ବାଲିଅନ୍ତା, ୨୫ା୫(ଡି.ଏନ୍.ଏ.): ଭୁବନେଶ୍ୱର-କଟକ ୧୬ ନମ୍ବର ଜାତୀୟ ରାଜପଥର ହଂସପାଳ ଛକରେ ଶନିବାର ଭୋର ସମୟରେ ଏକ ଦୁର୍ଘଟଣା ଘଟିଛି। ସୋୟାବିନ୍ ବଡ଼ି ବୋଝେଇ ପିକ୍ଅପ୍ ଭ୍ୟାନ୍(ନଂ.ଓଡି୦୭ଡି୬୬୮୨) ଧକ୍କାରେ ଜଣେ ସାଇକେଲ ଆରୋହୀଙ୍କ ମୃତ୍ୟୁ ଘଟିଛି। ସେ ହେଲେ ସ୍ଥାନୀୟ ହଂସପାଳ ଗ୍ରାମର ସୌରୀବନ୍ଧୁ ମହାନ୍ତି(୫୫)।
ସୌରୀବନ୍ଧୁ ମଞ୍ଚେଶ୍ୱରସ୍ଥିତ କୁଆଖାଇ ଜଳଯୋଗାଣ କେନ୍ଦ୍ରର ଜଣେ କର୍ମଚାରୀ ଥିଲେ। କାର୍ଯ୍ୟାଳୟକୁ ଯିବା ପାଇଁ ସେ ରାସ୍ତା ପାର ହେଉଥିବା ବେଳେ ପିକ୍ଅପ୍ ଗାଡ଼ି ତାଙ୍କୁ ଧକ୍କା ଦେଇଥିଲା। ସମ୍ମୁଖରୁ ଆସୁଥିବା ଏକ ଟ୍ରକ୍କୁ ମଧ୍ୟ ଧକ୍କା ଦେଇ ପିକ୍ଅପ୍ ଭ୍ୟାନ୍ ଏକ ପରିବା ଦୋକାନ ଉପରେ ଓଲଟି ପଡ଼ିଥିଲା। ଘଟଣାସ୍ଥଳରେ ସୌରୀବନ୍ଧୁଙ୍କ ମୃତ୍ୟୁ ଘଟିଛି। ଏ ନେଇ ଉତ୍ତ୍ୟକ୍ତ ଲୋକେ ରାସ୍ତାରୋକୋ ପାଇଁ ଉଦ୍ୟମ କରୁଥିବା ବେଳେ ମଞ୍ଚେଶ୍ୱର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଶୁଝା କରିବା ସହ ତଦନ୍ତ ଚଳାଇଛି।
