ନୂଆଦିଲ୍ଲୀ,୧୪।୨:ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ୨୪ ତାରିଖରୁ ଦୁଇଦିନିଆ ଭାରତ ଗସ୍ତରେ ଆସୁଥିବାବେଳେ ଏହି ଅବସରରେ ଦୁଇଦେଶ ମଧ୍ୟରେ ୩.୫ ବିଲିୟନ ଡଲାର (୨୫,୦୦୦ କୋଟି ଟଙ୍କା)ରୁ ଊର୍ଦ୍ଧ୍ୱ ମୂଲ୍ୟର ଦୁଇଟି ବୃହତ୍ ପ୍ରତିରକ୍ଷା ଚୁକ୍ତି ସ୍ବାକ୍ଷର ହେବାକୁ ଯାଉଛି। ଏହି ଚୁକ୍ତି ଅନୁଯାୟୀ ଆମେରିକା ୩୦ଟି ହେଭି ଡ୍ୟୁଟି ହେଲିକପ୍ଟର ଯୋଗାଇଦେବ। ସେଥିରେ ରହିଛି ନୌସେନା ପାଇଁ ୨୪ଟି ଏମ୍ଏଚ୍-୬୦ ରୋମିଓ ମଲ୍ଟି-ମିଶନ ହେଲିକପ୍ଟର ଓ ସ୍ଥଳସେନା ପାଇଁ ୬ଟି ଏଏଚ୍-୬୪ଇ ଆପାଚେ ଲଢ଼ୁଆ ଚୋପର। ଆଗାମୀ ସପ୍ତାହରେ ସୁରକ୍ଷା ସମ୍ପର୍କିତ କ୍ୟାବିନେଟ କମିଟି ଏହି ଚୁକ୍ତିନାମାକୁ ମଞ୍ଜୁରୀ ଦେବାକୁ ଯାଉଛି। ଚୁକ୍ତି ଅନୁଯାୟୀ ଏମ୍ଏଚ୍-୬୦ଆର୍ ହେଲିକପ୍ଟର ମୂଲ୍ୟର ୧୫ ପ୍ରତିଶତ ଭାରତ ପ୍ରଥମ କିସ୍ତିରେ ପ୍ରଦାନ କରିବ। ଏହା ସ୍ବାକ୍ଷର ହେବାର ୨ ବର୍ଷ ମଧ୍ୟରେ ପ୍ରଥମ ଦଫା ହେଲିକପ୍ଟର ଯୋଗାଇ ଦିଆଯିବ। ୪ରୁ ୫ ବର୍ଷ ମଧ୍ୟରେ ୨୪ଟି ହେଲିକପ୍ଟର ମିଳିଯିବ ବୋଲି ଏକ ସୂତ୍ରରୁ ଜଣାପଡିଛି। ଅନ୍ୟପକ୍ଷରେ ୬ଟି ଆପାଚେ ହେଲିକପ୍ଟର ସିଧାସଳଖ କ୍ରୟ କରାଯିବ। ପୂର୍ବରୁ ବାୟୁସେନାରେ ୨୨ଟି ଆପାଚେ ହେଲିକପ୍ଟର ସାମିଲ ହୋଇଛି। ଏଥିପାଇଁ ୨୦୧୫ ସେପ୍ଟେମ୍ବରରେ ଆମେରିକା ସହ ୧୩,୯୫୨ କୋଟି ଟଙ୍କାର ଡିଲ୍ ହୋଇଥିଲା। ୬ଟି ଆପାଚେ ହେଲିକପ୍ଟର ୨୦୨୨-୨୩ ସୁଦ୍ଧା ମିଳିବ ବୋଲି ଜଣାପଡିଛି। ଏଥିରେ ଷ୍ଟିଙ୍ଗର୍ , ହେଲଫାୟାର ଲଙ୍ଗ୍ବୋ ମିସାଇଲ ସାଙ୍ଗକୁ ବନ୍ଧୁକ ଓ ରକେଟ ଖଞ୍ଜାଯିବ। ସେହିପରି ଏମ୍ଏଚ୍-୬୦ଆର୍ରେ ହେଲ୍ଫାୟାର ମିସାଇଲ ସାଙ୍ଗକୁ ଏମ୍କେ-୫୪ ଟରପେଡୋସ୍ ଏବଂ ପ୍ରେସିଶନ୍-କିଲ୍ ରକେଟ ରହିବ। ଭାରତ ମହାସାଗର ଅଞ୍ଚଳରେ ଚାଇନାର ବୁଡ଼ାଜାହାଜ ନିୟମିତ ପଇଁତରା ମାରୁଥିବାରୁ ତାହାର ମୁକାବିଲା ପାଇଁ ନୌସେନା ନିମନ୍ତେ ଏହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି।