ଭୁବନେଶ୍ୱର,୨୬।୨(ସ୍ପୋଟର୍ସ ବ୍ୟୁରୋ)- କେନ୍ଦ୍ର ସରକାରଙ୍କ ଦ୍ୱାରା ଆରମ୍ଭ କରାଯାଇଥିବା ଖେଲୋ ଇଣ୍ଡିଆ କାର୍ଯ୍ୟକ୍ରମ ଭାରତୀୟ କ୍ରୀଡ଼ାକୁ ଏହି ପ୍ରୋଗ୍ରାମ ଏକ ନୂଆ ସୋପାନରେ ପହଞ୍ଚାଇବ। ଏହା ଦେଶକୁ ଏକ କ୍ରୀଡ଼ା ମହାଶକ୍ତିରେ ପରିଣତ କରିବ ବୋଲି ପୂର୍ବତନ ଭାରତୀୟ ହକି ଖେଳାଳି ଦୀପକ ଠାକୁର କହିଛନ୍ତି। ଟ୍ୟାଲେଣ୍ଟ ସ୍କାଉଟ୍ ଏଠାରେ ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ାରେ ଯୋଗ ଦେବା ଅବସରରେ ସେ ଏହି କଥା କହିଛନ୍ତି। କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ଓ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ଖେଲୋ ଇଣ୍ଡିଆ ମାଧ୍ୟମରେ ଏକ ବୈପ୍ଳବିକ ପଦକ୍ଷେପ ନେଇଛନ୍ତି। ଲୋକମାନଙ୍କ ମଧ୍ୟରେ ସବୁ ବୟସ ବର୍ଗରେ କ୍ରୀଡ଼ା ସଂସ୍କୃତି ସୃଷ୍ଟି କରିବା ଦିଗରେ ଏହା ବେଶ୍ ସହାୟକ ହେବ ବୋଲି ସେ କହିଛନ୍ତି। ବହୁ ପୂର୍ବରୁ ଏହା ଆୟୋଜନ ହେବା ଜରୁରୀ ଥିଲା। ତେବେ ବର୍ତ୍ତମାନ ଏହାର ସଫଳ ଆୟୋଜନ ହେଉଥିବାରୁ ବହୁତ ଖୁସି ଅଛି। ଗତ କିଛ ଦିନ ହେବ ଟ୍ୟାଲେଣ୍ଟ ସ୍କାଉଟ୍ ହିସାବରେ ଏଠାରେ ରହୁଛି। ଏଠାରେ ମିଳୁଥିବା ସୁବିଧା ସୁଯୋଗ ଓ ପରିବେଶ ଖୁବ୍ ଉଚ୍ଚକୋଟୀର। ଏସିଆନ ଗେମ୍ସ କିମ୍ବା ରାଜ୍ୟ ଗୋଷ୍ଠୀକ୍ରୀଡ଼ା ପରିବେଶ ରହିବା ଭଳି ମନେ ହେଉଛି। ଖେଲୋ ଇଣ୍ଡିଆ ଦ୍ୱାରା ବହୁ ସଂଖ୍ୟାରେ ଯୁବ ଖେଳାଳି ସୃଷ୍ଟି ହେବେ। ଖୁବ୍ଶୀଘ୍ର ଭାରତ ଏକ ସ୍ପୋର୍ଟିଂ ନେଶନ ବା କ୍ରୀଡ଼ା ସମ୍ପନ୍ନ ରାଷ୍ଟ୍ରରେ ପରିଣତ ହେବ ବୋଲି ସେ ପୂର୍ବାନୁମାନ କରିଛନ୍ତି।
ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ାର ମାନ ମଧ୍ୟ ଉଚ୍ଚକୋଟୀର ହୋଇପାରିଛି। ବିଭିନ୍ନ କ୍ରୀଡ଼ାରେ ଯୁବ ଖେଳାଳିମାନଙ୍କ ପ୍ରତିଭା ପ୍ରଦର୍ଶନ ମଧ୍ୟ ଉଚ୍ଚକୋଟୀର ହୋଇଥିବା ଲକ୍ଷ୍ୟ କରିଛି। କ୍ରୀଡ଼ାର ମାନରେ ଯଥେଷ୍ଟ ଉନ୍ନତି ହୋଇଛି। ଏହା ଆମକୁ ଈର୍ଶାନ୍ବିତ କରିଛି। କାରଣ ଆମ ସମୟରେ ଏଭଳି ସୁବିଧା ସୁଯୋଗ ମିଳୁ ନ ଥିଲା ବୋଲି ୩୯ ବର୍ଷୀୟ ଠାକୁର କହିଛନ୍ତି। ଇତିମଧ୍ୟରେ ବହୁତ କିଛି ସକାରାତ୍ମକ ପରିବର୍ତ୍ତନ ହୋଇଛି। କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ କ୍ରୀଡ଼ା ଉନ୍ନତି ନେଇ ବେଶ୍ ସକାରାତ୍ମକ ମନୋଭାବ ପୋଷଣ କରିଛନ୍ତି। ତାଙ୍କ ଦୂରଦୃଷ୍ଟି ଭାରତୀୟ କ୍ରୀଡ଼ା ଏକ ନୂଆ ଯୁଗରେ ପହଞ୍ଚିବ। ସରକାରଙ୍କ ପ୍ରୋତ୍ସାହନ କ୍ରୀଡ଼ା ଓ କ୍ରୀଡ଼ାବିତ୍ଙ୍କୁ ଉନ୍ନତିରେ ସହାୟ ହେବ। ତୃଣମୂଳ ସ୍ତରରେ କ୍ରିକେଟ ବହୁତ ଉନ୍ନତି କରିଛି। ତେଣୁ କ୍ରିକେଟ ଆଗକୁ ଯାଇପାରିଛି। କେବଳ କ୍ରିକେଟ ନୁହେଁ ସବୁ କ୍ରୀଡ଼ା ତୃଣମୂଳସ୍ତରରେ ବିକଶିତ ହେବ ଆବଶ୍ୟକ। କେବଳ ଅଲିମ୍ପିଆନ୍ସ ସୃଷ୍ଟି କରିବା ଉପରେ ଆମର ନଜର ନାହିଁ। ଏବେ ଅଲିମ୍ପିକ ପଦକ ଜିତିବା ନେଇ ଗୁରୁତ୍ୱ ଦିଆଯାଉଛି। ଏଥର ହକିରେ ଭାରତ ଗୋଟିଏ ଅଲିମ୍ପିକ ପଦକ ହାସଲ କରିବ। ଗତକିଛି ବର୍ଷରେ ହକିରେ ଆଶାତୀତ ଉନ୍ନତି ହୋଇଛି। ତେଣୁ ଭାରତ ଟୋକିଓ ଅଲିମ୍ପିକ୍ସରେ ପଦକ ଜିତିବ ବୋଲି ସେ ଜୋର ଦେଇ କହିଛନ୍ତି।