ନୂଆଦିଲ୍ଲୀ,୭ା୧(ପି.ଟି.): ଗତ ୨୦୧୪-୧୫ ବର୍ଷରେ ଭାରତରୁ ହଂକଂକୁ ୧୦୩୮ କୋଟି ୩୪ ଲକ୍ଷ ଟଙ୍କାର କଳାଧନ ପଠାଯାଇଥିବା ଅଭିଯୋଗରେ ସିବିଆଇ ୫୧ଟି ସଂସ୍ଥା ବିରୋଧରେ ମାମଲା ରୁଜୁ କରିଛି। ଅଧିକାଂଶ ସଂସ୍ଥା ଚେନ୍ନାଇ ବାସିନ୍ଦାଙ୍କ ମାଲିକାନାରେ ରହିଛି। ତିନୋଟି ରାଷ୍ଟ୍ରାୟତ୍ତ ବ୍ୟାଙ୍କର କେତେଜଣ ଅଧିକାରୀ ଏହି କଳାଧନ ଟ୍ରାନ୍ସଫର କରାଇବାରେ ସମ୍ପୃକ୍ତ ଥିବା ଅଭିଯୋଗ ହୋଇଛି। ସେହି ବ୍ୟାଙ୍କଗୁଡ଼ିକ ହେଲେ ବ୍ୟାଙ୍କ ଅଫ୍ ଇଣ୍ଡିଆ, ଏସ୍ବିଆଇ ଏବଂ ପଞ୍ଜାବ ନ୍ୟାଶନାଲ ବ୍ୟାଙ୍କ। ଏହିସବୁ ବ୍ୟାଙ୍କର ୪ଟି ଶାଖାରେ ୪୮ଟି କମ୍ପାନୀର ୫୧ଟି କରେଣ୍ଟ ଆକାଉଣ୍ଟ ଖୋଲିଥିଲା। ଏହି ଆକାଉଣ୍ଟ ଜରିଆରେ ବିଦେଶକୁ ଟଙ୍କା ପଠାଯାଉଥିବା ସିବିଆଇକୁ ସୂଚନା ମିଳିଥିଲା। ୨୪ଟି ଆକାଉଣ୍ଟ ଜରିଆରେ ବିଭିନ୍ନ ଆମଦାନି ସାମଗ୍ରୀର ଅଗ୍ରିମ ପୈଠ ବାବଦକୁ ୪୮୮.୩୯ କୋଟି ଟଙ୍କା ପଠାଯାଇଥିବାବେଳେ ଭାରତୀୟ ପର୍ଯ୍ୟଟକମାନଙ୍କ ବିଦେଶ ଭ୍ରମଣ ବାବଦରେ ୫୪୯.୯୫ କୋଟି ଟଙ୍କା ୨୭ଟି ଆକାଉଣ୍ଟ ମାଧ୍ୟମରେ ପ୍ରେରଣ କରାଯାଇଥିଲା। ସିବିଆଇ ମହମ୍ମଦ ଇବ୍ରାମ୍ସା, ଜନି, ଜିଣ୍ଟା ମିଧାର, ନିଜାମୁଦ୍ଦିିନ ଏବଂ ୪୮ଟି କମ୍ପାନୀ ବିରୋଧରେ ମାମଲା ରୁଜୁ କରିଛି। ୨୪ଟି କମ୍ପାନୀ ମଧ୍ୟରୁ ୧୦ଟି ପୂର୍ବରୁ ଛୋଟକାଟର ଆମଦାନି କରୁଥିଲେ। ସେମାନଙ୍କର ଆମଦାନି ସାମଗ୍ରିର ଦାମ୍ ଏବଂ ପଠାଯାଇଥିବା ଅର୍ଥ ପରିମାଣ ମଧ୍ୟରେ ତାଳମେଳ ନାହିଁ। ଏହାବ୍ୟତୀତ ଏହି କାରବାରରେ ସମ୍ପୃକ୍ତ କେତେଜଣଙ୍କୁ କମିଶନି ଦିଆଯିବା ସହ ସମ୍ପୃକ୍ତ ବ୍ୟାଙ୍କ ଅଧିକାରୀମାନେ ଲାଞ୍ଚ ନେଇଥିବା ମଧ୍ୟ ଜଣାପଡିଛି। ୨୦୧୫ ଶେଷ ଭାଗରେ ଏହିସବୁ କାରବାର ହୋଇଥିଲା।