ଜଳେଶ୍ୱର, ୨୩।୭(ଡି.ଏନ.ଏ.)-ଜଳେଶ୍ୱର ସହର ବଡ଼ବଜାରସ୍ଥିତ ସରସ୍ବତୀ ଶିଶୁ ବିଦ୍ୟାମନ୍ଦିର ହଷ୍ଟେଲରେ ରହୁଥିବା ଅଷ୍ଟମ ଶ୍ରେଣୀ ଛାତ୍ର ତଥା ଭୋଗରାଇ ଥାନା ଅଧିନ ହାଣ୍ଡିପଡ଼ା ଗ୍ରାମନିବାସୀ କାହ୍ନୁ ଦାସଙ୍କ ପୁଅ ଗୋବିନ୍ଦ ଦାସ (୧୩) ରବିବାର ସକାଳୁ ନିଖୋଜ ହୋଇଯାଇଛନ୍ତି। ଏହି ଘଟଣା ନେଇ ସୋମବାର ପୂର୍ବାହ୍ନରେ ଭୋଗରାଇ ଅଞ୍ଚଳରେ ଥିବା ୧୦ରୁ ଊର୍ଦ୍ଧ୍ୱ ଏସ୍ଏଚ୍ଜି ଗ୍ରୁପ୍ର ଶତାଧିକ ମହିଳା ଉକ୍ତ ସ୍କୁଲରେ ପହଞ୍ଚତ୍ ସ୍କୁଲକୁ ବନ୍ଦ କରିବା ସହିତ ସମସ୍ତ ଶିକ୍ଷକଙ୍କଠାରେ ନିଖୋଜ ହୋଇଯାଇଥିବା ଛାତ୍ର ଗୋବିନ୍ଦଙ୍କୁ ଖୋଜିବା ପାଇଁ ଅଡ଼ି ବସିଥିଲେ। ଏହି ଛାତ୍ର ନିଖୋଜ ଘଟଣାକୁ ନେଇ ସ୍କୁଲ ତରଫରୁ ଜଳେଶ୍ୱର ଥାନାରେ ଏକ ଲିଖିତ ଅଭିଯୋଗ ଦିଆଯାଇଛି। ପୋଲିସ ଏକ ନାବାଳକ ଅପହରଣ ମାମଲା (ନଂ.୧୬୯/୧୯) ରୁଜୁ କରି ୨ ପୋଲିସ ଟିମ୍ ଗଠନ କରି ତଦନ୍ତ ଚଳାଇଛି। ଗୋଟିଏ ଟିମ୍କୁ ଭୁବନେଶ୍ୱର ଆଡ଼କୁ ଥିବା ପ୍ରମୁଖ ରେଳଷ୍ଟେଶନ ଓ ଅନ୍ୟ ଏକ ଟିମ୍କୁ କୋଲକାତା ଆଡ଼କୁ ଥିବା ପ୍ରମୁଖ ରେଳଷ୍ଟେଶନଗୁଡ଼ିକରେ ଖୋଜାଖୋଜି କରିବା ପାଇଁ ଆଇଆଇସି ପ୍ରଦୀପ କୁମାର ମାଝି ପଠାଇଛନ୍ତି । ଅପରପକ୍ଷରେ ବିଦ୍ୟାମନ୍ଦିରର ପ୍ରଧାନଶିକ୍ଷକଙ୍କ ସମେତ ଅନ୍ୟ ଶିକ୍ଷକ ତଥା କର୍ମଚାରୀମାନଙ୍କୁ ଥାନାକୁ ଡକାଇ ପୋଲିସ ପଚରାଉଚୁରା କରୁଛି।