ନୂଆଦିଲ୍ଲୀ,୩।୨: ରାଷ୍ଟ୍ରପତି ଭବନର ମୋଗଲ ଗାର୍ଡେନ ଏବେ ସଜେଇ ହୋଇ ଅତିଥିଙ୍କୁ ସ୍ବାଗତ କରିବାକୁ ଅପେକ୍ଷା ରଖିଛି। ଫେବୃୟାରୀ ୫ରୁ ମାର୍ଚ୍ଚ ୮ ପର୍ଯ୍ୟନ୍ତ ଏହା ଆଗନ୍ତୁକଙ୍କୁ ସ୍ବାଗତ କରିବ ବୋଲି ଜଣାପଡିଛି। ଏଠାରେ ପ୍ରାୟ ୧୦ ହଜାରୁ ଅଧିକ ଟ୍ୟୁଲିପ, ୧୩୮ ପ୍ରକାରର ଗୋଲାପ ୭୦ ପ୍ରକାରର ୫ ହଜାରରୁ ଊର୍ଦ୍ଧ୍ୱ ଫୁଲ ଦର୍ଶକଙ୍କ ମନମୋହିବ। ଦୁର୍ଲଭ ଓ ଆକର୍ଷକ ଗୋଲାପ ପାଇଁ ପ୍ରସିଦ୍ଧ ଏହି ଉଦ୍ୟାନରେ ଏଥର ଗ୍ରେସ ଦ ମୋନାକୋ ନାମକ ଗୋଲାପ ଦର୍ଶକଙ୍କ ଦୃଷ୍ଟି ଆକର୍ଷଣ କରିବ ବୋଲି କୁହାଯାଉଛି। ଏହାକୁ ଗତବର୍ଷ ମୋନାକୋର ରାଜା ଏଲବର୍ଟ ଦ୍ୱିତୀୟ ରୋପଣ କରିଥିଲେ। ଏହାସହ ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ, ମଦର ଟେରେସା, ପୂର୍ବତନ ଆମେରିକା ରାଷ୍ଟ୍ରପତି ଜନ ଏଫ୍ କେନେଡି, ମହାରାଣୀ ଏଲିଜାବେଥ ଓ ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ନାମରେ ନାମିତ ଗୋଲାପ ମଧ୍ୟ ଦର୍ଶକଙ୍କୁ ଟିକେ ଅଡୁଆରେ ପକାଇବାକୁ ପ୍ରସ୍ତୁତ ହୋଇ ରହିଛି। ଏହାସହ ଚା’କପ୍ ଆକାରର ଟ୍ୟୁଲିପ ମଧ୍ୟ ଏହି ଗାର୍ଡେନର ଏକ ସ୍ବତନ୍ତ୍ର ପରିଚୟ।