ନୂଆଦିଲ୍ଲୀ, ୧୨।୯- ଭାରତ ପକ୍ଷରୁ ଖେଳିବା ସ୍ବପ୍ନରେ ଓଡ଼ିଆ ପୁଅ ଅଂଶୁମାନ ରଥ ଗୁରୁବାର ହଂକଂ ଜାତୀୟ କ୍ରିକେଟ୍ ଦଳର ଅଧିନାୟକ ପଦରୁ ଇସ୍ତଫା ଦେଇଛନ୍ତି। ଆଗାମୀ ଦିନରେ ଭାରତରେ ପ୍ରଥମ ଶ୍ରେଣୀ କ୍ରିକେଟ୍ ଖେଳିବାକୁ ଯୋଜନା ରଖିଥିବା ଅଂଶୁମାନ ଏଥିସହ ହଂକଂ ଜାତୀୟ ଦଳ ସିଲେକ୍ସନ ପ୍ରକ୍ରିୟାରୁ ମଧ୍ୟ ନିଜକୁ ଦୂରେଇ ନେଇଛନ୍ତି। ‘ଗତ କିଛି ବର୍ଷ ହେବ ମୋତେ ସମସ୍ତ ପ୍ରକାର ସମର୍ଥନ ଓ ସହଯୋଗ କରିଥିବାରୁ କ୍ରିକେଟ୍ ହଂକଂକୁ ଧନ୍ୟବାଦ ଦେବାକୁ ଚାହୁଁଛି। ୧୨ବର୍ଷ ବୟସରୁ ହଂକଂ କ୍ରିକେଟ୍ ସହ ଜଡ଼ିତ ହୋଇଆସିଛି, ଯାହାକି ବହୁତ ସ୍ମରଣୀୟ ରହିବ। ଏବେ କିନ୍ତୁ ପରିବର୍ତ୍ତନର ସମୟ ଆସିଛି ବୋଲି ଭାବୁଛି। ସମସ୍ତ ସାଥୀ ଖେଳାଳି ଓ ସପୋର୍ଟ ଷ୍ଟାଫ୍ଙ୍କୁ ଧନ୍ୟବାଦ୍ ଦେବା ସହ ଭବିଷ୍ୟତ ପାଇଁ ଶୁଭେଚ୍ଛା’ ବୋଲି ଭୁବନେଶ୍ୱର ନିବାସୀ ଅଂଶୁମାନ ଇମର୍ଜିଂ କ୍ରିକେଟ୍କୁ ଏକ ସାକ୍ଷାତ୍କାର ଅବସରରେ କହିଛନ୍ତି। ରଥ ହଂକଂ ପକ୍ଷରୁ ୧୮ ଦିନିକିଆ ମ୍ୟାଚ୍ ଖେଳି ଗୋଟିଏ ଶତକ ଓ ୭ ଅର୍ଦ୍ଧଶତକ ସହ ୮୨୪ ରନ୍ ସଂଗ୍ରହ କରିଛନ୍ତି। ୧୪୩ ରନର ଅପରାଜିତ ଶତକୀୟ ଇନିଂସ ତାଙ୍କର ଶ୍ରେଷ୍ଠ ସ୍କୋର ରହିଛି। ସେହିଭଳି ୨୦ ଟି୨୦ ମ୍ୟାଚ୍ରୁ ସେ ୧୮.୯ ଆଭରେଜରେ ୩୨୧ରନ୍ କରିଛନ୍ତି। ସେହିଭଳି ଦିନିକିଆ ଓ ଟି୨୦ରେ ସେ ଯଥାକ୍ରମେ ୧୪ ଓ ୫ ଉଇକେଟ୍ ହାସଲ କରିଛନ୍ତି। ଭାରତୀୟ ପାର୍ସପୋର୍ଟର ଅଧିକାରୀ ଥିବା ଅଂଶୁମାନ ସ୍ଥାନୀୟ ‘ଅନ୍କ୍ୟାପଡ୍’ ଖେଳାଳି ଭାବେ ଆଇପିଏଲ୍ ୨୦୨୦ ଖେଳାଳି ନିଲାମିରେ ସାମିଲ ହେବାର ମଧ୍ୟ ସମ୍ଭାବନା ସୃଷ୍ଟି ହୋଇଛି। ଭାରତ ପକ୍ଷରୁ ଖେଳିବା ଲକ୍ଷ୍ୟ ରହିଛି ବୋଲି ଏହି ବାମହାତୀ ଓପନିଂ ବ୍ୟାଟ୍ସମ୍ୟାନ ସାକ୍ଷାତ୍କାର ଅବସରରେ କହିଛନ୍ତି।