ବୌଦ୍ଧ,୨୦।୧୨ (ଡି.ଏନ୍.ଏ.)- ବୌଦ୍ଧ ଜିଲା ହରଭଙ୍ଗା ବ୍ଲକରେ ସରକାରୀ ଯୋଜନା ବାଟବନା ହେଇଛେ। ବ୍ଲକର ଅନେକ ହିତାଧିକାରୀ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ତିଆରି ବିଲ୍ ଟଁକା ପାଏବାର ଲାଗି ହଟ୍ହଟା ହେଉଥିବାର ଅଭିଯୋଗ କରିଛନ୍।
ସୂଚନା ଅନ୍ସାରେ ହରଭଙ୍ଗା ବ୍ଲକ ବାଣିଭୁଷଣପୁର ପଁଚେତ୍ ଲଣ୍ଡ୍ରେଜୁ ଗଁାର ୭ରୁ ୮ ଝନ୍ ହିତାଧିକାରୀ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ତିଆରି କରିଛନ୍। ହେଲେ ଅନେକ ଦିନ୍ ହେଲା ବିଲ୍ ଟଁକା ନାଇଁ ପାଏଲାରୁ ସେମାନେ ଗୁରୁବାର ବ୍ଲକ ଅଫିସରେ ଏପିଓକୁଁ ଭେଟି ଅଭିଯୋଗ କରିଛନ୍। ଲଣ୍ଡ୍ରେଜୁ ଗଁାର ମଞ୍ଜୁ ବେହେରା ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ତିଆରି ଶେଷ କରିଛନ୍। ହେଲେ ସେ ଶେଷ ବିଲ୍ ନାଇଁ ପାଇଥିଲାବେଲେ ଏନ୍ଆର୍ଇଜିଏସ୍ ଟଁକା ୪ ହଜାର ନ ପାଇଛନ୍। ସେନ୍ତା ଗଁାର ସାଧବାଣୀ ବେହେରା, ସୁନୀଲ ସାହୁ, ବିଜୁ ବେହେରା, ଅଜୟ ବେହେରାକଁର ବି ସମାନ ଅବସ୍ତା। ହିତାଧିକାରୀମାନେ ଘର ତିଆରି ସାରବାର ବଛର ବଛର ବିତିଯାଇଥିଲେ ବି ବିଲ୍ ଟଁକା ପାଇ ନାଇଁପାରବାର। ଏନ୍ତାଥି ବୋନସ୍ ଟଁକା କଥା କିଏ ପଚାରେ। ଇଆଡ଼େ ହିତାଧିକାରୀମାନେ ବିଲ୍ ଟଁକା ପାଏବାର ଲାଗି ବଛର ବଛର ହେଲା ପଁଚେତ୍ନୁ ବ୍ଲକ ଅଫିସ ଦଉଡି ଦଉଡି ନିହାଲ ହେଇଗଲେନ। ଇ ବାବ୍ଦେ ଏପିଓ ହେମନ୍ତ କୁମାର ପ୍ରଧାନକୁଁ ପଚ୍ରାଲାରୁ ଯେନ୍ ହିତାଧିକାରୀମାନକର ବିଲ୍ ରହିଯାଇଛେ ଟଁକା ଆଏଲେ ସମକୁ ଦିଆଯିବା ବଲି ସେ କହିଥିଲେ।