ବ୍ରହ୍ମପୁର ଅଫିସ,୨୮ା୮- ବ୍ରହ୍ମପୁର ବସ୍ଷ୍ଟାଣ୍ଡର ସ୍ଥାନାନ୍ତର ନେଇ ରହିଥିବା ସମସ୍ୟାର ଏବେ ଅନ୍ତ ଘଟିବ। ଅକ୍ଟୋବର ୨ ଗାନ୍ଧୀ ଜୟନ୍ତୀରେ ହଳଦିଆପଦର ବସ୍ଟର୍ମିନାଲକୁ ବ୍ରହ୍ମପୁର ବସ୍ଷ୍ଟାଣ୍ଡ ଭାବେ ଘୋଷଣା କରାଯିବ। ଉକ୍ତ ଷ୍ଟାଣ୍ଡରୁ ସମସ୍ତ ବସ୍ ଚଳପ୍ରଚଳ କରିବ। ନୂଆ ଷ୍ଟାଣ୍ଡକୁ ସିଟି ବସ୍ଷ୍ଟାଣ୍ଡ ଭାବେ ଘୋଷଣା ସହ ଏହାର ମରାମତି ମଧ୍ୟ କରାଯିବ। ମଙ୍ଗଳବାର ବ୍ରହ୍ମପୁର ଉନ୍ନୟନ କର୍ତ୍ତୃପକ୍ଷରେ ଆୟୋଜିତ ସ୍ବତନ୍ତ୍ର ସାଧାରଣ ବୈଠକରେ ଏଭଳି ନିଷ୍ପତ୍ତି ନିଆଯାଇଛି। ବର୍ତ୍ତମାନର ନୂଆ ବସ୍ଷ୍ଟାଣ୍ଡ ତଥା ସିଟି ବସ୍ଷ୍ଟାଣ୍ଡର ମରାମତି ପାଇଁ ଟେଣ୍ଡର ପ୍ରକ୍ରିୟା ଆରମ୍ଭ କରାଯିବ। ଏ ବାବଦରେ ପ୍ରାୟ ୧ କୋଟି ଟଙ୍କା ଖର୍ଚ୍ଚ କରାଯିବାକୁ ଯୋଜନା ରହିଥିବା ବିଡିଏ ଉପାଧ୍ୟକ୍ଷ ଚକ୍ରବର୍ତ୍ତୀ ସିଂ ରାଠୋର ବୈଠକରେ ସୂଚାଇଥିଲେ। ବ୍ରହ୍ମପୁର ସହର କର୍ପୋରେଶନ ରୋଡରେ ଦୀର୍ଘ ବର୍ଷ ଧରି ପରିତ୍ୟକ୍ତ ଅବସ୍ଥାରେ ପଡି ରହିଥିବା ବିଡିଏର ୫ ଏକର ଜମିରେ ଗଞ୍ଜାମ ହାଟ ନିର୍ମାଣ ହେବ। ଏନେଇ ଏକ ସ୍ବତନ୍ତ୍ର ସାଧାରଣ ବୈଠକ ମଙ୍ଗଳବାର ଅନୁଷ୍ଠିତ ହୋଇଥିଲା। ବିଡିଏ ସମ୍ମିଳନୀ କକ୍ଷରେ ଉପାଧ୍ୟକ୍ଷ ତଥା ବ୍ରହ୍ମପୁର ମହାନଗର ନିଗମ(ବିଏମ୍ସି) କମିଶନର ଚକ୍ରବର୍ତ୍ତୀ ସିଂ ରାଠୋରଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ଗଞ୍ଜାମ ହାଟ ଡିଜାଇନକୁ ଚୂଡାନ୍ତ କରାଯିବା ସହ ହଳଦିଆ ପଦର ବସ୍ଷ୍ଟାଣ୍ଡକୁ ସମ୍ପୂର୍ଣ୍ଣ କାର୍ଯ୍ୟକ୍ଷମ ଉପରେ ଆଲୋକପାତ କରାଯାଇଥିଲା। ହଳଦିଆପଦର ବସ୍ଷ୍ଟାଣ୍ଡ କାର୍ଯ୍ୟକ୍ଷମ ନେଇ ବୈଠକ ପରେ ବୈଠକ ବସୁଥିଲେ ମଧ୍ୟ ଆଲୋଚନା ବିଫଳ ହେଉଛି। ଏନେଇ ଆରଟିଓଙ୍କ ସହ ଆସନ୍ତା ୩୧ତାରିଖରେ ଆଲୋଚନା କରାଯାଇ ହଳଦିଆପଦର ବସ୍ଷ୍ଟାଣ୍ଡକୁ ବ୍ରହ୍ମପୁର ବସ୍ଷ୍ଟାଣ୍ଡ ନାମରେ ଘୋଷଣା କରାଯିବ। ଏଥିସହ କର୍ପୋରେଶନ ରୋଡରେ ପରିତ୍ୟକ୍ତ ଅବସ୍ଥାରେ ଥିବା ବିଡିଏର ୫ ଏକର ଜମିରେ ଗଞ୍ଜାମ ହାଟ ନିର୍ମାଣ ହେବ। ୩୦ କୋଟି ଟଙ୍କା ବ୍ୟୟରେ ନିର୍ମାଣ ହେବାକୁ ଥିବା ଏହି ପ୍ରକଳ୍ପ ମଣିଷ ହାର୍ଟ ଆକୃତି ଡିଜାଇନରେ ନିର୍ମାଣ ହେବ। ସେଥିରେ ୬୬ ଦୋକାନ ଘର ସହ ୨୫୦୦ ସିଟ ବିଶିଷ୍ଟ ଏକ ଥିଏଟର ହଲ ରହିବ। ଏହାବ୍ୟତୀତ ମହିଳା, ଶିଶୁ, ବରିଷ୍ଠ ନାଗରିକଙ୍କ ବ୍ୟବହାରିକ ଉପକରଣ ନିମିତ୍ତ ସ୍ବତନ୍ତ୍ର ସ୍ଥାନ ରହିବ। ଗଞ୍ଜାମ ହାଟ ସମ୍ମୁଖରେ ପ୍ରାୟ ୭୦ ହଜାର ବର୍ଗ ଫୁଟ ଅଞ୍ଚଳରେ ୩ ମହଲା ବିଶିଷ୍ଟ ଏକ କମର୍ସିଆଲ କମ୍ପ୍ଲେକ୍ସ ନିର୍ମାଣ ହେବ। ଯେଉଁଥିରେ ୧୧୧ ଦୋକାନ ଘର ନିର୍ମାଣ କରାଯିବ। ପ୍ରତ୍ୟେକ ଶନିବାର ଓ ରବିବାର ଆଞ୍ଚଳିକ କଳାକାରଙ୍କ ଦ୍ୱାରା ଗଞ୍ଜାମ ହାଟ ମଧ୍ୟରେ ସହରବାସୀଙ୍କ ଆମୋଦ ପ୍ରମୋଦ ନିମିତ୍ତ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯିବାର ମଧ୍ୟ ଯୋଜନା ରହିଥିବା ଉପାଧ୍ୟକ୍ଷ ରାଠୋର ସୂଚାଇଥିଲେ। ଏଥି ପାଇଁ ଆସନ୍ତା ୪୫ ଦିନ ମଧ୍ୟରେ ଟେଣ୍ଡର ପ୍ରକ୍ରିୟା ଆରମ୍ଭ କରାଯିବାକୁ ଥିବା ବେଳେ ଦେଢ ବର୍ଷରୁ ୨ ବର୍ଷ ମଧ୍ୟରେ ଏହି ପ୍ରକଳ୍ପ କାର୍ଯ୍ୟ ଶେଷ କରିବାକୁ ଲକ୍ଷ୍ୟ ରଖାଯାଇଥିବା ବୈଠକରେ କୁହାଯାଇଥିଲା। ବୈଠକରେ ଅନ୍ୟମାନଙ୍କ ମଧ୍ୟରେ ବ୍ରହ୍ମପୁର ଏମ୍ପି ଚନ୍ଦ୍ରଶେଖର ସାହୁ, ବିଧାୟକ ବିକ୍ରମ କୁମାର ପଣ୍ଡା, ଗୋପାଳପୁର ବିଧାୟକ ଡ. ପ୍ରଦୀପ କୁମାର ପାଣିଗ୍ରାହୀ, ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା, ବିଡିଏ ସଚିବ ସମ୍ବିତ ରାଉତ ଓ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ।