ରଣପୁର, ୧୭।୮(ସ୍ବ.ପ୍ର.)-ନୟାଗଡ ଜିଲାର ରଣପୁର ସ୍ବାସ୍ଥ୍ୟକେନ୍ଦ୍ରର ନାମ ପରିବତ୍ତର୍ର୍ନ କରାଯାଇ ଶହୀଦ ରଘୁଦିବାକରଙ୍କ ନଁାରେ ରଖିବାକୁ ରଣପୁର ବିଧାୟକ ତଥା ଜିଲା ଯୋଜନା କମିଟି ଅଧ୍ୟକ୍ଷ ସତ୍ୟ ନାରାୟଣ ପ୍ରଧାନ ପ୍ରସ୍ତାବ ରଖିଛନ୍ତି । ଏ ନେଇ ବିଧାୟକ ମୁଖ୍ୟମନ୍ତ୍ରୀ ଓ ସ୍ବାସ୍ଥ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଗୁରୁବାର ୭୩ତମ ସ୍ବାଧୀନତା ଦିବସରେ ସ୍ମାରକପତ୍ର ଦେଇଛନ୍ତି।
ଥାଉକି, ଇଂରେଜ ଶାସନ ସମୟରେ ପ୍ରଜା ଆନ୍ଦୋଳନ ଚାଲୁ ରହିଥିଲା। ଆନ୍ଦୋଳନକୁ ଦମନ କରିବା ପାଇ ବେଜେଲଟଗେଟଙ୍କ ନେତୃତ୍ୱରେ ଫୋର୍ସ ଆସୁଥିଲେ। ଇଂରେଜ ଓ ରଣପୁରବାସୀଙ୍କ ମଧ୍ୟରେ ବିବାଦ ବଢ଼ିଥିଲା । ଏଭଳିସ୍ଥଳେ ବାଦଭୂଇଁର ରଘୁନାଥ ମହାନ୍ତି ଓ ଗଡବାଣିକିଲୋର ଦିବାକର ପରିଡା ମିଳିତ ଭାବେ ଲାଠିରେ ପିଟି ବେଜେଲଗେଟଙ୍କୁ ହତ୍ୟା କରିଥିବା ଅଭିଯୋଗ ହୋଇଥିଲା। ଏହି ଘଟଣାରେ ରଘୁ ଦିବାକରଙ୍କୁ ମିଳିତ ଭାବେ ବିହାରର ଭାଗଲପୁର ଜେଲରେ ଫାଶୀ ଦିଆଯାଇଥିଲା। ଶହୀଦ ଦ୍ୱୟଙ୍କ ସ୍ମୃତି ଉପେକ୍ଷିତ ହୋଇ ରହିଛି। ରଣପୁର ବଜାରରେ କେବଳ ପ୍ରତିମୂର୍ତ୍ତିକୁ ଛାଡିଦେଲେ ସେମାନଙ୍କର ସ୍ମୃତି ରକ୍ଷା ପାଇଁ ନୟାଗଡ ଜିଲାରେ କିଛି ବ୍ୟବସ୍ଥା କରାଯାଇ ନାହିଁ କି ଶହୀଦଙ୍କ ନାମରେ ଆଖିଦୃଶିଆ କୌଣସି କାର୍ଯ୍ୟ କରାଯାଇ ନାହିଁ, ଯାହାକୁ ନେଇ ବିଧାୟକ ଅସନ୍ତୋଷ ପ୍ରକାଶ କରିବା ସହ ରଣପୁର ସ୍ବାସ୍ଥ୍ୟକେନ୍ଦ୍ରର ନାମ ଶହୀଦ ଦ୍ୱୟଙ୍କ ନାମରେ ନାମିତ କରିବାକୁ ଦାବି ଉପସ୍ଥାପନ କରିଛନ୍ତି।
