ଲାଞ୍ଜିଗଡ଼, ୨୬।୧୨ (ଡି.ଏନ୍.ଏ.)- ସ୍ବଚ୍ଛ ଭାରତ ମିଶନ ତରଫୁ ସବୁ ପରିବାରକେ ପାଇଖାନା ତିଆର କରବାର ଲାଗି ଟଁକା ଦିଆଯାଉଛେ। ସେନ୍ତା ଲୁକ୍କୁ ପାଇଖାନା ବେଭାର କରବାକେ ସଚେତନ କରବାର ଲାଗି ସବୁ ପଁଚେତ୍ରେ ୩ରୁ ୪ ଝନ୍ ତାଲିମ ନେଇଥିବାର ମୋଟିଭେଟର କାମ୍ କରୁଛନ୍। ସେ ହିସାବେ ଲାଞ୍ଜିଗଡ଼ ବ୍ଲକର ୨୬ଟା ପଁଚେତ୍ରେ ୧୦୮ ଝନ୍ ମୋଟିଭେଟର କାଯ୍ କରୁଛନ୍। ହେଲେ ବଡ଼ଭାଗି ମୋଟିଭେଟର ସରକାରକଁରନୁ ଟଁକା ପାଇ ମୂଲ କାମ୍ ଛାଡ଼ି ଉନିଅଁା କାମ୍ କରୁଥିବାର ଅଭିଯୋଗ ହେଉଛେ। ଯେନ୍ଥିରଲାଗି ବ୍ଲକର ୮୦ ଭାଗ ଲୋକ୍ ପାଇଖାନା ବେଭାର ନାଇଁ କରବାର, ଖୁଲାରେ ଝାଡ଼ାଝପଟ ଯାଉଛନ୍।
ଲାଞ୍ଜିଗଡ଼ ବ୍ଲକ ଗୁଟେ ଆଦିବାସୀ ବହୁଲ ଅତଡ଼ିଆ ଅଂଚଲ। ଇଠାନେ ଜନସାଧାରନକର ଭିତରେ ସଚେତନତା ସୁରୁଷ୍ଟି କରବାର ନିହାତି ଦରକାର। ବ୍ଲକର ଭିନେ ଭିନେ ଗଁାରେ ସ୍ବଚ୍ଛ ଭାରତ ମିଶନ ଯୋଜନାରେ ପାଇଖାନା ତିଆର କରାଯାଇଛେ ସତ୍। ହେଲେ ଅନେକ ଲୋକ୍ ଇ ପାଇଖାନା କେନ୍ଥେଇ ବେଭାର କରବେ ସେଟା ନାଇଁ ଜାନି। ଇଆଡ଼େ ପାଇଖାନାର ଲାଗି ଆଏଜ୍ତକ ପାଏନ୍ର ବେବସ୍ତା ନାଇଁ କରାଯାଇ। ସେନ୍ତା ବ୍ଲକର ୮ଟା ପଁଚେତ୍ର ଅନେକ ଗଁାରେ ଲୋକ୍ ପାଇଖାନାର ବେଭାର ନାଇଁ ଜାନିକରି ପାଇଖାନାକେ ଛେଲ୍ ଗୁହାଲ, କୁକ୍ରା ଗୁଡ଼ା ହିସାବେ ବେଭାର କରୁଥିବାର ଦେଖ୍ବାକେ ମିଲୁଛେ। ଅନେକ୍ ଲୋକ୍ ପାଇଖାନାକେ ଗୁଦାମ୍ ଘର ହିସାବେ ବି ବେଭାର କରୁଛନ୍। ବ୍ଲକର ବିଜେପୁର, କାନକୁଟ୍ରୁ, ମାଳିଯୁବାଙ୍ଗ, ବେନଗଁା, ପାହାଡ଼ପଦର, ଲାଞ୍ଜି, ବେଡ଼ାଗଁା, କୁମଖାଲ, ବନ୍ଧପାରୀ ଲେଖେଁ ପଁଚେତର ଅନେକ ଗଁାର ଲୋକ ବଁଧ୍ଖଁଡ଼ି, ରାସ୍ତା ତରେ, ନାଲ୍ ନଲିଆ ତରେ ଝାଡ଼ାଝପଟ କରୁଛନ୍। ସଚେତନତା ଅଭାବୁ ଗଁାଗଁଲିରେ ବାସ କରୁଥିବାର ଲୋକ୍ ପାଇଖାନାର ସଠିକ୍ ବେଭାର ଜାନି ନାଇଁପାରବାର। ଏନ୍ତାଥି ସେମାନେ ପାଇଖାନା ଘରେ ଜାଲେନି କାଠ୍, ଖରସି, ଭଂଗା ଦଦ୍ରା ସାମାନ ରଖୁଛନ୍। ଇ ଦିଗେ ବିଭାଗୀୟ ଅଧ୍କାରୀ ଦୁରୁଷ୍ଟି ଦେଇ ପଦକ୍ଷେପ ନେବାକେ ବୁଧିଜୀବୀ ମହଲରେ ଦାବି ହେଉଛେ। ଇ ବାବ୍ଦେ ଆରଡବ୍ଲ୍ୟୁଏସ୍ଏସ୍ର ଯନ୍ତ୍ରୀ ଯଶମନ୍ତ ମାଝିକୁଁ ପଚ୍ରାଲାରୁ ପଁଚେତ୍ମାନ୍କେ ମୋଟିଭେଟରମାନେ ନିଜର କାମ୍ ନାଇଁ କରବାର ସେଥିରଲାଗି ଆମେ ତାକର ଦରମା ବଁଦ୍ କରିଛୁଁ। ଅଂଲରେ ଲୁକ୍କୁ ସଚେତନ କରବାର ଦରକାର ଅଛେ। ଇଥିରଲାଗି କାଣା କରାଯାଇପାରବା ଆମେ ଆଲୋଚନା କରି ପଦକ୍ଷେପ ନେମୁ ବଲି ସେ କହିଥିଲେ।