ଚିପିଲିମା,୬ା୬(ବ୍ୟୁରୋ): ସମ୍ବଲପୁର ଜିଲା ବୁର୍ଲା ମେଡିକାଲ କଲେଜ ଓ ହସ୍ପିଟାଲର ସିନିୟର ରେସିଡେଣ୍ଟ ଡାକ୍ତର ଶଙ୍କର ରାମଚନ୍ଦାନୀ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଓ୍ବେବ୍ସାଇଟରେ ସ୍ଥାନ ପାଇଛନ୍ତି। ସେ ଗତ କିଛିଦିନ ତଳେ ନିଜ କାର୍ରେ ବୁର୍ଲା କୁଷ୍ଠ କଲୋନୀ ରାସ୍ତାରେ ଯାଉଥିଲେ। ଜଣେ କୁଷ୍ଠ ରୋଗୀ (ବୃଦ୍ଧ) ରାସ୍ତା ପାର ହୋଇ ପାରୁ ନ ଥିବା ସେ ଦେଖିଥିଲେ। ଏହାପରେ ସେ କାର୍କୁ ସାଇଡ୍ କରି ସମ୍ପୃକ୍ତ ବୃଦ୍ଧଙ୍କୁ କୋଳେଇ ଧରି ରାସ୍ତା ସେପଟେ ଥିବା କୁଡ଼ିଆରେ ଛାଡ଼ିଥିଲେ। ଏହି ଖବର ସାମାଜିକ ଗଣମାଧ୍ୟମରେ ଭାଇରାଲ ହେବା ପରେ ‘ଧରିତ୍ରୀ’ ଓ ‘ଓଡ଼ିଶା ପୋଷ୍ଟ’ ସହ ଓ୍ବେବ୍ପୋର୍ଟାଲରେ ମଧ୍ୟ ପ୍ରଥମେ ପ୍ରକାଶ ପାଇଥିଲା। ତାହା ରାଜ୍ୟ ସରକାରଙ୍କ ଦୃଷ୍ଟିକୁ ଆସିଛି। ଡାକ୍ତର ରାମଚନ୍ଦାନୀଙ୍କ ଏହି ପେପର କ୍ଲିପିଂ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଓ୍ବେବ୍ସାଇଟରେ ସ୍ଥାନ ପାଇଛି। ଅନ୍ୟମାନଙ୍କ ପାଇଁ ଏହା ଉଦାହରଣ ବୋଲି ଦର୍ଶାଯାଇଛି। ଏ ନେଇ ଡା. ରାମଚନ୍ଦାନୀ କହିଛନ୍ତି, କୁଷ୍ଠରୋଗୀଙ୍କୁ ଘୃଣା କରିବା ଅନୁଚିତ। ଛୁଇଁଲେ କୁଷ୍ଠରୋଗ ବ୍ୟାପେ ନାହିଁ। ଆମମାନଙ୍କ ଭିତରେ ଥିବା ଭୁଲ ଧାରଣ ଯୋଗୁ କୁଷ୍ଠରୋଗୀମାନେ ଆଜି ଅବହେଳିତ ଆଉ ଘୃଣାର ପାତ୍ର ହୋଇଛନ୍ତି। ଶିକ୍ଷିତ ସମାଜ ଏହି ଚିନ୍ତାଧାରାରେ ପରିବର୍ତ୍ତନ ଆଣିବାକୁ ସେ ଆହ୍ବାନ କରିଛନ୍ତି।