ରାଇରଙ୍ଗପୁର/ବିଶୋଇ,୮ା୧୧(ଡି.ଏନ୍.ଏ.): ବିଧାନସଭା ସ୍ବାସ୍ଥ୍ୟ ବିଭାଗ ଷ୍ଟାଣ୍ଡିଂ କମିଟି ଗୁରୁବାର ରାଇରଙ୍ଗପୁର ଓ ବିଶୋଇ ଗସ୍ତ କରି ସ୍ବାସ୍ଥ୍ୟସେବା ପରଖିଛନ୍ତି। ଜଳେଶ୍ୱର ବିଧାୟକ ଅଶ୍ୱିନୀ ପାତ୍ରଙ୍କ ଅଧ୍ୟକ୍ଷତାରେ ରେମୁଣା ବିଧାୟକ ସୁଧାଂଶୁ ଶେଖର ପରିଡା, ମୋରଡ଼ା ବିଧାୟକ ରାଜକିଶୋର ଦାସ, ସୁନ୍ଦରଗଡ଼ ବିଧାୟିକା କୁସୁମ ଟେଟେ, ଚମ୍ପୁଆ ବିଧାୟିକା ମିନାକ୍ଷୀ ମହାନ୍ତ ଓ କରଞ୍ଜିଆ ବିଧାୟିକା ବାସନ୍ତୀ ହେମ୍ବ୍ରମ ପ୍ରମୁଖ ବିଭିନ୍ନ ଡାକ୍ତରଖାନା ପରିଦର୍ଶନ କରିଥିଲେ।
ଏହି କମିଟି ରାଇରଙ୍ଗପୁରର ବିଭିନ୍ନ ଡାକ୍ତରଖାନା ଯାଇ ମହିଳା, ଶିଶୁ ଓ ପ୍ରସୂତି ବିଭାଗ ସହ ବିଭିନ୍ନ ଓ୍ବାର୍ଡ ପରିଦର୍ଶନ କରି ଚିକିତ୍ସିତ ରୋଗୀଙ୍କ ସମ୍ପର୍କରେ ପଚାରି ବୁଝିଥିଲେ। ସ୍ଥାନୀୟ ହସ୍ପିଟାଲର ଜଳଯୋଗାଣ ସହ ବିଭିନ୍ନ ସମସ୍ୟା ଉପରେ ସିଡିଏମ୍ଓ ଡା. ଛତିଶ ଚନ୍ଦ୍ର ମହାନ୍ତି ଏବଂ ସ୍ବାସ୍ଥ୍ୟ ଅଧିକାରୀ ଡା. ପ୍ରଦୀପ କୁମାର ମହାପାତ୍ର ପ୍ରମୁଖ ସ୍ବାସ୍ଥ୍ୟ ଅଧିକାରୀଙ୍କ ସହ ଆଲୋଚନା କରିଥିଲେ। ସ୍ଥାନୀୟ ପ୍ରଶାସନ ପକ୍ଷରୁ ଉପଜିଲାପାଳ ଧର୍ମନନ୍ଦ ବେହେରା ଉପସ୍ଥିତଥିଲେ। ବାରିପଦାରୁ ରାଇରଙ୍ଗପୁର ଅଭିମୁଖେ ଯାଉଥିବା ସମୟରେ ଷ୍ଟାଣ୍ଡିଂ କମିଟି ହଠାତ ୪୯ ନଂ. ଜାତୀୟ ରାଜପଥ ନିକଟବର୍ତ୍ତୀ ବିଶୋଇ ପ୍ରାଥମିକ ଚିକିତ୍ସାଳୟ ପରିଦର୍ଶନ କରିଥିଲେ। କମିଟିର ଏହି ଗସ୍ତ ସମୟରେ ଜିଲା ପରିଷଦ ସଦସ୍ୟ ଗୁରୁବା ମୁର୍ମୁ, ନାରାୟଣ ମହାପାତ୍ର, ସୁବାଷ ପାତ୍ର, ସୁଶାନ୍ତ ମହାନ୍ତି, ରଞ୍ଜନ କବାଟ, ସୁଶୀଲ ମାହାନ୍ତି, ଅଭିଜିତ ମାହାନ୍ତି, ଆଶିଷ ସେଠୀ,ଆନନ୍ଦ କୁମାର ରାମ,ସୁରେନ୍ଦ୍ର ବେହେରା, ସୁଜିତ ସେଠୀ, ଅନିଲ ମାହାନ୍ତି ,ସୁନ୍ଦର ମୋହନ ମାଝୀ,ଜିତେନ ବେହେରା ପ୍ରମୁଖ ଉପସ୍ଥିତ ରହି ବିଶୋଇ ମେଡିକାଲରେ ସ୍ଥାୟୀ ଡାକ୍ତର ନିଯୁକ୍ତି ,ରୋଗୀ ଶଯ୍ୟା ସଂଖ୍ୟା ବୃଦ୍ଧି,ଫ୍ୟାନ,ପାନୀୟ ଜଳ ସମସ୍ୟାର ସମାଧାନ ସହିତ ଭିତ୍ତିଭୂମୀର ଉନ୍ନତିକରଣ ପାଇଁ ଦାବି କରିଥିଲେ।