜ୍ଞତା ହାସଲ କରିଛନ୍ତି।