ରାୟଗଡ଼ା ଅଫିସ,୨୧ା୫: କେରଳକୁ ରୋଜଗାର କରିବା ପାଇଁ ଓଡ଼ିଶାର ଗଜପତି, ରାୟଗଡ଼ା, କୋରାପୁଟ, ନବରଙ୍ଗପୁର, କନ୍ଧମାଳ ଓ ମାଲକାନଗିରି ଜିଲାରୁ ବହୁ ଶ୍ରମିକ ଯାଇଥିଲେ। କରୋନା ଯୋଗୁ ଲକ୍ଡାଉନ୍ ହେବାରୁ ସେମାନେ ବିଭିନ୍ନ ସମସ୍ୟାର ସମ୍ମୁଖୀନ ହୋଇଥିଲେ। ଫଳରେ ଏକ ସ୍ବତନ୍ତ୍ର ଟ୍ରେନ୍ ଯୋଗେ ତିରୁଲଭାଲରୁ ଆସି ସେମାନେ ଗୁରୁବାର ରାୟଗଡ଼ାରେ ପହଞ୍ଚିଛନ୍ତି। ଗଜପତିରୁ ୪୧ଜଣ, ରାୟଗଡ଼ାର ୧୭,କୋରପୁଟର ୧୧,ନବରଙ୍ଗପୁର ୧୨୧, କନ୍ଧମାଳର ୨୩ ଓ ମାଲକାନଗିରି ଜିଲାର ୩ ଜଣ ମିଶି ସର୍ବମୋଟ ୨୧୬ଜଣ ଶ୍ରମିକ ରାୟଗଡ଼ାରେ ପହଞ୍ଚିଛନ୍ତି।
ରାୟଗଡ଼ା ଜିଲାପାଳ ପ୍ରମୋଦ କୁମାର ବେହେରା, ଅତିରକ୍ତ ଜିଲାପାଳ ଶରତ ଚନ୍ଦ୍ର ପଣ୍ଡା,ପିଡିଡିଆରଡିଏ ଅମ୍ରିତ ଋତୁରାଜ, ଉପଜିଲାପାଳ ପ୍ରତାପ ଚନ୍ଦ୍ର ପ୍ରଧାନ ପ୍ରମୁଖ ଉପସ୍ଥିତ ରହି ପ୍ରବାସୀ ଶ୍ରମିକମାନଙ୍କୁ ସ୍ବାଗତ କରିଥିଲେ। ସେହିପରି ରାୟଗଡ଼ା ଜିଲାର ରାମନାଗୁଡ଼ା ବ୍ଲକର ୫ଜଣ, ଗୁଣୁପୁର ୩ ଏବଂ ମୁନିଗୁଡ଼ା ୯ ସର୍ବମୋଟ ୧୭ ଜଣ ଶ୍ରମିକଙ୍କୁ ବିଡିଓଙ୍କୁ ହସ୍ତାନ୍ତର କରାଯାଇଛି।