ସୁରାଟ,୨୯।୧୧- ଅଭିମନ୍ୟୁ ମିଥୁନଙ୍କ ଘାତକ ବୋଲିଂ ପରେ ଓପନରଙ୍କ ଅର୍ଦ୍ଧଶତକ ବଳରେ କର୍ନାଟକ ୮ ଉଇକେଟ ହାତରେ ରଖି ହରିୟାଣାକୁ ହରାଇ ଚଳିତ ସୟଦ ମୁସ୍ତାକ ଅଲି ଟି୨୦ ଟୁର୍ନାମେଣ୍ଟର ଫାଇନାଲରେ ପ୍ରବେଶ କରିଛି। ମ୍ୟାଚ୍ରେ ଅଭିମନ୍ୟୁ ମିଥୁନ ଗୋଟିଏ ଓଭରରେ ୫ ଉଇକେଟ ନେବା ସବୁଠୁ ଉଲ୍ଲେଖନୀୟ ଘଟଣା ଥିଲା।
ଆମନ୍ତ୍ରଣ ପାଇ ବ୍ୟାଟିଂ କରିଥିବା ହରିୟାଣା
୧୯ ଓଭରରେ ୩ ଉଇକେଟ ହରାଇ ୧୯୨ ରନ୍ କରିଥିଲା। ଏଣୁ ଦଳୀୟ ସ୍କୋର ସହଜରେ ୨୦୦ ଅତିକ୍ରମ କରିବ ଲାଗୁଥିଲା। ହେଲେ ଅନ୍ତିମ ଓଭରରେ ଅଭିମନ୍ୟୁ ହ୍ୟାଟ୍ରିକ ସହ ୫ ଉଇକେଟ ନେଇଥିଲେ। ଫଳରେ ଦଳ ଧାର୍ଯ୍ୟ ୨୦ ଓଭରରେ ୮ ଉଇକେଟ ହରାଇ ୧୯୪ ରନ୍ କରିଥିଲା। ହରିୟାଣା ପକ୍ଷରୁ ହିମାଂଶୁ ରାଣା ୬୧, ଚଇତନ୍ୟ ବିଶନୋଇ ୫୫ ଓ ହର୍ଶାଲ ପଟେଲ ୩୪ ରନ୍ କରିଥିଲେ। ବେଲିଂରେ ମିଥୁନ ୫ ଓ ଶ୍ରେୟାସ ଗୋପାଲ ୨ ଉଇକେଟ ହାତେଇଥିଲେ। ଜବାବରେ କର୍ନାଟକର ଓପନରମାନେ ପ୍ରଥମ ଉଇକେଟ ପାଇଁ ୯.୩ ଓଭରରେ ୧୨୫ ଯୋଡ଼ିଥିଲେ। ଲୋକେଶ ରହୁଲ ୬୬ (୬ ଛକା ଓ ୪ ଚୌକା) ରନ୍ କରି ଆଉଟ୍ ହେବା ପରେ ଦେବଦତ୍ତ ପଡିକଲଙ୍କ ସହ କ୍ରିଜରେ ଯୋଗ ଦେଇଥିଲେ ମୟଙ୍କ ଅଗ୍ରଓ୍ବାଲ। ଦୁହେଁ ୨୬ ବଲରେ ୫୭ ରନ୍ କରି ଦଳର ବିଜୟ ସୁନିଶ୍ଚିତ କରିଥିଲେ। ବିଜୟ ଲକ୍ଷ୍ୟଠାରୁ ୧୩ ରନ୍ ବାକି ଥିବାବେଳେ ଦେବଦତ୍ତ (୮୭ ରନ୍, ୧୧ ଚୌକ ଓ ୪ ଛକା) ପ୍ୟଭିଲିଅନ ଫେରିଯାଇଥିଲେ। ପରେ ଅଗ୍ରଓ୍ବାଲ (୩୦*) ଓ ଅଧିନାୟକ ମନୀଷ ପାଣ୍ଡେ(୩*) ବଳକା ରନ୍ ସଂଗ୍ରହ କରି ନେଇଥିଲେ। ଫଳରେ କର୍ନାଟକ ହାତରେ ୮ ଉଇକେଟ ରଖି ୩୦ ବଲ ପୂର୍ବରୁ ୧୯୫ ରନ୍ କରି ମ୍ୟାଚ୍ ଜିତି ନେଇଛି।