ଭଦ୍ରକ ଅଫିସ, ୭।୭ – ଭଦ୍ରକ ଉପକଣ୍ଠ ବରପଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ବର୍ଷାପାଣି ପଶିଛି। ଏବେ ଆଣ୍ଠୁଏ ଲେଖାଏ ପାଣି ଜମି ରହିଛି। ଏହି କାରଣରୁ ସ୍ବାସ୍ଥ୍ୟସେବା ପାଇଁ ଆସୁଥିବା ରୋଗୀ ନାନା ଅସୁବିଧା ଭୋଗୁଛନ୍ତି। ଏଠାରୁ ଜଳ ନିଷ୍କାସନ ସକାଶେ ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବା ଅଭିଯୋଗ ହେଉଛି। ବର୍ଷାଦିନେ ସାମାନ୍ୟ ବର୍ଷା ହେଲେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଆଉଟ୍ଡୋର, ଔଷଧ ବିତରଣ କେନ୍ଦ୍ର, ଡ୍ରେସିଂରୁମ, ପ୍ରତୀକ୍ଷାଳୟ, ପାଥୋଲ୍ୟାବ୍ ଓ ଅନ୍ୟାନ୍ୟ ବିଭାଗରେ ପାଣି ଜମି ରହୁଛି। ଫଳରେ ବର୍ଷାଦିନେ ରୋଗୀ ସେବା ଏକପ୍ରକାର ଠପ୍ ହୋଇଯାଉଛି। ଶନିବାର ଆମ ପ୍ରତିନିଧି ସ୍ବାସ୍ଥ୍ୟକେନ୍ଦ୍ରର ଅବସ୍ଥା ଦେଖି କେତେକ ରୋଗୀଙ୍କୁ ପଚାରିବାରୁ ଏହି ସମସ୍ୟା ଦୀର୍ଘବର୍ଷର ବୋଲି ପ୍ରତିକ୍ରିୟା ରଖିଥିଲେ। ଏହି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ଆଖପାଖର ଦଇସିଂ, ଗଣିଜାଙ୍ଗ, କାଉପୁର, ଓଡଙ୍ଗ, ରାମକୃଷ୍ଣପୁର, ରଁାପୁର, ଛୟାଳସିଂ, ରାନ୍ଦିଆ ଭଳି ୨୫ରୁ ଊର୍ଦ୍ଧ୍ୱ ପଞ୍ଚାୟତ ନିର୍ଭର କରୁଥିବା ବେଳେ ବର୍ଷାପାଣି ନିଷ୍କାସନ ପାଇଁ ଜିଲା ସ୍ବାସ୍ଥ୍ୟ ବିଭାଗ କିମ୍ବା ପ୍ରଶାସନ ଦୃଷ୍ଟି ନ ଦେବା ପରିତାପର ବିଷୟ ବୋଲି କୁହାଯାଇଛି। ଏ ସମ୍ପର୍କରେ ମେଡିକାଲ ଅଫିସର ପ୍ରଫୁଲ୍ଲ ନନ୍ଦଙ୍କୁ ପଚାରିବାରୁ ଏଭଳି ସମସ୍ୟା ବିଷୟରେ ବହୁବାର ଜିଲା ଚିକିତ୍ସାଧିକାରୀଙ୍କୁ ଲିଖିତ ଭାବେ ଜଣାଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଉ ନାହିଁ ବୋଲି କହିଛନ୍ତି।