ବାର୍ମେର,୭ା୧୦(ପି.ଟି.): ରାଜସ୍ଥାନର ବାର୍ମେର ଜିଲା ଅନ୍ତର୍ଗତ ବାଲୋତ୍ରାରେ ରବିବାର ଜଣେ ସ୍ବଚ୍ଛତା କର୍ମୀଙ୍କର ପୋଲିସ ହାଜତରେ ମୃତ୍ୟୁ ଘଟିଛି। ପୈତୃକ ସମ୍ପତ୍ତିକୁ ନେଇ ପାରିବାରିକ ଗଣ୍ଡଗୋଳରୁ ଜଗଦୀଶ ଗୋଲିୟାର ଓ ଅନ୍ୟ ଦୁଇଜଣଙ୍କୁ ପଚପଦ୍ର ଥାନା ପୋଲିସ ଗିରଫ କରିଥିଲା। ହାଜତ ମୃତ୍ୟୁ ଘଟଣାର ବିଚାର ବିଭାଗୀୟ ମାଜିଷ୍ଟ୍ରେଟଙ୍କ ଦ୍ୱାରା ତଦନ୍ତ କରାଯିବ ବୋଲି ବାର୍ମେର ଏସ୍ପି ଶରଦ ଚୌଧ୍ରୀ କହିଛନ୍ତି। ଉକ୍ତ ଥାନାର ସମସ୍ତ ଅଧିକାରୀଙ୍କୁ ବଦଳି କରାଯାଇଛି। ଜଗଦୀଶଙ୍କ ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ସୋମବାର ମାଜିଷ୍ଟ୍ରେଟଙ୍କ ଉପସ୍ଥିତିରେ ମେଡିକାଲ ବୋର୍ଡ ତାଙ୍କ ଶବବ୍ୟବଚ୍ଛେଦ କରିବ। ପାରିବାରିକ ସଂଘର୍ଷ ବେଳେ କୌଣସି ଆଭ୍ୟନ୍ତରୀଣ ଆଘାତ ଯୋଗୁ ସ୍ବଚ୍ଛତା କର୍ମୀଙ୍କର ମୃତ୍ୟୁ ଘଟିଥିବା ସନ୍ଦେହ କରାଯାଉଛି ବୋଲି ଡିଏସ୍ପି ସୁଭାଷ ଚନ୍ଦ୍ର କହିଛନ୍ତି। ହାଜତରେ ଥିବାବେଳେ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ଜଗଦୀଶଙ୍କୁ ଆକ୍ରମଣ କରିଥିବା ୮ ଜଣଙ୍କ ବିରୋଧରେ ପରିବାର ପକ୍ଷରୁ ଏତଲା ଦିଆଯାଇଥିଲା। ଏପର୍ଯ୍ୟନ୍ତ କୌଣସି ମାମଲା ରୁଜୁ ହୋଇନାହିଁ। ଜଗଦୀଶ ଜିଲା କୋର୍ଟରେ ଟାଇପିଷ୍ଟ ଭାବେ କାମ କରୁଥିଲେ।
