ଝାରସୁଗୁଡା ଅଫିସ,୯ା୪- ରାଜ୍ୟ ସରକାରଙ୍କ ଉଚ୍ଚସ୍ତରୀୟ ମନ୍ତ୍ରୀମଣ୍ଡଳସ୍ତରୀୟ କମିଟି ପକ୍ଷରୁ କୋଭିଡ-୧୯ ମୁକାବିଲା ପାଇଁ ଗୁରୁତ୍ୱପୁର୍ଣ୍ଣ ଆଲୋଚନା ଗୁରୁବାର ଅନୁଷ୍ଠିତ ହୋଇଯାଇଛି। ଭିଡିଓ କନଫରେନ୍ସ ଜରିଆରେ ଏହି ଆଲୋଚନା ହୋଇଛି। ଝାରସୁଗୁଡା ଜିଲାପାଳଙ୍କ କାର୍ଯ୍ୟାଳୟସ୍ଥିତ ଏନଆଇସି କକ୍ଷରେ ରାଜ୍ୟ ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ମନ୍ତ୍ରୀ ନବ କିଶୋର ଦାସ ଉପସ୍ଥିତ ରହି ଆଲୋଚନାରେ ଭାଗ ନେଇ ଥିଲେ। ସେ ବିଭିନ୍ନ ପରାମର୍ଶ ଦେବା ସହ କରୋନା ମୁକାବିଲା କାର୍ଯ୍ୟର ସମୀକ୍ଷା ଓ ବିଭିନ୍ନ ନିଷ୍କତ୍ତି ମଧ୍ୟ ନେଇଛନ୍ତି। ପ୍ରତିଦିନ ଏକ ହଜାର ରକ୍ତ ନମୁନା ପରୀକ୍ଷା କରାଯିବା ନେଇ ବୈଠକରେ ଆଲୋଚନା ହୋଇଛି। ୧୨ ତାରିଖରୁ ବ୍ରହ୍ମପୁର ମେଡିକାଲ କଲେଜରେ, ୧୫ ତାରିଖରୁ ଭିମସାରରେ ଓ ୧୭ ତାରିଖରୁ ଆଇଜିଏଚରେ ରକ୍ତ ନମୁନା ପରୀକ୍ଷା କରାଯିବା ନେଇ ନିଷ୍ପତ୍ତି ନିଆଯାଇଛି। ଏହି ବୈଠକ ଶେଷ ହେବା ପରେ ମନ୍ତ୍ରୀ ଦାସ ଗଣମାଧ୍ୟମକୁ ସୂଚନା ଦେଇ କହିଥିଲେ ଯେ ଦିଲ୍ଲୀ ଏମ୍ସରେ ଯେଭଳି ଭାବେ ଲୋକଙ୍କୁ ସାନିଟାଇଜ କରାଯାଉଛି ସେହିଭଳି ଓଡିଶାରେ ମଧ୍ୟ ବ୍ୟବସ୍ଥା ହେବା ଆବଶ୍ୟକ। ବୁର୍ଲା ଭିମସାରକୁ ଯୋଗାଇ ଦିଆଯାଇଥିବା ୨୨ ଟି ଭେଣ୍ଟିଲେଟରକୁ ବୁର୍ଲା କୋଭିଡ ହସ୍ପିପିଟାଲରେ ବ୍ୟବହାର କରାଯିବା, ସରକାରଙ୍କ ପକ୍ଷରୁ କୋଭିଡ-୧୯ ଚିକିତ୍ସା ପାଇଁ ଅନୁମୋଦନ କରିଥିବା ୨୪୩୨ ଜଣ ଷ୍ଟାଫ ନର୍ସ, ୭୨୯ ଜଣ ଫାର୍ମାସିଷ୍ଟ, ୬୧୦ ଜଣ ଲ୍ୟାବ ଟେକନିସିଆନ, ୨୯୧ ରେଡିଓ ଗ୍ରାଫର, ୧୭୩୫ ଜଣ ପୁରୁଷ ସ୍ବାସ୍ଥ୍ୟକର୍ମୀ ଓ ୨୧୬୩ ଜଣ ମହିଳା ସ୍ବାସ୍ଥ୍ୟକର୍ମୀଙ୍କୁ ଶିଘ୍ର ନିଯୁକ୍ତି ଦେଇ ତାଲିମ ଦେବାକୁ ଦାବି କରିଛନ୍ତି। ବିଭିନ୍ନ ଜିଲାରେ କୋଭିଡ ତାଲିମ ଶେଷ କରାଯାଇ କୋଭିଡ ହସ୍ପିଟାଲରେ କାର୍ଯ୍ୟ ଆରମ୍ଭ କରାଯାଉ। ସମସ୍ତ ଜିଲାର ଆୟୁର୍ବେଦ, ହୋମିଓପାଥି ଡାକ୍ତର ଓ ଅନ୍ୟାନ୍ୟ ମେଡିକାଲ ଷ୍ଟାଫଙ୍କୁ କୋଭିଡ ହସ୍ପିଟାଲରେ କାର୍ଯ୍ୟ କରିବା ପାଇଁ ତାଲିମ ପ୍ରଦାନ କରାଯାଉ। ସେହିଭଳି ଏନସିସି କ୍ୟାଡେଟ, ଏନ୍ଏସ୍ଏସ୍, ଏନୱାଇକେଏସ୍ ସ୍ବଚ୍ଛାସେବୀଙ୍କୁ ମଧ୍ୟ ଏ ନେଇ ତାଲିମ ଦେବାକୁ ମନ୍ତ୍ରୀ ଦାସ ବୈଠକରେ ପ୍ରସ୍ତାବ ଦେଇଛନ୍ତି।