ଦାରିଙ୍ଗବାଡ଼ି,୧୦।୯(ଡି.ଏନ.ଏ)-ଦାରିଙ୍ଗବାଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଅବ୍ୟବସ୍ଥା ଲାଗି ରହିଛି। ଏଠାରେ ଚିକିତ୍ସାରେ ଅବହେଳା, ଅସ୍ବାସ୍ଥ୍ୟକର ପରିବେଶ ଓ ନିୟମିତ ଡାକ୍ତର ରହୁ ନ ଥିବା ପୂର୍ବରୁ ଅଭିଯୋଗ ହୋଇଆସୁଛି ା ତେବେ ସୋମବାର ପୁଣି ଏକ ଅବ୍ୟବସ୍ଥା ସାମ୍ନାକୁ ଆସିଛି। ସ୍ବାସ୍ଥ୍ୟ ପରୀକ୍ଷା କରାଇବାକୁ ଆସି ଅଞ୍ଚଳର ଗର୍ଭବତୀମାନେ ହଟହଟା ହେବା ସହ ଭୋକରେ ଫେରିଛନ୍ତି।
ପ୍ରତି ମାସର ୯ ତାରିଖରେ ପ୍ରଧାନମନ୍ତ୍ରୀ ସୁରକ୍ଷା ମାତୃତ୍ୱ ଅଭିଯାନରେ ଗର୍ଭବତୀଙ୍କ ରକ୍ତ ନମୁନା, ମଧୁମେହ, ରକ୍ତଚାପ ଆଦି ପରୀକ୍ଷା କରାଯାଇଥାଏ।ା ଏହି ତାରିଖ ଛୁଟି ରହିଥିଲେ ପରଦିନ ଏସବୁ ପରୀକ୍ଷା କରାଯାଇ ସ୍ବାସ୍ଥ୍ୟକେନ୍ଦ୍ର ପକ୍ଷରୁ ମାଗଣାରେ ଔଷଧ ଓ ତାଲିକା ପ୍ରକାରେ ବ୍ରେଡ, ଫଳ, ଅଣ୍ଡା, କ୍ଷୀର ଆଦି ଦିଆଯାଇଥାଏ ା ଦୁର୍ଗମ ଅଞ୍ଚଳରୁ ଆସିଥିବା ଗର୍ଭବତୀମାନେ ସୋମବାର ସରକାରୀ ଛୁଟି ଥିବା ଜାଣି ନ ପାରି ସ୍ବାସ୍ଥ୍ୟକେନ୍ଦ୍ରକୁ ଆସିଥିଲେ। ସେମାନଙ୍କ ମଧ୍ୟରୁ କେତେଜଣ ସୋମବାର ଛୁଟି ଶୁଣି ଫେରିଯାଇଥିଲେ। ଆଉ କେତେଜଣଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଥିଲେ ସୁଦ୍ଧା ରିପୋର୍ଟ ପ୍ରଦାନ କରାଯାଇ ପାରି ନ ଥିଲା କି ସେମାନଙ୍କ ନାମ ପଞ୍ଜୀକରଣ ହୋଇ ନ ଥିଲା। ନାମ ପଞ୍ଜୀକରଣ ହୋଇ ନ ପାରିବାରୁ ଗର୍ଭବତୀଙ୍କୁ ଭୋକରେ ନିଜ ଗ୍ରାମକୁ ଫେରିବାକୁ ପଡ଼ିଥିଲା ା ମଧୁସ୍ମିତା ନାୟକ, ମାମିନୀ ଦିଗାଳ ପ୍ରମୁଖ ଦୂରଦୂରାନ୍ତରୁ ଆସି ନିରାଶରେ ଫେରିଥିବା କହିଛନ୍ତି। ମଙ୍ଗଳବାର ପୁଣି ଆସି ନାମ ପଞ୍ଜୀକରଣ କରିବାକୁ ପଡ଼ିବ ବୋଲି ସେମାନଙ୍କୁ ସ୍ବାସ୍ଥ୍ୟକେନ୍ଦ୍ର ପକ୍ଷରୁ କୁହାଯାଇଛି। ଏ ନେଇ ବିପିଏମ୍ ଅମୂଲ୍ୟ କୁମାର ପାଣିଗ୍ରାହୀ କହିଛନ୍ତି, ୯ ତାରିଖରେ ଛୁଟି ପଡ଼ିଲେ ତା’ ପରଦିନ ଗର୍ଭବତୀଙ୍କୁ ନେଇ ଆସିବାକୁ ଆଶାକର୍ମୀମାନଙ୍କୁ ପୂର୍ବରୁ ସୂଚନା ଦିଆଯାଇଛି । ହେଲେ ଆଶାକର୍ମୀମାନେ ସଚେତନ ହେଉ ନ ଥିବାରୁ ଏଭଳି ହୋଇଛି। ନାମ ପଞ୍ଜୀକରଣ ନ ହେଲେ ମାଗଣା ଖାଦ୍ୟ ଦିଆଯାଇପାରିବ ନାହିଁ ୨୦୧୬ରୁ ନିୟମ ହୋଇଛି ବୋଲି ସେ କହିଛନ୍ତି। ସ୍ବାସ୍ଥ୍ୟକେନ୍ଦ୍ର ପାଥୋଲୋଜି ଟେକନିସିଆନ ସରୋଜ କୁମାର ଦାସ କହିଛନ୍ତି, ଗର୍ଭବତୀମାନଙ୍କ ରକ୍ତ ନମୁନା ସହ ବିଭିନ୍ନ ପରୀକ୍ଷା କରାଯାଇଛି। ମଙ୍ଗଳବାର ରିପୋର୍ଟ ଦିଆଯିବ ା ଛୁଟି ରହିଥିବାରୁ ଏହି ସମସ୍ୟା ହୋଇଥିବା କହିଛନ୍ତି। ତେବେ ଭୋକ ଉପାସରେ ଗର୍ଭବତୀଙ୍କୁ ଫେରାଇ ଦିଆଯିବା ଘଟଣାକୁ ଅଞ୍ଚଳବାସୀ ନିନ୍ଦା କରିଛନ୍ତି। ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି ା