କଟକ ଅଫିସ୍,୩୦।୪: ସଙ୍ଗରୋଧରେ ଗୋଟିଏ ମାସ ରଖିବା ପରେ ପୁଣି ଥରେ ସ୍ବତନ୍ତ୍ର ସଙ୍ଗରୋଧରେ ରଖାଗଲା। ଏହାକୁ ଚ୍ୟାଲେଞ୍ଜ କରି ହାଇକୋର୍ଟରେ ଏକ ମାମଲା ରୁଜୁ ହୋଇଥିଲା। ଏଥିରେ ଯାଜପୁର ଜିଲା ପ୍ରଶାସନ ପକ୍ଷରୁ ଜବାବ ଦାଖଲ ହୋଇଥିଲା। ସନ୍ଦିଗ୍ଧଙ୍କ ସ୍ବାବ୍ ପରୀକ୍ଷା ରିପୋର୍ଟ ନେଗେଟିଭ୍ ଆସିବା ପରେ ତାଙ୍କୁ ଛଡ଼ାଯିବ ବୋଲି ବିଚାରପତି ଶତ୍ରୁଘ୍ନ ପୂଜାହାରୀ ଏବଂ ବିଚାରପତି କେ.ଆର. ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ ଚୂଡାନ୍ତ ରାୟ ଦେଇଛନ୍ତି। ମାମଲାରୁ ପ୍ରକାଶ, ଅଞ୍ଜନ ତନୟ ପଣ୍ଡା କୋଲକତାର ଏକ କମ୍ପାନୀରେ କାମ କରୁଥିଲେ। ସେଠାରୁ ସେ ପ୍ରାୟ ଏକ ମାସ ପୂର୍ବେ ଫେରିଥିଲେ। ଏନେଇ ସେ ସ୍ଥାନୀୟ ପ୍ରଶାସନକୁ ଅବଗତ କରିଥିଲେ। ତାଙ୍କ ଘର ଆଗରେ ପ୍ରଶାସନ ତରଫରୁ ନୋଟିସ୍ ମରାଯିବା ସହ ତାଙ୍କୁ ୧୪ ଦିନିଆ ସଙ୍ଗରୋଧରେ ରହିବାକୁ ନିର୍ଦ୍ଦେଶ ଦିଆଯାଇଥିଲା। ସେ ପ୍ରାୟ ଗୋଟିଏ ମାସ ଘରେ ସଙ୍ଗରୋଧରେ ଥିଲେ। ତାଙ୍କର କରୋନା ଲକ୍ଷଣ ଦେଖାଯାଇ ନ ଥିଲା। ପୁଣି ଥରେ ପ୍ରଶାସନ ତାଙ୍କୁ ଆଣି ସ୍ଥାନୀୟ ଏକ ବିଦ୍ୟାଳୟରେ ସଙ୍ଗରୋଧରେ ରଖିଛି। ଏହାକୁ ସେ ବିରୋଧ କରି ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ପୂର୍ବ ଶୁଣାଣିରେ ହାଇକୋର୍ଟ ଏହି ମାମଲାରେ ଯାଜପୁର ଜିଲାପାଳଙ୍କୁ ଜବାବ ଦାଖଲ ଲାଗି ନୋଟିସ୍ କରିଥିଲେ। ବୁଧବାର ଏହାର ଜବାବ ଦାଖଲ କରାଯାଇଥିଲା।