ବାଲେଶ୍ୱର ଅଫିସ, ୩।୮: ଏକ ହତ୍ୟା ମାମଲାର ବିଚାର କରି ବାଲେଶ୍ୱର ଅତିରିକ୍ତ ସେସନ୍ସ ଜଜ୍ ଗିରିଜା ଶଙ୍କର ମହାପାତ୍ର ଉପଯୁକ୍ତ ସାକ୍ଷ୍ୟପ୍ରମାଣ ଅଭାବରୁ ବାଲେଶ୍ୱର ଜିଲା ଖଇରା ଥାନା କଡ଼ମିଆଁ ଗ୍ରାମର ବୁଧିରାମ ରାଉତ (୬୦), ମୃଦୁଲତା ରାଉତ (୪୫), ଔପଦା ଥାନା ପୂର୍ଣ୍ଣଚନ୍ଦ୍ର ନାୟକ (୫୫) ଓ ଲମ୍ବୋଦର ନାୟକ (୨୫)ଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି। ଅଦାଲତ ୧୪ଜଣ ସାକ୍ଷୀଙ୍କର ଜମାନବନ୍ଦୀ ଓ ୨୦ଟି ଦଲିଲ ଦସ୍ତାବିଜକୁ ବିଚାରକୁ ନେଇ ଏହି ରାୟ ଦେଇଛନ୍ତି।
ଗତ ୨୦୧୩ ସେପ୍ଟେମ୍ବର ୨୪ ତାରିଖ ରାତ୍ରିରେ ପର୍ଶୁରାମ ରାଉତ ଯୋସିଆଁ ଗ୍ରାମରେ ଥିବା ଏକ ମଦ ଦୋକାନରେ ପ୍ରଚୁର ମଦ୍ୟପାନ କରିବା ସହ ଉକ୍ତ ରାତ୍ରିରେ ଘରକୁ ଫେରି ନ ଥିଲେ। ଘର ଲୋକମାନେ ତାଙ୍କୁ ରାତିରେ ବହୁ ଖୋଜାଖୋଜି କରିଥିଲେ ମଧ୍ୟ ତାଙ୍କର କୌଣସି ଖବର ପାଇପାରି ନ ଥିଲେ। ଗତ ୨୦୧୩ ସେପ୍ଟେମ୍ବର ୨୫ ତାରିଖ ପୂର୍ବାହ୍ନ ୬ଟାରେ ପର୍ଶୁରାମଙ୍କ ମୃତଦେହ ମଦ ଦୋକାନ ପାଖ ଚାଷଜମିରେ ପଡ଼ିଥିବା ଦେଖି ତାଙ୍କ ସ୍ତ୍ରୀ ଖଇରା ଥାନାରେ ଲିଖିତ ଅଭିଯୋଗ କରିଥିଲେ। ଏନେଇ ଥାନାରେ ମାମଲା (ନଂ. ୧୮୫/୧୩) ରୁଜୁ କରାଯାଇଥିଲା। ମୁଦାଲାମାନଙ୍କ ତରଫରୁ ଆଇନଜୀବୀ ନଟଗୋପାଳ ପଣ୍ଡା ମାମଲା ପରିଚାଳନା କରୁଥିଲେ।