ପର୍ଥ, ୩ା୪ (ଏପି)-ଚଳିତ ବର୍ଷ ଯଦି ଟୋକିଓ ଅଲିମ୍ପିକ୍ସ ହୋଇଥାନ୍ତା ତେବେ ସ୍ବର୍ଣ୍ଣ ପଦକ ଅଭିଯାନରେ ସାମିଲ ହୋଇଥାନ୍ତେ ଅଷ୍ଟ୍ରେଲିଆର ମହିଳା ଫିଲ୍ଡ ହକି ଗୋଲ୍କିପର ରାଚେଲ ଲିଞ୍ଚ୍। ମାତ୍ର କୋଭିଡ୍-୧୯ ସବୁ ଏପଟସେପଟ କରିଦେଲା। ଅଲିମ୍ପିକ ଗେମ୍ସ ଏବେ ଆସନ୍ତା ବର୍ଷକୁ ଘୁଞ୍ଚାଯାଇଛି। ଲିଞ୍ଚ୍ ହେଉଛନ୍ତି ରେଜଷ୍ଟ୍ରିଭୁକ୍ତ ନର୍ସ ମଧ୍ୟ। ଦେଶରେ କରୋନା ଭାଇରସ୍ ବିରୋଧରେ ଚାଲିଥିବା ଲଢେଇରେ ସେ ନିଜକୁ ସାମିଲ କରିଛନ୍ତି। ବର୍ତ୍ତମାନ ପାଇଁ ସେ ହକ ଫିଲ୍ଡ ଛାଡ଼ି ହସ୍ପିଟାଲ ଓ୍ବାର୍ଡରେ ପାଦ ଦେବେ। ଓ୍ବେଷ୍ଟର୍ନ ଅଷ୍ଟ୍ରେଲିଆ ପ୍ରଦେଶରେ ଥିବା ଦୁଇଟି କୋଭିଡ୍-୧୯ କ୍ଲିନିକ୍ରେ କାର୍ଯ୍ୟ ଲାଗି ଲାଗି ସେ ଆବେଦନ କରିଛନ୍ତି। ହକି ଖେଳ ପାଇଁ ଟ୍ରେନିଂ କାର୍ଯ୍ୟରେ ବ୍ୟସ୍ତ ରହୁଥିବାରୁ ଲିଞ୍ଚ୍ ସପ୍ତାହକୁ ଗୋଟିଏ ଦିନ ଏକ ନ୍ୟୁରୋ ରିବିଲିଟେଶନ ଓ୍ବାର୍ଡରେ କାର୍ଯ୍ୟ କରି ଆସୁଥିଲେ। ଅଲିମ୍ପିକ୍ସ ପାଇଁ ପ୍ରସ୍ତୁତି ସକାଶେ ଲିଞ୍ଚ୍ ଗତ ସପ୍ତାହରେ ଦଳ ସହିତ ୟୁରୋ ଗସ୍ତରେ ଯାଇଥାନ୍ତେ। ମାତ୍ର ଅଲିମ୍ପିକ୍ସ ଘୁଞ୍ଚତ୍ୟିବାରୁ ତାହାକୁ ବାତିଲ କରାଯାଇଛି। ୩୩ ବର୍ଷୀୟା ଲିଞ୍ଚ୍ ବିଶ୍ୱର ଅନ୍ୟତମ ଶ୍ରେଷ୍ଠ ମହିଳା ଗୋଲକିପର ଭାବେ ପରିଚିତ। କୋଭିଡ୍-୧୯ ସଂକ୍ରମଣ ଯୋଗୁ ଅଷ୍ଟ୍ରେଲିଆରେ ମେଡିକାଲ ଷ୍ଟାଫ୍ଙ୍କ ଉପରେ ଅତିରିକ୍ତ ଚାପ ଲଦି ହୋଇଯାଇଛି। ବହୁ ସଂଖ୍ୟାରେ ନର୍ସ ଓ ସ୍ବାସ୍ଥ୍ୟକର୍ମୀ ନିଯୁକ୍ତି ଦ୍ୱାରା ଏହା ଲାଘବ ହୋଇପାରିବ। ପ୍ରଥମ ଥର ଜଣେ ଫୁଲ୍ ଟାଇମ୍ ନର୍ସ ଭାବେ କାର୍ଯ୍ୟକରିବାର ସୁଯୋଗ ମିଳିବ ବୋଲି ଏହି ହକି ଗୋଲକିପର କହିଛନ୍ତି। କରୋନା ଭାଇରସ୍ ସଂକ୍ରମଣରୁ ରକ୍ଷା ପାଇବା ଲାଗି ଅଷ୍ଟ୍ରେଲିଆ ସରକାର ବିଦେଶ ଯିବା ଆସିବା କ୍ଷେତ୍ରରେ କଟକଣା ଜାରି କରିଛନ୍ତି। ସାମାଜିକ ଦୂରତା ଅବଲମ୍ବନ କରିବା ଲାଗି ଲୋକମାନଙ୍କୁ ପରାମର୍ଶ ଦେଇଛନ୍ତି। ମାତ୍ର କେତେଜଣ ଏହି ମାହାମାରୀକୁ ହାଲ୍କା ଭାବେ ନେଉଛନ୍ତି। ସମୁଦ୍ରକୂଳରେ ଭିଡ଼ ଜମାଉଛନ୍ତି। ଏହା ଉଦ୍ବେଗର ବିଷୟ ବୋଲି ଲିଞ୍ଚ୍ ପ୍ରକାଶ କରିଛନ୍ତି। ଅଷ୍ଟ୍ରେଲିଆରେ ବର୍ତ୍ତମାନ ସୁଦ୍ଧା କୋଭିଡ୍-୧୯ ସଂକ୍ରମିତଙ୍କ ସଂଖ୍ୟା ୫,୦୦୦ରୁ ଊର୍ଦ୍ଧ୍ୱ। ୨୪ଜଣ ଲୋକ ଏଥିରେ ପ୍ରାଣ ହରାଇ ସାରିଲେଣି।