ନୂଆଦିଲ୍ଲୀ,୨୬ା୧୦(ପି.ଟି.): ହରିୟାଣାର ନବନିର୍ବାଚିତ ୯୦ ବିଧାୟକଙ୍କ ମଧ୍ୟରୁ ୮୪ ଜଣ କୋଟିପତି ଥିବା ଆସୋସିଏଶନ୍ ଫର ଡେମୋକ୍ରାଟିକ୍ ରିଫର୍ମସ୍ (ଏଡିଆର୍) ବିଶ୍ଳେଷଣରୁ ଜଣାପଡିଛି। ଅର୍ଥାତ୍ ୯୩ ପ୍ରତିଶତ ବିଧାୟକଙ୍କ ସମ୍ପତ୍ତି ପରିମାଣ ୧ କୋଟି ଟଙ୍କାରୁ ଅଧିକ। ପୂର୍ବ ବିଧାନସଭାରେ ୭୫ ବିଧାୟକଙ୍କ ସମ୍ପତ୍ତି ୧ କୋଟି ଟଙ୍କାରୁ ଊର୍ଦ୍ଧ୍ୱ ଥିଲା। ପୂର୍ବ ବିଧାନସଭା ତୁଳନାରେ ଏଥର ବିଧାନସଭାର କୋଟିପତି ବିଧାୟକ ସଂଖ୍ୟା ୧୦ ପ୍ରତିଶତ ବୃଦ୍ଧି ପାଇଥିବା ଏଡିଆର୍ ରିପୋର୍ଟରେ କୁହାଯାଇଛି। ନବନିର୍ବାଚିତ ୪୦ ଭାଜପା ବିଧାୟକଙ୍କ ମଧ୍ୟରୁ ୩୭ କୋଟିପତି ହୋଇଥିଲାବେଳେ ୩୧ କଂଗ୍ରେସ ବିଧାୟକଙ୍କ ମଧ୍ୟରେ କୋଟିପତିଙ୍କ ସଂଖ୍ୟା ୨୯ ରହିଛି। ଦୁଷ୍ୟନ୍ତ ଚୌତାଲାଙ୍କ ଜନନାୟକ ଜନତା ପାର୍ଟିର ୧୦ ବିଧାୟକଙ୍କ ହାରାହାରି ସମ୍ପତ୍ତି ୨୫.୨୬ କୋଟି ବୋଲି ଏହି ରିପୋର୍ଟରୁ ଜଣାପଡିଛି।
୫୭ ବିଧାୟକଙ୍କ ବୟସ ୪୧ରୁ ୫୦ ମଧ୍ୟରେ ହୋଇଥିଲାବେଳେ ୬୨ ଜଣଙ୍କ ଶିକ୍ଷାଗତ ଯୋଗ୍ୟତା ସ୍ନାତକ କିମ୍ବା ତଦୂର୍ଦ୍ଧ୍ୱ। ୧୨ ନୂଆ ବିଧାୟକଙ୍କ ନାଁରେ ଫୌଜଦାରି ମାମଲା ରହିଛି। ସେଥିରୁ କଂଗ୍ରେସର ୪ ଜଣ ହୋଇଥିଲାବେଳେ ଭାଜପାର ୨ ଓ ଜେଜେପିରୁ ଜଣେ ବୋଲି ରିପୋର୍ଟରେ କୁହାଯାଇଛି।