ବାଲେଶ୍ୱର ଅଫିସ,୧୧।୬- ବାଲେଶ୍ୱର ଜିଲାରେ ସ୍ବାସ୍ଥ୍ୟସେବା ଭୁଶୁଡ଼ି ପଡ଼ିିଛି। ଜିଲାରେ ଏମ୍ସ (ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ) ଭଳି ହସ୍ପିଟାଲ ଖୋଲିବା ପାଇଁ ତତ୍କାଳୀନ କଂଗ୍ରେସ ଶାସିତ କେନ୍ଦ୍ର ସରକାର ମଞ୍ଜୁରୀ ପ୍ରଦାନ କରିଥିଲେ। ମାତ୍ର ବର୍ତ୍ତମାନର ଭାଜପା ସରକାର ଏହାକୁ କେବଳ ଓପିଡ଼ି ଭିତରେ ସୀମିତ ରଖିଛନ୍ତି। ଏହା ଜିଲାବାସୀଙ୍କ ପାଇଁ ଦୁର୍ଭାଗ୍ୟର ବିଷୟ। ଯଥାଶୀଘ୍ର ଜିଲାରେ ସ୍ବାସ୍ଥ୍ୟସେବା କ୍ଷେତ୍ରରେ ଉନ୍ନତି ନ ଘଟିଲେ ବ୍ୟାପକ ଆନ୍ଦୋଳନ ହେବ ବୋଲି କଂଗ୍ରେସ ଦଳ ପକ୍ଷରୁ ଚେତାବନୀ ଦିଆଯାଇଛି।
ଜିଲା କଂଗ୍ରେସ କାର୍ଯ୍ୟାଳୟ ପରିସରରେ ବୁଧବାର ଏକ ଖବରଦାତା ସମ୍ମିଳନୀ ଆୟୋଜିତ ହୋଇଥିଲା। ଏଥିରେ ପ୍ରଦେଶ କଂଗ୍ରେସ କମିଟିର ପୂର୍ବତନ ସାଧାରଣ ସମ୍ପାଦକ ସଞ୍ଜୀବ ଗିରି ଯୋଗଦେଇ କହିଲେ ଯେ, ବାଲେଶ୍ୱର ଏମ୍ପି ତଥା କେନ୍ଦ୍ରମନ୍ତ୍ରୀ ପ୍ରତାପ ଷଡ଼ଙ୍ଗୀଙ୍କ ନିଖୋଜ ପୋଷ୍ଟର ସହରର କିଛି ସ୍ଥାନରେ ଲଗାଯାଇଥିଲା। ଜିଲାବାସୀ ଭୋଟ ଦେଇ ଏମ୍ପି ଭାବେ ବାଛିଥିବା ପ୍ରାର୍ଥୀଙ୍କୁ ବିଶ୍ୱ ମହାମାରୀ କରୋନା ଏବଂ ‘ଅମ୍ଫନ’ ମହାବାତ୍ୟା ସମୟରେ ନ ଦେଖି ନିଆରା ଢଙ୍ଗରେ ପ୍ରତିବାଦ କରିଥିଲେ। ଯାହାକି ଜଣେ ଏମ୍ପିଙ୍କ ସମ୍ମାନକୁ କ୍ଷୁଣ୍ଣ କରିଥିଲା। ପୋଷ୍ଟର ମାରିବାରେ ସାମିଲ ଥିବା ଲୋକଙ୍କ ଉପରେ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରି ଉକ୍ତ ଚିତ୍ରର ଫଟୋ ଉତ୍ତୋଳନ କରି ଫେସବୁକ୍ରେ ଅପଲୋଡ୍ କରିଥିବା ଦୁଇ କଂଗ୍ରେସ ଛାମୁଆ ନେତାଙ୍କ ନାମରେ ଲିଖିତ ଅଭିଯୋଗ କରିବା ଏବଂ ଗିରଫ କରାଇବା ଗଣତନ୍ତ୍ରର ଶ୍ୱାସରୁଦ୍ଧ କରାଯାଇଥିବା ଗିରି ଅଭିଯୋଗ କରିଛନ୍ତି। ଅନ୍ୟପକ୍ଷରେ କେନ୍ଦ୍ରମନ୍ତ୍ରୀ ଷଡ଼ଙ୍ଗୀଙ୍କ ଏମ୍ଏସ୍ଏମ୍ଇ ବିଭାଗ ପକ୍ଷରୁ କେବଳ କାଗଜ କଲମରେ ହିସାବ ବାଲେଶ୍ୱରବାସୀ ଚାହାନ୍ତି ନାହଁି, କାମ କରି ଦେଖାଇବା ପାଇଁ ଆହ୍ବାନ କରିଛନ୍ତି। ଆଗାମୀ ଦିନରେ ଜିଲାର ଆବଶ୍ୟକତା ପୂରଣ କରିବା ସହ ସ୍ବାସ୍ଥ୍ୟସେବାରେ ଉନ୍ନତି ନ କଲେ କଂଗ୍ରେସ ଆନ୍ଦୋଳନକୁ ଓହ୍ଲାଇବ ବୋଲି ଗିରି ଚେତାବନୀ ଦେଇଛନ୍ତି। କଂଗ୍ରେସ ଦଳର ଏମ୍ପି ପ୍ରାର୍ଥୀ ନବଜ୍ୟୋତି ପଟ୍ଟନାୟକଙ୍କ ନିର୍ଦ୍ଦେଶରେ ୭୦ରୁ ଊର୍ଦ୍ଧ୍ୱ ଦିନ ଧରି କରୋନା ମହାମାରୀରେ ପ୍ରଭାବିତ ହୋଇଥିବା ଜିଲାବାସୀଙ୍କୁ କଂଗ୍ରେସ ତରଫରୁ ଶୁଖିଲା ଓ ରନ୍ଧାଖାଦ୍ୟ ସମେତ ସମସ୍ତ ପ୍ରକାରର ସହଯୋଗ କରାଯାଇଛି। ପୁଣି ପୌରାଞ୍ଚଳ ସମେତ ଜଳେଶ୍ୱର, ନୀଳଗିରି, ସୋର ଏନ୍ଏସିର ପ୍ରତ୍ୟେକ ୱାର୍ଡରେ କଂଗ୍ରେସ କର୍ମୀଙ୍କ ଦ୍ୱାରା ସାନିଟାଇଜର୍ ବଣ୍ଟନ କରାଯାଇଥିବା ଟାଉନ୍ ସଭାପତି ତଥା ପୂର୍ବତନ କାଉନ୍ସିଲର ପଦ୍ମଲୋଚନ ଲେଙ୍କା କହିଥିଲେ। ଏହି ଖବରଦାତା ସମ୍ମିଳନୀରେ ବହୁ କଂଗ୍ରେସ ନେତା ଉପସ୍ଥିତ ଥିଲେ।