ମାଲକାନଗିରି,୧୫।୧(ଡି.ଏନ୍.ଏ.)- ଦେଶ ସ୍ବାଧୀନ ହେବାର ଦୀର୍ଘ ୭୨ ବର୍ଷ ବିତିଗଲାଣି। ମାଲକାନଗିରି ସଦର ମହକୁମାଠାରୁ ୩୦ କିଲୋମିଟର ଦୂର ଛତିଶଗଡ଼କୁ ଲାଗି ରହିଛି ଏକ ପୁରାତନ ଗ୍ରାମ, କତାମାଟେରୁ। ଆଦିବାସୀ କୋୟା ସମ୍ପ୍ରଦାୟର ୧୫୦ ପରିବାର ବସବାସ କରୁଥିବା ଏହି ଗ୍ରାମକୁ ଏଯାଏ ରାସ୍ତା ନାହିଁ। ଏଠାରେ ୧୯୫୯ରୁ ପ୍ରତିଷ୍ଠା ହୋଇଥିବା ଆଶ୍ରମ ବିଦ୍ୟାଳୟରେ ପଢୁଛନ୍ତି ୩୦୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ା ଗ୍ରାମକୁ ରାସ୍ତା ନିର୍ମାଣ ପାଇଁ ୨୦ ବର୍ଷ ହେଲା ମାଟାପାକା ସରପଞ୍ଚ ଏବଂ ଅଞ୍ଚଳବାସୀ ବାରମ୍ବାର ପ୍ରଶାସନ ନିକଟରେ ଦାବି କରି ଆସୁଛନ୍ତି, ମାତ୍ର ସେମାନଙ୍କ କଥା କେହି ଶୁଣୁନାହାନ୍ତି। ପଞ୍ଚାୟତ ବୈଠକରେ ରେଜୁଲେଶନ ଗୃହୀତ ହୋଇ ପ୍ରଶାସନ ନିକଟରେ ଉପସ୍ଥାପିତ କରାଯାଇଥିଲେ ମଧ୍ୟ କିଛି ସୁଫଳ ଏଯାଏଁ ମିଳିନାହିଁ। ମାଲକାନଗିରି ସଦର ବ୍ଲକଠାରୁ ୬ କିଲୋମିଟର ଦୂର ସାବେରୀ ନଦୀକୂଳରେ ରହିଛି କତାମାଟେରୁ ଗ୍ରାମ। ବର୍ଷାଦିନେ ମାଟାପାକାରୁ କତାମାଟେରୁ ଯିବାପାଇଁ ଅନେକ ସମସ୍ୟା ଉପୁଜିଥାଏ। ଛାତ୍ରୀଛାତ୍ର ଓ ଗ୍ରାମବାସୀ ମାଲକାନଗିରିରୁ ଘର ପାଇଁ ବିଭିନ୍ନ ସାମଗ୍ରୀ କାନ୍ଧରେ ବୋହି ନେଇଥାନ୍ତି। ଗତ ଜୁଲାଇ ମାସରେ ଗ୍ରାମବାସୀ ଏହି ରାସ୍ତାରେ କାଦୁଅରେ ଧାନ ରୋଇ ଏକ ଅଭିନବ ପ୍ରତିବାଦ ଜଣାଇଥିଲେ। ଆଶା ଥିଲା, ଏହା ପରେ ପ୍ରଶାସନର ନିଦ ଭାଙ୍ଗିବ; ମାତ୍ର କିଛି ହେଲାନି। ପୁରୁଣାକାଳିଆ ମାଟି ରାସ୍ତାରେ ୫ଟି କଲ୍ଭର୍ଟ ନିର୍ମାଣ ହୋଇ ସେତିକିରେ ଅଟକିଛି ରାସ୍ତା ନିର୍ମାଣ। ଫଳରେ ଗ୍ରାମବାସୀ ପଞ୍ଚାୟତ କାର୍ଯ୍ୟାଳୟ ସହ ମାଲକାନଗିରିକୁ ବିଭିନ୍ନ କାର୍ଯ୍ୟରେ ଯିବାକୁ ବର୍ଷବର୍ଷ ଧରି ଅସୁବିଧା ଭୋଗୁଛନ୍ତି। ଗ୍ରାମଠାରୁ ମାତ୍ର ୨ କିଲୋମିଟର ଦୂରରେ ରହିଛି ଛତିଶଗଡ଼ ସୀମାନ୍ତ। ଗ୍ରାମଠାରୁ ପଡ଼ୋଶୀ ଛତିଶଗଡ଼ ସୁକୁମା ଜିଲା ସଦର ମହକୁମାର ଦୂରତା ହେଉଛି ୮ କିଲୋମିଟର ା ଗ୍ରାମକୁ ରାସ୍ତା ନ ଥିବାରୁ ଗ୍ରାମବାସୀ ସୁକୁମା ଜିଲା ସଦର ମହକୁମା ଉପରେ ନିର୍ଭର କରନ୍ତି। ଗୁରୁତର ଅବସ୍ଥାରେ ଗର୍ଭବତୀ ରୋଗୀଙ୍କୁ ଡାକ୍ତରଖାନା ନେବାକୁ ହେଲେ ଖଟରେ ୬ କିଲୋମିଟର ବୋହି ମାଟାପାକା ପଞ୍ଚାୟତକୁ ଅଣାଗଲେ ସେଠାରୁ ଡାକ୍ତରଖାନା ଯାଇଥାଉ ବୋଲି କହିଛନ୍ତି ଗ୍ରାମବାସୀ। ଦୀର୍ଘ ବର୍ଷ ଧରି ମୌଳିକ ସୁବିଧାରୁ ବଞ୍ଚତ୍ତ ଏହି ଗ୍ରାମବାସୀ ମଙ୍ଗଳବାର ଏକ ବୈଠକ କରି ଛତିଶଗଡ଼ରେ ମିଶିବା ପାଇଁ ନିଷ୍ପତ୍ତି ନେଇଛନ୍ତି। ଆସନ୍ତା ସୋମବାର ସେମାନେ ସୁକୁମା ଯାଇ ଜିଲାପାଳଙ୍କୁ ଭେଟି ସେମାନଙ୍କୁ ଛତିଶଗଡ଼ରେ ମିଶାଇବା ପାଇଁ ଅନୁରୋଧ କରିବେ ବୋଲି କହିଛନ୍ତି ଗ୍ରାମର ଭିମା ମାଡ଼କାମି, ଦେବା ବେଟି, ଜଗା ମାଡ଼କାମି, ଜଗା କଞ୍ଜାମି, ରାଜା ମାଡି, ଭଇମା ମାଡି, ଭିମା କାର୍ତ୍ତାମି, ଇର୍ମା ସୋଡି, କେଶା ସୋଡି, ଆଡମା ପଡିଆମି, କାନା ପଡିଆମି, କଶା ମାଡକାମି, ଆଇତା ପଡିଆମି, ରାମା ମାଢ଼ି, ଦୁଲା ସୋଡି ଓ କଶା କବାସୀ ପ୍ରମୁଖ।