ଚଣ୍ଡିଗଡ଼,୧୬ା୯(ପି.ଟି.): ଆସାମ ପରେ ହରିୟାଣାରେ ଜାତୀୟ ନାଗରିକ ପଞ୍ଜିକା (ଏନ୍ଆର୍ସି) ଲାଗୁ ହେବ ବୋଲି ମୁଖ୍ୟମନ୍ତ୍ରୀ ମନୋହର ଲାଲ୍ ଖଟ୍ଟର ରବିବାର ଘୋଷଣା କରିଛନ୍ତି। ଅକ୍ଟୋବରରେ ହରିୟାଣଶ ବିଧାନସଭା ନିର୍ବାଚନ ହେବାକୁ ଥିବାବେଳେ ଭାଜପାର ମହାସଂକଳ୍ପ ଅଭିଯାନ ଅବସରରେ ଖଟ୍ଟର ଅବସରପ୍ରାପ୍ତ ବିଚାରପତି ଏଚ୍.ଏସ୍. ଭାଲା ଏବଂ ପୂର୍ବତନ ନୌସେନା ମୁଖ୍ୟ ଆଡମିରାଲ ସୁନିଲ ଲାନ୍ବାଙ୍କୁ ଭେଟିବା ପରେ ପଞ୍ଚକୁଲାଠାରେ ଖବରଦାତାମାନଙ୍କୁ ଏହା କହିଛନ୍ତି। ସାରା ଦେଶରେ ଏନ୍ଆର୍ସି ଲାଗୁ କରିବା ପ୍ରସ୍ତାବକୁ ସେ ପୂର୍ବରୁ ସମର୍ଥନ ଜଣାଇଥିଲେ।
ହାଇକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ୍ ଭାଲାଙ୍କ ସହ ସେ ଦେଶର ବିଭିନ୍ନ ପ୍ରସଙ୍ଗକୁ ନେଇ ଆଲୋଚନା କରିଥିଲେ। ଅବସର ପରେ ଜଷ୍ଟିସ୍ ଭାଲା ବିଭିନ୍ନ କାର୍ଯ୍ୟ ସହ ସମ୍ପୃକ୍ତ ଅଛନ୍ତି। ସେ ଏନ୍ଆର୍ସି କାର୍ଯ୍ୟରେ ସାମିଲ ଥିଲେ ଏବଂ ଖୁବ୍ଶୀଘ୍ର ଆସାମ ଯିବେ ବୋଲି କହିଛନ୍ତି। ହରିୟାଣାରେ ଏନ୍ଆର୍ସି ଲାଗୁ କରିବା ନେଇ ପୂର୍ବତନ ବିଚାରପତିଙ୍କ ସମର୍ଥନ ଓ ପ୍ରସ୍ତାବ ଲୋଡିଥିଲେ ଖଟ୍ଟର। ହରିୟାଣାରେ ଏନ୍ଆର୍ସି ଲାଗୁ କରିବା ପାଇଁ ଏକ ନ୍ୟାୟିକ ଆୟୋଗ ପ୍ରତିଷ୍ଠା ହେବା ଆବଶ୍ୟକ ବୋଲି ଜଷ୍ଟିସ୍ ଭାଲା ପ୍ରସ୍ତାବ ଦେଇଥିଲେ। ଆସାମ ଏନ୍ଆର୍ସି ଚୂଡାନ୍ତ ତାଲିକା ଅଗଷ୍ଟ ୩୧ରେ ପ୍ରକାଶ ପାଇଥିଲା। ଯେଉଁଥିରୁ ୧୯ ଲକ୍ଷରୁ ଊର୍ଦ୍ଧ୍ୱ ଲୋକ ବାଦ୍ ପଡିଛନ୍ତି।